သျှမ်းပြည်မြောက်ပိုင်း သိန္နီ-ကွမ်လုံ ကြား တွင် ဖြစ်ပွားသည့် တိုက်ပွဲကြောင့် အရပ်သား (၆)ဦးသေဆုံးကာ ကျည်ထိမှန်သူများလည်း ရှိကြောင်း စုံစမ်းသိရသည်။
ဖေဖော်ဝါရီလ ၅ ရက် ယနေ့မွန်းလွဲ ၂နာရီခွဲ ဝန်းကျင်တွင် သိန္နီမြို့နယ် နမ့်စလပ်ကျေးရွာ နှင့် နားတီးကျေးရွာ ကြားတိုက်ပွဲဖြစ်ပွားပြီး အရပ်သား ၆ဦး ကျည်ထိမှန်သေဆုံးသွားသည်။၊ ထိုထဲတွင် အမျိုးသမီး တဦးပါရှိသည်ဟု အမည်မဖေါ်လိုသည့် နမ့်စလပ်ဒေသခံ အမျိုးသားတဦးက သျှမ်းသံတော်ဆင့်ကို ပြောသည်။
“ တိုက်ပွဲမှာ သေဆုံးတာက (၆)ဦးပါ။ အခု နမ့်စလပ်ဆေးရုံရဲ့ ရင်ခွဲရုံမှာ (၄)လောင်း၊ ဖာဆန်ရွာကို အလောင်း (၁)လောင်းပို့တယ်။ နောက်တလောင်းက လားရှိုးကိုပို့လိုက်ပါပြီ၊ ကျနော်သိထားတဲ့ ကျည်ထိမှန်တဲ့သူတယောက်ကတော့ ကွမ်လုံပြန်သွားတယ်။” ဟု အမည်မဖော်လိုသူ အမျိုးသားက အတည်ပြု ပြောဆိုလိုက်သည်။
အဆိုပါတိုက်ပွဲတွင် အရပ်သား ကား ၄စီးပစ်ခံရပြီး၊ ကျည်ထိမှန်သူဦးရေ မည်မျှရှိနေသည်ကို စာရင်းအတိအကျ မသိရှိသေးပေ။
“ကျနော်သိရသလောက် အရပ်သား ကား(၄)စီးပစ်ခံရတယ်။ ကားသမားတဦး ထိလို့ လားရှိုးမှာ ဆေးကုနေတယ်” ဟု လားရှိုးဒေသခံ စိုင်းဟန် က ပြောသည်။
ထိုတိုက်ပွဲကြား သေဆုံးသူအားလုံးသည် အရပ်သားများဖြစ်သည် ဟု ယူဆနိုင်ကြောင်း၊ မည်သည့် လက်နက်ကိုင်တပ်ဖွဲ့နှင့်ဖြစ်ပွားသည်ကို မသိရှိသေးကြောင်း ၎င်းက ပြောသည်။
“ ကျနော်အနေနဲ့ကတော့ အရပ်သားတွေလို့ ယူဆတယ်။ သေချာတော့ ပြောလို့မရဘူး”ဟု အထက်ပါ ပုဂ္ဂိုလ်က ဆိုသည်။
ဖေဖော်ဝါရီ ၁ ရက် မနက်ပိုင်းတွင် တပ်မတော်မှ နိုင်ငံတော်၏ အာဏာကို သိမ်းပြီးနောက် တပ်မတော်ကာ ကွယ်ရေး ဦးစီးချုပ်ရုံးမှ အစိုးရ အဖွဲ့ဝင်အသီးသီး ၊ဝန်ကြီးဌာနများနှင့် ကိုယ်ပိုင်အုပ်ချုပ်ခွင့်ရ ဥက္ကဌ နှင့်အဖွဲ့ဝင်များကို လျင်မြန်စွာ ဖွဲ့စည်းခဲ့သည်။
ကိုးကန့်ကိုယ်ပိုင်အုပ်ချုပ်ခွင့်ရ အဖွဲ့ယာဉ်တန်း ကို မြောက်ပိုင်းမဟာမိတ် တပ်ဖွဲ့ဝင်ဖြစ်သည့် (MNDAA) က အလစ်တိုက်ခတ်ကာ ခဲ့သည်ဟု စုံစမ်းသိရသည်။
တပ်မတော် နှင့် မြောက်ပိုင်း မဟာမိတ် တပ်ဖွဲ့ သည့် လက်ရှိအချိန်မှာ တဖက်သတ်ကိုယ်စီ အပစ်ရပ်ထားသည့် ကာလဖြစ်သည်။
“ ကျနော်အထင်တော့ ဒါက အစဖြစ်တဲ့တိုက်ပွဲပဲ။ နောက်ထပ်ပြီးဆက်ဖြစ်လာနိုင်တယ်။ ဆက်ဖြစ်လာမယ်လို့ ထင်တယ်။ စိုးရိမ်မှုကတော့ရှိနေတာပေါ့” ဟု နားတီး ကျေးရွာတွင်နေထိုင်သည့် သူက ပြောသည်။
တိုက်ပွဲသတင်း အသေးစိတ် အချက်အလက်ကို ဆက်လက်စုံစမ်းနေဆဲ။
ယခု တိုက်ပွဲဖြစ်ပွားသည့်နေရာသည် သိန္နီမြို့ နှင့် မိုင် ၃၀ ခန့် ကွာဝေးကြောင်း၊ ထိုနေရာတွင် လက်နက်ကိုင် ပေါင်းစုံ လှုပ်ရှားသည့်နေရာ ဖြစ်ကြောင်းသိရသည်။
Leave a Comments