နမ္မတူမြို့နယ် အတွင်း တိုက်ပွဲ ဆက်လက်ဖြစ်ပွား

0

သျှမ်းပြည်မြောက်ပိုင်း နမ္မတူမြို့နယ် မန်စံကျေးရွာ အနီးတွင် ယနေ့ (ဖေဖော်ဝါရီ ၂၆)ရက် မနက် ၇နာရီမှ စတင်ကာ တိုင်းရင်းသားလက်နက်ကိုင် အချင်းချင်း တိုက်ပွဲ ဆက်လက်ဖြစ်ပွားနေကြောင်း စုံစမ်းသိရသည်။

နမ္မတူမြို့နယ်အတွင်း သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော်(RCSS/SSA)နှင့် မြောက်ပိုင်းမဟာမိတ်တပ်ဖွဲ့ ဖြစ်သည့် တအာင်း အမျိုးသားလွတ်မြောက်ရေးတပ်မတော်(TNLA)၊ သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA)တို့ ပူးပေါင်းကာ တိုက်ပွဲဖြစ်ပွားနေကြောင်း စုံစမ်းသိရသည်။

“တိုက်ပွဲသံကတော့ သိပ်မပြင်းထန်ဘူး။ အသံတွေတော့ ကြားနေရတယ်။ နေ့လည်ပိုင်းထိကြားနေရတယ်” ဟု မန်စံဒေသခံ တဦးက သျှမ်းသံတော်ဆင့်ကို ပြောသည်။

တိုက်ပွဲဖြစ်ပွားသည့်နေရာသည် မန်စံကျေးရွာ နှင့် နီးနေသဖြင့် ဒေသခံများက စိုးရိမ်မှုများစွာရှိနေကြောင်း၊ သေနတ်ကျည်များ၊ လက်နက်ကြီးများလည်း မန်စံကျေးရွာအတွင်းသို့ ကျလာကြောင်းလည်း မန်စံဒေသခံ အမျိုးသားက ဆက်လက်ပြောသည်။

“ ကျည်ဆံတွေ ကျလာတယ်။ လူတော့မထိဘူး။နေ့ည ဆက်တိုက်တိုက်ပွဲဖြစ်နေတော့ ကျနော်တို့လည်း စိုးရိမ်နေရတယ်။ ညဆိုရင်လည်း ကောင်းကောင်းမအိပ်ရဲဘူး” ဟု ၎င်းအမျိုးသားက ပြောသည်။

ယမန်(ဖေဖော်ဝါရီ ၂၄)ရက် ည ၈နာရီခွဲဝန်းကျင်တွင် တိုင်းရင်းသားလက်နက်ကိုင် အချင်းချင်း တိုက်ပွဲဖြစ်ပွားမှုကြောင့် မန်စံကျေးရွာရှိ နေအိမ်တလုံးပေါ် လက်နက်ကြီးကျခဲ့ပြီး နေအိမ် ပျက်စီးခဲ့ရကြောင်း သိရသည်။

လက်ရှိမှာ နမ္မတူမြို့နယ် မန်စံအတွင်းတွင် စစ်ရှောင် ၄၀၀ကျော်ရှိပြီး၊ တိုက်ပွဲများ ဆက်လက်ပြင်းထန်နေပါက စစ်ရှောင်များနေထိုင်သည့် မန်စံလည်း အန္တရာယ်ရှိနိုင်ကြောင်းသိရသည်။

မြန်မာနိုင်ငံတဝှမ်းလုံး စစ်အာဏာသိမ်းယူမှုနှင့်ပတ်သက်ပြီး ပြည်သူများက စစ်အာဏာရှင်ကျရှုံးရေးအတွက်ဆန္ဒပြနေချိန်၊ သျှမ်းမြောက်တွင် တိုက်ပွဲများက ဆက်တိုက်ဖြစ်ပွားနေသည်။

Leave a Comments