တောင်ကြီးမြို့တွင် ယနေ့ (မတ် ၁၇)ရက် မနက်၈နာရီဝန်းကျင်တွင် စစ်ကောင်စီ လက်နက်ကိုင်တပ်ဖွဲ့က ကားကြီးဖြင့် လိုက်လံတိုက်သည့်အတွက် ယာဉ်တိုက်မှုဖြစ်ကာ လူတဦး သေဆုံးသွားကြောင်း သတင်းထွက်ပေါ်နေသည်။
ဖြစ်စဉ်မှာ ယနေ့ (မတ် ၁၇)ရက် မနက် ၈နာရီဝန်းကျင် တွင် တောင်ကြီးမြို့ မင်းလမ်းရှိ အင်းဝဘဏ် အနီးတဝှိက်၌ စစ်ကောင်စီ လက်နက်ကိုင် တပ်ဖွဲ့က လမ်းပေါ် ရှိ လက်သုံးချောင်း ထောင်ပြသည့် ဆိုင်ကယ်ကို လိုက်တိုက်ရာ ထိုဆိုင်ကယ်သမားမှ မောင်းနှင်းထွက်ပြေးသွားစဉ် လမ်းလျှောက်လာသူ ၂ဦး ကို တိုက်မိခဲ့သဖြင့် တဦးမှာ ဒဏ်ရာရရှိကာ အသက် ၆၀အရွယ် အမျိုးသားတဦး သေဆုံးသွားကြောင်း သိရသည်။
“ ဒီနေ့မနက်ပိုင်းမှာ လူမဲ့ သပိတ်ပုံစံ ပြုလုပ်ကြတယ်။ လမ်းမကြီးကို ဆက်သွယ်တဲ့ လမ်းသွယ်တွေပိတ်ပြီးတော့ သပိတ်ပုံစံလုပ်တယ်။ အဲ့မှာ ရဲ၊စစ်သားတွေက လက်သုံးချောင်းထောင်ပြတဲ့ ဆိုင်ကယ်ကိုလိုက်တာ။ အဲ့ဆိုင်ကယ်က ရှောင်လိုက်တော့ လမ်းလျှောက်လာတဲ့သူ ၂ယောက်ကို သွားတိုက်မိသွားတယ်။ တယောက်က လက်ကျိုးသွားတယ်။ အသက် (၆၀) အဖိုးကတော့ ဆုံးသွားတယ်” ဟု မျက်မြင်တွေ့ရှိသူ တဦး ပြောပြချက် အရသိရသည်။
အဆိုပါ သတင်းနှင့် ပတ်သက်ပြီး သျှမ်းသံတော်ဆင့် မှ ဆက်လက် မေးမြန်းနေဆဆဲပါ။
တောင်ကြီးမြို့ စစ်အာဏာရှင် ဆန့်ကျင်ဆန္ဒပြသည့် လူထုသပိတ်ကို စစ်ကောင်စီ လက်နက်ကိုင်တပ်ဖွဲ့က အကြမ်းဖက်ဖြိုခွင်းမှု ပြုလုပ်နေသော်လည်း ပြည်သူများက နည်းမျိုးစုံဖြင့် ဆက်လက်ဆန္ဒပြနေကြသည်။
Leave a Comments