သျှမ်းပြည်မြောက်ပိုင်းနောင်ချိုမြို့တွင် စစ်အာဏာဆန့်ကျင်လှုပ်ရှားရေး သပိတ် လူမစုနိုင်အောင် ရဲအင်အား အများ စောင့်ဆိုင်းသော်လည်း ပြောက်ကျားနည်းဖြင့် ဆက်လက် ဆန္ဒထုတ်ဖော်နေကြကြောင်း သတင်းရရှိသည်။
ယမန်နေ့ (မတ် ၁၁)ရက်မှစတင်ကာ ဆန္ဒထုတ်ဖော်သူများ လူစုဝေးမရအောင် ရဲအင်အားများက နေရာအနှံ့ စောင့်ဆိုင်းနေကာ သပိတ်စစ်ကြောင်းကို ဖြိုခွင်းရန် ကြိုးစားနေကြသော်လည်း နောင်ချို့ လူထုသပိတ်စစ်ကြောင်းက ပြောက်ကျားနည်းဖြင့်သာ ဆက်လက် ဆန္ဒထုတ်ဖော်နေရကြောင်း သပိတ်စစ်ကြောင်းတွင် ပါဝင်သည် အသက် ၃၀ကျော် အမျိုးသမီး တဦးက သျှမ်းသံတော်ဆင့်ကို ပြောသည်။
“ သပိတ်အတွက် လူမစုနိုင်အောင် အမျိုးမျိုး ဖိနှိပ်တင်းကြပ်နေတယ်။ ပြောက်ကျားနဲ့ဆိုင်ကယ်သပိတ်တွေအောင်မြင်စွာလုပ်ကြတယ်။ ကျမတို့က ရှောင်၊သူတို့ကလိုက် တူတူပုန်း သပိတ်လိုနဲ့ ၂ရက်တာပြီးသွားတယ်” ဟု ၎င်း အမျိုးသမီး က ဆိုသည်။
လက်ရှိအချိန်ထိ နောင်ချိုလူထုသပိတ်စစ်ကြောင်း ဖြိုခွင်းမခံရသေးကြောင်း၊ စစ်အာဏာရှင် ကျဆုံးရေးအတွက် နည်းမျိုးစုံဖြင့် ဆက်လက် သပိတ်မှောက်သွားမည် ဟုလည်း နောင်ချိုဒေသခံများက ပြောဆိုသည်။
