ဒီမိုကရေစီ အရပ်သားအစိုးရထံ တပ်မတော် က အာဏာသိမ်းယူခြင်းကြောင့် ငြိမ်းချမ်းရေးလုပ်ငန်းစဉ် ထိခိုက်သွား နိုင်ကြောင်း RCSS/SSA က ထုတ်ပြန်ကြေညာလိုက်သည်။
ယနေ့ (ဖေဖော်ဝါရီ ၁)ရက် မနက်ပိုင်းတွင် မြန်မာ့တပ်မတော်က ဒီမိုကရေစီ အရပ်သားအစိုးရထံ မှ အာဏာသိမ်းယူပြီး အရေးပေါ် အခြေအနေ ကြေညာလိုက်ခြင်းသည် ယုံကြည်မှု တည်ဆောက်ခြင်းနှင့် ငြိမ်းချမ်းရေး လုပ်ငန်းစဉ်အား ထိခိုက်စေပြီး ဒီမိုကရေစီ နှင့် ဆန့်ကျင်သောကြောင့် သျှမ်းပြည် ပြန်လည်ထူထောင်ရေးကောင်စီ (RCSS/SSA)အနေဖြင် အာဏာသိမ်းခြင်းကို ကန့်ကွတ်ကြောင်း ယနေ့ရက်စွဲဖြင့် ထုတ်ပြန်ကြေညာလိုက်သည်။
RCSSသည် ဖက်ဒရယ်နှင့် ဒီမိုကရေစီ အတွက် ပြည်သူ့လူထု တရပ်လုံးနှင့် အတူတကွ ရပ်တည်ပြီး ကြိုးပမ်းဆောင်ရွက် သွားမည်ဖြစ်ကြောင်း ထုတ်ပြန်ချက်တွင်ရေးသားထားသည်။
ထို့အပြင် အစိုးရ၊ လွှတ်တော်၊တပ်မတော် ၊နိုင်ငံရေးပါတီ၊ တိုင်းရင်းသားလက်နက်ကိုင် အဖွဲ့အစည်းများ ပါဝင်အကောင်အထည်ဖော်ဆောင်ရွက်နေသော တနိုင်ငံလုံး ပစ်ခတ်တိုက်ခတ်မှု ရပ်စဲရေး သဘောတူစာချုပ်(NCA)နှင့် ငြိမ်းချမ်းရေး လုပ်ငန်းစဉ် တို့သည် အာဏာသိမ်းခြင်းကြောင့် ရပ်ဆိုင်းသွားနိုင်ကြောင်း RCSS/SSA ကြေညာချက်တွင် ဖော်ပြထားသည်။
ဆက်လက်ပြီး အာဏာသိမ်းခြင်းအပြီး ဖြစ်ပေါ်လာသော နိုင်ငံရေး အကျပ်အတည်းကို ကျော်လွှားနိုင်ရေး အတွက် သက်ဆိုင်ရာ အဖွဲ့အစည်းအသီးသီးတို့က တွေ့ဆုံ ဆွေးနွေးညှိနှိုင်းကြပြီး ငြိမ်းချမ်းစွာ ဖြေရှင်းကြပါရန်လည်း RCSS ကတိုက်တွန်းပြောဆိုထားသည်။
၂၀၂၀ အထွေထွေရွေးကောက်ပွဲ မဲစာရင်းများစိစစ်အတည်ပြုရန် နှင့် လိုအပ်သည့် အရေးယူဆောင်ရွက်မှုများပြုလုပ်ရန် အတွက် ၂၀၀၈ ဖွဲ့စည်းပုံ အခြေခံဥပဒေ ပုဒ်မ ၄၁၈ ပုဒ်မခွဲ(က) အရ နိုင်ငံတော်၏ ဥပဒေပြုအုပ်ချုပ်ရေး နှင့် တရားစီရင်းရေး အာဏာများကို တပ်မတော် ကာကွယ်ရး ဦးစီးချုပ်ထံသို့ လွှဲပြောင်းတာဝန်ပေးလိုက်ကြောင်း ယနေ့(ဖေဖော်ဝါရီ ၁)ရက် တပ်မတော်ပိုင် မြဝတီ သတင်းဌာန က ကြေညာလိုက်သည်။
အရေးပေါ်အခြေအနေ အဖြစ် ဖွဲ့စည်းပုံ အခြေခံဥပဒေ ပုဒ်မ(၄၁၇)အရ အမိန့်ထုတ်လိုက်ပြီး၊ အရေးပေါ် အခြေအနေ ကို မြန်မာနိုင်ငံတဝှမ်း အကျိုးသက်ရောက်ကြောင်း ထုတ်ပြန်ကြေညာခဲ့သည်။
