သျှမ်းပြည် တောင်ပိုင်းတွင် ဆေးကုသနေသည့် ကိုဗစ်-၁၉ လူနာ ၃၆ဦး ကျန်းရှိကာ ကိုဗစ်ကူးစက်မှုနှုန်း လျော့ကျလာသဖြင့် စစ်ဆေးရေးဂိတ် တချို့ပိတ်သိမ်းလိုက်ကြောင်း စုံစမ်းသိရသည်။
“ သျှမ်းတောင်မှာတော့ ကိုဗစ်လူနာ စုစုပေါင်း ၃၆ဦးကျန်တယ်။ တောင်ကြီးမှာတော့ ၃ဦးကျန်သေးတယ်” ဟု သျှမ်းပြည် ပြည်သူ့ကျန်းမာရေး ဦးစီးဌာန လက်ထောက် ညွှန်ကြားရေးမှူး ဒေါက်တာ ဇဝနကို က သျှမ်းသံတော်ဆင့်ကို ပြောသည်။
မြန်မာတဝှမ်း ကိုဗစ်-၁၉ ကူးစက်မှုနှုန်းလျော့ကျလာသဖြင့် တချို့ ကိုဗစ်-၁၉ စစ်ဆေးရေးဂိတ်များ ပိတ်သိမ်းလိုက်ကြောင်းလည်း သိရသည်။
ယမန်နေ့ (ဖေဖော်ဝါရီ ၃)ရက် ည ၈နာရီ တွင် ကျန်းမာရေး နှင့် အားကစားဝန်ကြီးဌာန ထုတ်ပြန်ျက် အရ ကိုဗစ်-၁၉ လူနာသစ် စုစုပေါင်း (၂၆၃) ဦးရှိပြီး၊ သေဆုံး (၁၄)ဦး ရှိကြောင်း သိရသည်။
လက်ရှိ တောင်ကြီး-ဟိုပုံးလမ်းမပေါ်ရှိ ကိုဗစ်-၁၉ စစ်ဆေးဂိတ်ကို ဖေဖော်ဝါရီ (၃)ရက် ညနေ ၄နာရီတွင် ပိတ်သိမ်းလိုက်ပြီ ဖြစ်ကြောင်းလည်း ဒေါက်တာ ဇဝနကို ကပြောသည်။
“ တောင်ကြီး-ဟိုပုံး မှာရှိတဲ့ ကိုဗစ် စစ်ဆေးရေးဂိတ်ဘာကြောင့်ပိတ်လဲဆိုတော့ မြို့နယ် က မလိုအပ်တော့ဘူးလို့ ယူဆလို့ပါ။ တောင်လေးလုံးဂိတ်တော့ ရှိပါသေးတယ်” ဟု ဒေါက်တာ ဇဝန ကို က ဆိုသည်။
ယခုရက်ပိုင်း ကိုဗစ်-၁၉ ကူးစက်မှုနှုန်းကျဆင်းလာသော်လည်း ပြည်သူများအနေဖြင့် မပေါ့ဆရန်၊ အပြင်ထွက်တိုင်းလည်း Mask (နှာခေါင်းစည်း) တပ်ရန်လိုအပ်ကြောင်းလည်း ဆရာဝန်များကပြောသည်။
လွန်ခဲ့သည့် ဇန်နဝါရီ ၂၇ရက်တွင် ကျန်းမာရေး နှင့် အားကစားဝန်ကြီးလက်အောက်ရှိ ကျန်းမာရေး ဝန်ထမ်းများကို ပထမ အကြိမ် အဖြစ် ကိုဗစ်-၁၉ ကာကွယ်ဆေး ထိုးပေးခဲ့ပြီး၊ ယခု ဒုတိယအကြိမ်အဖြစ် ဆက်ထိုးရန် အတွက် မည်ကဲ့သို့ ပြန်လည် စီမံထားသည်ကို အသေးစိတ်မသိရှိရသေးပေ။
ထို့အပြင် ယခင်တွင် ဖေဖော်ဝါရီ (၅)ရက်တွင် ကိုဗစ်-၁၉ ကာကွယ်ဆေး ထပ်မံ ရောက်ရှိလာမည် ဟု သတင်းထွက်ပေါ်လာပြီး၊ ဖေဖော်ဝါရီ (၅)ရက်ရောက်မည့် ကိုယ်ဗစ်-၁၉ ကာကွယ်ဆေးသည် သျှမ်းပြည်လွှတ်တော် တက်မယ့် လွှတ်တော်ကိုယ်စားလှယ်များထိုးပေးရန် စီစဉ်ထားခဲ့သည်။
သို့သော်လက်ရှိမှာ တပ်မတော် မှ နိုင်ငံတော်၏ အာဏာကို ဖေဖော်ဝါရီ ၁ရက် မနက်တွင် သိမ်းလိုက်သည့်အတွက် လွှတ်တော်ကျင်းပတော့မည် မဟုတ်သဖြင့် လွှတ်တော်ကိုယ်စားလှယ်များ ကို ထိုးပေးမည့် ကိုဗစ်-၁၉ ကာကွယ်ရေး အစီအစဉ်လည်း မည်ကဲ့သို့ စီမံထားသည်ကို မသိကြောင်း ဆရာဝန်များက ပြောသည်။
“အစက ဖေဖော်ဝါရီ (၅)ရက်မှာ ကိုဗစ်ကာကွယ်ဆေး ထပ်ရောက်ဖို့ရှိတယ်။ ဒါပေမယ့် အခုထိတော့ ကိုဗစ် ကာကွယ်ဆေးတွေ ထပ်မရောက်သေးဘူး” ဟု ဒေါက်တာ ဇဝနကို က ပြောသည်။
