စစ်အာဏာသိမ်းပြီး ၅ ရက်မြောက်နေ့တွင် မြန်မာနိုင်ငံတဝှမ်းရှိ အစိုးရဝန်ထမ်းများ ဖဲကြိုးနီ Red Ribbon Campaign ပြုလုပ်ကာ စစ်အာဏာရှင်ကို ဆန့်ကျင် ဆန္ဒပြမှုများ တရက်ထက် တရက် ပိုမိုများလာသည်။

တပ်မတော်သည် ဖေဖော်ဝါရီ ၁ရက် မနက်မှ စတင်ကာ နိုင်ငံတော် မှ အာဏာကို သိမ်းယူခဲ့ပြီး၊ သက်ဆိုင်ရာ အစိုးရ ဌာနအတွက် ဝန်ကြီးများကိုလည်း တပ်မတော်ကာကွယ်ရေး ဦးစီးချုပ်ရုံးမှ အသစ်ခန့်အပ်လိုက်သည်။

တပ်မတော် ကာကွယ်ရေး ဦးစီးဌာနချုပ်ရုံး စစ်တပ်လက်အောက်တွင် အလုပ်မလုပ်လိုသည့်အတွက် အစိုးရ ဝန်ထမ်းများ က ကန့်ကွက်ဆန္ဒပြမှုများ ပြုလုပ်လာသကဲ့သို့ လူမှုကွန်ရက်စာမျက်နှာတွင်လည်း ပြည်သူလူထုက စစ်အာဏာရှင်ကို ဆန့်ကျင်ကန့်ကွက်ကြောင်း နည်းမျိုးစုံ ဆန္ဒထုတ်ဖော်နေကြသည်။

ယနေ့ ထူးခြားသည့်မှာ အမှတ်(၉၀၃) စစ်မြေပြင်အင်ဂျင်နီယာတပ်ရင်း၊ အမှတ်(၂) တပ်ရင်း မှ တပ်ခွဲမှူး၊ တပ်စိတ်မှူး၊ ဗျူဟာမှူး၊ တပ်သားနှင့် တပ်မိသားစုဝင်များလည်း စစ်အာဏာသိမ်းသည့် ကိစ္စနှင့် ပတ်သက်ပြီး အပြင်းအထန်ရှုံ့ချကြောင်း ကြေညာချက် ထုတ်လာသည်။

“ ကျနော်တို့ကတော့ နည်းမျိုးစုံနဲ့ စစ်အာဏာရှင်ကို ကန့်ကွက်သွားပါမယ်။ စစ်အာဏာရှင်လက်အောက်မှာလည်း အလုပ်မလုပ်လိုဘူး။ ကျနော်တို့ တင်မြှောက်ထားတဲ့ အစိုးရရှိပါတယ်” ဟု အမည်မဖော်လိုသည့် သျှမ်း/တောင် မှ ကျောင်းဆရာ တဦး က ပြောသည်။

အစိုးရဝန်ထမ်းများသည် စစ်အာဏာရှင် လက်အောက်တွင် အလုပ်မလုပ်လိုတော့သဖြင့် အလုပ်များ ရပ်နားသွားမည်ဖြစ်ကြောင်းလည်း သိရသည်။

“ ကျမတို့ ကတော့ အလုပ်ဆက်မလုပ်တော့ဘူး။ စစ်အာဏာရှင် အောက်မှာကို မလုပ်တာ။ ဘယ်လိုပဲဖြစ်ဖြစ် ကျမတို့ ဆက်ပြီး ဆန့်ကျင်သွားမယ်” ဟု ကျောင်းဆရာမ တဦးကလည်း ပြောသည်။

သျှမ်းပြည်နယ် တောင်ကြီး လားရှိုး တာချီလိတ်မြို့များအပါအဝင် မြန်မာပြည်အနှံ့ မြို့ကြီးများတွင် ည ၈ နာရီအချိန် မိမိနေအိမ်အတွင်းနေပြီး အိုး စလောင်းများတီးထုသည့်အသံဖြင့် စစ်အာဏာရှင်စနစ်အလိုမရှိကြောင်း ဆန္ဒထုတ်ဖော်မှုများလည်း ပြုလုပ်လာကြသည်။

ထိုသို့ နေအိမ်အတွင်းမှနေ ၍ ငြိမ်းချမ်းစွာဆန္ဒထုတ်ဖော်နေမှုကိုလည်း ယမန်နေ့ည ဖေဖော်ဝါရီ ၄ ရက်က တချို့မြို့ကြီးများတွင် ရဲနှင့်စစ်တပ်ကဝင်ရောက်ဖမ်းဆီးနေသည်များလည်း လူမှုကွန်ရက်တွင် တွေ့ရသည်။

လူမှုကွန်ရက်ပေါ်တွင် စစ်အာဏာသိမ်းသည့်ကိစ္စနှင့် ပတ်သက်ပြီး ဆန့်ကျင်ကန့်ကွက်ကြောင်း ကမ်ပိန်းမျိုးစုံ ပြုလုပ်ခြင်းကြောင်း လူမှုကွန်ရက်ကို ယာယီပိတ်ဆိုင်းထားရန် အာဏာသိမ်း စစ်အစိုးရ က ညွှန်ကြားခဲ့သည်။