သျှမ်းတောင် ကျေးသီးမြို့ပြည်သူများ စစ်အာဏာကျဆုံးရေး အတွက်ဆန့်ကျင်ဆန္ဒထုတ်ဖော်ရာတွင် စစ်ကား၊ ရဲကားများက အနှောက်အယှက်ပြုလုပ်သဖြင့် ဒေသခံပြည်သူများ ဆန္ဒထုတ်ဖော်မှုကို ရပ်ဆိုင်းထားရကြောင်း စုံစမ်းသိရသည်။
ဖေဖော်ဝါရီ ၁ရက်နေ့ မနက်ပိုင်းတွင် တပ်မတော် မှ နိုင်ငံတော် အာဏာကို သိမ်းယူလိုက်ကြောင်း ကြေညာပြီးနောက် မြန်မာတဝှမ်းပြည်သူများသည် ယနေ့ထိတိုင် စစ်အာဏာကျဆုံးရေး အတွက် ဆန့်ကျင်ဆန္ဒပြနေကြသည်။
မြန်မာတဝှမ်းနည်းတူ သျှမ်းတောင် ကျေးသီးပြည်သူများလည်း စစ်အာဏာကျဆုံးရေး အတွက် ဖေဖော်ဝါရီ (၁၀)ရက်မှစတင်ကာ ဆန့်ကျင်ဆန္ဒပြလုပ်ခဲ့ရာ ရဲကား၊တပ်ကားများ က အဟန့်အတား အနှောက်အယှက်မျိုးစုံ ပြုလုပ်နေသဖြင့် ပြည်သူများ ဆန္ဒထုတ်ဖော်ရန် ခက်ခဲနေကြောင်း ကျေးသီး ပြည်သူများက ပြောဆိုလိုက်သည်။
“ ကျနော်တို့ ဆန္ဒထုတ်ဖော်တဲ့လမ်းတလျောက် နောက်ကနေ လိုက်တယ်။ ရှေ့ကနေလိုက်တယ်။ သူတို့ အင်အားက နည်းတာမဟုတ်ဘူး။ ကျနော်တို့ လုံခြုံရေးကလည်း စိုးရိမ်ရတော့ ဖေဖော်ဝါရီ ၁၄ရက် ကစပြီး ဆန္ဒထုတ်ဖော်တာ ရပ်လိုက်ရတယ်” ဟု စစ်အာဏာရှင်ကို ဆန့်ကျင်ဆန္ဒထုတ်ဖော်ရာတွင် ပါဝင်သည့် ကျေးသီး လူငယ်တဦးက သျှမ်းသံတော်ဆင့် ကို ပြောသည်။
ထိုနည်းတူ ညပိုင်းတွင်လည်း စစ်အာဏာရှင်ကို ဆန့်ကျင်သည့် သံဗုံးတီး ကိစ္စကိုလည်း ကျေးသီးပြည်သူများက ရပ်နားလိုက်ရကြောင်း သိရသည်။
“ တပ်ကား၊ ရဲကား၊ အချုပ်ကားက ကျနော်တို့ ကျေးသီးမြို့ထဲမှာ ၂၄နာရီနီးပါး ပတ်နေတယ်။ ကျနော်တို့ညဆိုရင်လည်း သံဗုံးမတီးရတော့ဘူး။ ဖေဖော်ဝါရီ ၁၆ရက်က စတယ် သံဗုံးတီးတာလည်း ရပ်လိုက်တယ်။ လုံခြုံရေးကတော့ စိုးရိမ်နေရတယ်” ဟု ၎င်း လူငယ်က ဆိုသည်။
ကျေးသီးမြို့သည် သေးငယ်သည့်မြို့တမြို့ဖြစ်ပြီး၊ စစ်တပ်ဘေးပတ်လည် နေရာယူထားသည့်နေရာတခုလည်းဖြစ်သည်။
သို့သော်လည်း ကျေးသီးလူငယ်များသည် စစ်အာဏာရှင်ကို အခက်အခဲကြားထဲမှာ စစ်အာဏာရှင်ကို ဆန့်ကျင်သည့်စားသားဖြင့် ပုံဖော်ပြီး ဆန္ဒထုတ်ဖော်မှုလည်း ဆက်လက်လုပ်ဆောင်နေကြသည်။
သျှမ်းပြည်မြို့နယ် အများစုတွင် စစ်အာဏာရှင် ကျဆုံးရေးအတွက် ဆန့်ကျင်ဆန္ဒပြသည့် လူငယ်များကို ဖမ်းဆီးထိန်းချုပ်မှုခံနေရပြီး၊ လက်ရှိအချိန်ထိ သတင်းမရသေးသူများစွာရှိနေကြောင်းလည်း သိရသည်။
