သျှမ်းတောင် တောင်ကြီး ပြည်တော်သာရပ်ကွက် ကြံ့ခိုင်ရေးလမ်းရှိ Heart Rock Cafe ပိုင်ရှင် ဦးသန်းဦး ကို ယနေ့ (မတ် ၁၆)ရက် ညနေပိုင်း တွင် စစ်ကောင်စီ လက်နက်ကိုင်တပ်ဖွဲ့မှ ဝင်ရောက်ဖမ်းဆီးသွားကြောင်း သတင်းရရှိသည်။
ယနေ့ (မတ် ၁၆)ရက် ညနေ ၅နာရီခန့်တွင် စစ်ကောင်စီ လက်နက်ကိုင်တပ်ဖွဲ့ က Heart Rock Cafe ဆိုင်အတွင်းဝင်ရောက်လာပြီး၊ ဆိုင်ပိုင်ရှင် ဦးသန်းဦးအား ဖမ်းဆီးသွားကြောင်း၊ ဖမ်းဆီးရသည့်အကြောင်းရင်း အသေးစိတ်ကို မသိရှိသေးကြောင်း တောင်ကြီး ဒေသခံများက ပြောသည်။
“ ညနေ ၅နာရီခန့် က ရဲ၊စစ်သားတွေ Heart Rock Cafe ဆိုင်ကို ဝင်လာတယ်။ ပြီးတော့ ဦးသန်းဦးကို ဖမ်းဆီးသွားတယ်။ ကျနော်တို့လည်း သေချာမသိသေးဘူး။ ဘာကြောင့် ဖမ်းလဲဆိုတာ သေချာမသိသေးဘူး” ဟု ပြည်တော်သာ ရပ်ကွက်နေထိုင်သည့် အမျိုးသား တဦးက ပြောသည်။
တောင်ကြီးမြို့တွင် စစ်အာဏာရှင် အလိုမရှိ လူထုသပိတ် ကို စစ်ကောင်စီ လက်နက်ကိုင်တပ်ဖွဲ့ က နေ့စဉ်နဲ့ အမျှ အကြမ်းဖက်ဖြိုခွင်းမှုရှိနေသော်လည်း တောင်ကြီးပြည်သူများကတော့ ယနေ့ထိတိုင် စစ်အာဏာရှင်ကို ဆန့်ကျင်ဆန္ဒပြနေကြောင်း သိရသည်။