ကချင်ပြည် ကျောက်စိမ်းထွက်ရှိရာဒေသ ဖားကန့်မြို့နယ် ဆိပ်မူကျေးရွာ ရှမ်းကုန်းရပ်ကွက် တွင် စစ်အာဏာရှင်ဆန့်ကျင်ဆန္ဒပြရာ၌ ပါဝင်သည့် ပြည်သူများကို စစ်တပ်မှ ဝင်ရောက်ရှာဖွေနေကြကြောင်း စုံစမ်းသိရသည်။
စစ်အာဏာရှင် ကျရှုံးရေးအတွက် ဖားကန့်ဒေသခံ နှင့် ကျောက်အရောင်းအဝယ် လုပ်နေသည့် တိုင်းရင်းသားပေါင်းစုံ တို့သည် နေ့စဉ်နှင့်အမျှ ဆန့်ကျင်ဆန္ဒပြမှုကို ပြုလုပ်နေကြသည်။
ထို့ကြောင့် ယမန်နေ့ ည ၁၁နာရီတွင် ရဲနှင့် စစ်သား ကား (၄)စီး ရောက်လာပြီး ၎င်းနေရာကို ဝင်ရောက် ရှာဖွေကြောင်း ကျောက်အရောင်းအဝယ်လုပ်နေသည့် ပွဲစားတဦးကပြောသည်။
“ လူဝင်ရှာတာလို့ ပြောပြီး ဝင်စစ်တာ။ အချိန်အခါမှ မဟုတ်ပဲ ဘာလို့ ဝင်စစ်တာလဲ။ တယောက်မှတော့ မပါသွားပါဘူး” ဟု ကျောက်အရောင်းအဝယ် ပွဲစား တစ်ဦးကပြောပါတယ်။
ဖားကန့်မြို့ တွင် စစ်အာဏာရှင် ကျရှုံးရေးအတွက် ဆန့်ကျင် ဆန္ဒပြလာသည်မှာ ၁၃ရက်ရှိလာပြီဖြစ်ပြီး၊ ယနေ့လည်း တိုင်းရင်းသားပေါင်းစုံ အင်အား ၃သောင်း ခန့် ဆက်လက် ဆန့်ကျင်ဆန္ဒပြနေကြောင်း သတင်းရရှိသည်။