သျှမ်းပြည် တောင်ပိုင်း တောင်ကြီးမြို့တွင်ရှိ ကျန်းမာရေးဝန်ထမ်းများ ၉၀၀ ကျော်ကို ယနေ့ (ဇန်နဝါရီ ၂၈ ရက်) တွင် COVID-19 ကာကွယ်ဆေးကို စတင်ထိုးနှံပေးနေကြောင်း စုံစမ်းသိရှိရသည်။
ထိုကာကွယ်ဆေးကို တောင်ကြီးမြို့ စဝ်စံထွန်းဆေးရုံကြီး နှင့် ကလေးနှင့်မိခင် ဆေးရုံတို့တွင် ထိုးပေးကြောင်းသိရသည်။
“ ဒီနေ့စတင်ထိုးပေးတာပေါ့။ကျန်းမားရေး နဲ့ အားကစား ဝန်ကြီးဌာနရဲ့ အောက်မှာရှိတဲ့ ကျန်းမားရေးဝန်းထမ်းတွေကို ထိုးပေးတာပါ။ စဝ်စံထွန်းဆေးရုံးက ဝန်ထမ်းတွေက ၆၀၀ ကျော်နဲ့ ကလေးနှင့် မိခင်ဆေးရုံက ၃၀၀ ကျော်ရှိတယ်။ တလုံးကို လူ ၁၀ ယောက်လောက်ထိုးလို့ရတယ်” ဟု သျှမ်းပြည်နယ်ကုသရေးနှင့် ပြည်သူ့ကျန်းမာရေး ဦးစီးဌာနမှူး ဒေါက်တာသူဇာချစ်တင်က ပြောသည်။
ထိုကာကွယ်ဆေးကို ထိုးရန်အတွက် အုပ်စု ၂၀ ခွဲထားကြောင်း၊ လက်ရှိမှာ စာရင်းများ ကောက်ယူလျက်ရှိကြောင်း နှင့် ထိုးနှံပေးမည့် အုပ်စုကို ဗဟိုမှ ရွေးချယ်ဆုံးဖြတ်ကြောင်းလည်း ဒေါက်တာ သူဇာချစ်တင် က ပြောသည်။
သျှမ်းပြည်တောင်ပိုင်းတွင် ယမန့်နေက ပထမအသုတ်အနေဖြင့် ကိုဗစ်- ၁၉ ကာကွယ်ဆေး အလုံး ၅၆၄ လုံးရောက်ရှိလာပြီး၊ တလုံးလျှင် ၁၀ ဦးနှုန်း ထိုးနိုင်သဖြင့် လူ ၅၆၀၀ ကျော်အတွက် ရရှိပြီး ဖြစ်ကြောင်းသိရသည်။
ဒုတိယအသုတ်အနေဖြင့် ဖေဖော်ဝါရီ ၅ ရက်တွင်ထပ်မံရောက်ရှိလာမည်ဖြစ်ပြီး၊ သျှမ်းပြည်နယ် အစိုးရအဖွဲ့ ပြည်နယ်ဝန်ကြီးချုပ် နှင့် ဝန်ကြီးများ၊ လွှတ်တော်ကိုယ်စားလှယ်များကို ဦးစားပေးထိုးပေးသွားမည် ဟု စုံစမ်းသိရသည်။
ကိုဗစ်- ၁၉ ကာကွယ်ဆေးကို ကိုယ်ဝန်ဆောင်မိခင်၊ နို့တိုက်မိခင်၊ အသက် ၁၈ နှစ်မပြည့်သေးသူ၊ ခုခံအားကျဆင်းရောဂါ နှင့် ဆေးဝါတစ်ခုခု ကိုသုံးစွဲနေရသူများ အနေဖြင့် ယခုကာကွယ်ဆေးကို မထိုးသင့်ကြောင့် သိရသည်။
