သျှမ်းပြည်မြောက်ပိုင်းကွတ်ခိုင်မြို့ တွင် စစ်အာဏာရှင် ကိုဆန့်ကျင်ဆန္ဒထုတ်ဖော်သည့်လူထုသပိတ်ကိုယနေ့ (မတ် ၁၂)ရက်မှာ ပထမဆုံးအကြိမ် မျက်ရည်ယိုဗုံးဖြင့်ဖြိုခွင်းခဲ့သော်လည်း ပြည်သူများက ပြောက်ကျားနည်းဖြင့် ဆက်လက်ထုတ်ဖော်ကြကြောင်း သတင်းရရှိသည်။
ယနေ့ (မတ် ၁၂)ရက် မနက်ပိုင်းတွင် ကွတ်ခိုင်မြို့ဈေးအနီးတွင် ဆန္ဒထုတ်ဖော်ရန် လူစုနေစဉ် စစ်ကောင်စီ လက်နက်ကိုင်တပ်ဖွဲ့ က မျက်ရည်ယိုဗုံး အသုံးပြုကာ ဆန္ဒထုတ်သူများကို ဖြိုခွင်းခဲ့သည်။
ထို့နောက် ဆန္ဒထုတ်ဖော်သူများသည် ဆိုင်ကယ်စီးပြီး ပြောက်ကျားနစ်ဖြင့် ဆက်လက်ဆန္ဒထုတ်ဖော်ခဲ့ကြောင်း သိရသည်။
“ မနက်ကတော့ ကျနော်တို့ သပိတ်တောင်မစသေးဘူး ရဲက မျက်ရည်ယိုဗုံးနဲ့ ဖြိုခွင်းတယ်။ ခဏတော့ ဆန္ဒထုတ်ဖော်တာ ရပ်လိုက်ပြီး နောက် ဆိုင်ကယ်နဲ့ ပြောက်ကြားဆန္ဒပြန်ထုတ်ဖော်ကြပါတယ်” ဟု ဆန္ဒထုတ်ဖော်သည့် ကွတ်ခိုင်ပြည်သူတဦးက ပြောသည်။
ကွတ်ခိုင်မြို့ လူထုသပိတ် နေ့စဉ်ဆန္ဒထုတ်ဖော်မှုပြုလုပ်ခဲ့သော်လည်း ယနေ့ သည် ပထမဆုံးအကြိမ် ဖြိုခွင်းခံရကြောင်း လည်း ၎င်းအမျိုးသား က ပြောသည်။
မတ် (၁၀)ရက် ည(၆)နာရီတွင်မွေးဖွားခွင့်ယူထားသည့် ကွတ်ခိုင်မြို့ ပြည်သူ့ဆေးရုံမှ လက်ထောက်ဆရာဝန် ဒေါက်တာဒေါ်ချမ်းမြေ့လင်း ကို စစ်ကောင်စီ က ပုဒ်မ ၅၀၅ (က)ဖြင့် တရားစွဲဆိုကာ လာရောက်ဖမ်းဆီးခေါ်ဆောင် သွားကြောင်းသိရသည်။
Leave a Comments