သျှမ်းပြည်မြောက်ပိုင်း နမ္မတူမြို့နယ် မန်စံကျေးရွာအနီးတွင် တိုင်းရင်းသားအချင်းချင်း တိုက်ပွဲ ဆက်တိုက်ဖြစ်ပွားမှုကြောင့် မန်စံဘုန်ကြီးကျောင်းမှ ဆရာတော်တပါး ကို ကျည်စ ထိမှန်ခဲ့ကြောင်း စုံစမ်းသိရသည်။
ဖေဖော်ဝါရီ ၂၇ ရက် တွင် တိုင်းရင်းသားလက်နက်ဖြစ်ကြသည့် RCSS/SSA နှင့် မြောက်ပိုင်းမဟာမိတ် တပ်ဖွဲ့ဖြစ်သည့် SSPP/SSA နှင့် TNLA ပူးပေါင်းတို့ တိုက်ပွဲဖြစ်ပွားကာ မန်စံဘုရားကျောင်း ကို ကျည်ထိမှန်ခဲ့ပြီး၊ ထိုကျောင်းမှ ကျောင်းထိုင်ဆရာတော် သက်တော် ၈၅၊ ဝါတော် (၄၀) ၏ ညာဘက်ခြေခုံ ကျည်စ ထိမှန်ခဲ့ကြောင်း မန်စံ ဒေသခံ စစ်ရှောင်များကို ကူညီပေးနေသူများက ပြောသည်။
“ ဆရာတော်ခြေထောက်ကို ကျည်ထိသွားတာ။ နည်းနည်းထိသွားတယ်။အခုတော့ လားရှိုးမှာဆေးကုနေတယ်။ မစိုးရိမ်ရပါဘူး” ဟု မန်စံ စစ်ရှောင်များကို ကူညီနေသူ တဦးက သျှမ်းသံတော်ဆင့်ကို ပြောသည်။
တိုက်ပွဲကြောင့် နမ္မတူမြို့နယ် မန်စံကျေးရွာ နှင့် နောင်အော်ကျေးရွာတွင်လည်း လက်နက်ကြီးကျကာ အိမ်မွေးတိရိစ္ဆာန်များ၊ နေအိမ်များလည်း ထိခိုက်ပျက်စီးခဲ့ကြောင်း သိရသည်။
“ မနေ့က ဖြစ်တဲ့တိုက်ပွဲက ကျေးရွာထဲလက်နက်ကြီးကျတာပဲ။ တိရိစ္ဆာန်တွေသေတယ်။ နေအိမ်တွေ မှန်ကွဲတယ်။ တံခါးတွေ၊ ခေါင်မိုးတွေ အပေါက်တွေ ဖြစ်ကုန်တယ်” ဟု မန်စီတွင်နေထိုင်သည့်သူ တဦးက ပြောသည်။
တိုက်ပွဲဖြစ်ပွားသည့် နေရာအနီးတွင်နေထိုင်သည့် ဒေသခံ ပြည်သူ (၁၅၀)ကျော်ထွက်ပြေးတိမ်းရှောင်လာကြကြောင်း သိရသည်
“ စစ်ရှောင်တွေက မိုင်းမုရွာမှာ တချို့ရှိတယ်။ နမ္မတူရွှေမြင်သာဘုန်းကြီးကျောင်းမှာ တချို့ ရှိပါတယ်” ဟု စစ်ဘေးရှောင် ကော်မတီ လုံဘဉာဏ်က ပြောသည်။
လက်ရှိအချိန်ထိ နမ္မတူမြို့နယ်အတွင်း တိုင်းရင်းသားလက်နက်ကိုင် အချင်းချင်း ကြားစစ်ရေး တင်းမာနေဆဲဟု သိရသည်။
