အထွေထွေ ရွေးကောက်ပွဲ စတင်ကျင်းပတဲ့နေရက်မှ ရက် ၉၀ အတွင်းမှာ လွှတ်တော် ပြန်လည် ခေါ်ယူကျင်းပရမယ့်လို့ ဖွဲ့စည်းပုံ အခြေခံ ဥပဒေ ပုဒ်မ ၁၂၃ မှာ ပြဌာန်းထားပါတယ်။
ထိုပြဌာန်းချက်နဲ့ အညီ တတိယ အကြိမ် လွှတ်တော်ကို လာမယ့် ရှေ့လဆန်းမှာ ကျင်းပမှာဖြစ်ပြီး၊ အနိုင်ရ လွှတ်တော်ကိုယ်စားလှယ်တွေကလည်း လွှတ်တော်တက်ရောက်ရန် အဆင်သင့် ဖြစ်နေကြပါပြီ။
သို့ပေမယ့် ယနေ့ အချိန်ထိ တပ်မတော် သတင်းပြန်ကြားရေးဌာနကလည်း ၂၀၂၀ ပြည့်နှစ် နိုဝင်ဘာ ၈ ရက်က ကျင်းပခဲ့တဲ့ ရွေးကောက်ပွဲရလဒ်ဟာ မဲသမာမှုဖြစ်နေခြင်း၊ မဲစာရင်းမှားယွင်း နေခြင်းဆိုတဲ့အချက်အလက်တွေ နေ့စဉ်နဲ့အမျှ လူမှုကွန်ရက် စာမျက်နှာတွင် ဖော်ပြနေပါတယ်။
ပြည်ထောင်စု ကြံ့ခိုင်ရေး နှင့် ဖွံ့ဖြိုးရေးပါတီ က တနိုင်ငံလုံးရှိ မြို့နယ် အားလုံးကို စိစစ်ခဲ့ရာ တနိုင်ငံလုံးမဲမသမှုဖြစ်ပေါ်ခဲ့ကြောင်းလည်း ပြောဆိုခဲ့ပါတယ်။
အလားတူ ရှမ်းတိုင်းရင်းသားများ ဒီမိုကရက်တစ်ပါတီ (ကျားဖြူပါတီ)ကလည်း တတိယအကြိမ် ပါတီစုံ အထွေထွေ ရွေးကောက်ပွဲ ဟာ လွတ်လပ်ပြီး တရားမျှတတဲ့ အထွေထွေရွေးကောက်ပွဲ ကို ဖော်ဆောင်နိုင်ခဲ့ခြင်း မရှိကြောင်း စိတ်မကောင်းကြောင်း၊ ရွေးကောက်ပွဲပြီးမြောက်ပြီး မဲရလဒ်ကြေညာရာ မဲပေးနိုင်တဲ့သူ ဦးရေးထက် မဲအရေအတွက် သန်းချီရှိနေတယ် ဆိုတဲ့ ထုတ်ပြန်ချက်ကို ဇန်နဝါရီ ၂၄ ရက်မှာ ထုတ်ပြန်ခဲ့ပါတယ်။
တပ်ဘက်က နေ့စဉ်ဆက်တိုက် တင်လာတဲ့ ရွေးကောက်ပွဲ ရလဒ် မမှန်မကန် စာရင်းဟာ အလွန်များနေတာကိုတွေ့ရပြီး၊ နိုဝင်ဘာ ၈ရက် ကျင်းပခဲ့တဲ့ ရွေးကောက်ပွဲ ရလဒ်ကို တပ်မတော် အနေနဲ့ အသိအမှတ် မပြုလိုတဲ့သဘောဖြစ်နေကြောင်း လည်း နိုင်ငံရေး အသိုင်းအဝန်းက ပြောဆိုလိုကပါတယ်။
လက်ရှိရွေးကောက်ပွဲ ရလဒ်နဲ့ အနိုင်ရတဲ့ ကိုယ်စားလှယ်တွေ၊ အစိုးရအဖွဲ့ဝင်တွေဖြစ်လာမယ့် သူတွေဟာ မှားယွင်းတဲ့အချက်အလက်၊ မမှန်ကန်တဲ့အနေအထားနဲ့ ဖြစ်လာတယ်ဆိုတဲ့ တိုက်ခိုက်လိုတဲ့ပုံစံဖြစ်နေကြောင်းလည်း နိုင်ငံရေးလုပ်ဆောင်သူတွေက ထောက်ပြ ပြောဆိုလိုက်ပါတယ်။
လက်ရှိ တပ်မတော် မဲရလဒ်ထုတ်ပြန်ချက်နဲ့ ပတ်သတ်ပြီး လွှတ်တော်သက်တမ်း (၃)ကြိမ် အနိုင်ရတဲ့ ရှမ်းတိုင်းရင်းသားများ ဒီမိုကရေစီ အဖွဲ့ချုပ် (SNLD)မှ စိုင်းသီဟကျော် က “တပ်မတော်အနေနဲ့ သူ့ဆန္ဒအမှန်ကို ရှင်းရှင်းလင်းလင်းပြတ်ပြတ်သားသား သူဘာဖြစ်ချင်လဲဆိုတာကို ဖော်ပြသင့်တယ်လို့ ထင်ပါတယ်” ပြောပါတယ်။
တပ်မတော်ကာကွယ်ရေး ဦးစီးချုပ်ဟာ လွန်ခဲ့တဲ့ ဇန်နဝါရီ ၁၂ ရက်မှာ တရုတ် ပြည်သူ့သမ္မတနိုင်ငံ နိုင်ငံတော် ကောင်စီဝင်နှင့် နိုင်ငံခြားရေးဝန်ကြီး ဝမ်ယိ တို့တွေ့ဆုံစဉ်မှာလည်း ရွေးကောက်ပွဲ မဲစာရင်း စိစစ်ချက်နဲ့ ပတ်သက်ပြီး အမှားအယွင်း၊ မဲမသမာမှုတွေရှိနေတယ်ဆိုတာ ပြောဆိုခဲ့ပါတယ်။
ဒါ့အပြင် တပ်မတော်မှ ထုတ်ပြန်ဆောင်ရွက်လျက်ရှိတဲ့ အခြေအနေတွေနဲ့ စည်းကမ်း၊ ဥပဒေတွေအတိုင်း ဆက်လက် ဆောင်ရွက်သွားမယ်လို့ တပ်မတော် ကာကွယ်ရေး ဦးစီးချုပ်က ပြောဆိုခဲ့ပါတယ်။
တပ်မတော် အနေနဲ့မဲစာရင်းတွေကို အချိန်ယူ စိစစ်ပြီး တွေ့ရှိချက်တွေ ထုတ်ပြန်နေခြင်းဟာ လွတ်လပ်ပြီး တရားမျှတပြီး ပွင့်လင်းမြင်သာတဲ့ ရွေးကောက်ပွဲရလဒ်ကို သံသယကင်းရှင်းမှုကို အသိအမှတ်ပြုလိုခြင်းသာဖြစ်ကြောင်း ဇန်နဝါရီ ၂၀ ရက်စွဲ ဖြင့် တပ်မတော် ထုတ်ပြန်ချက် မှာရေးသားထားပါတယ်။
ထိုကဲ့သို့ ထုတ်ပြန်ရခြင်းဟာ မည့်သည့် အဖွဲ့အစည်း၊ မည်သည့်ပုဂ္ဂိုလ် ကိုမျှ ထိခိုက်စေလိုတဲ့ ရည်ရွယ်ချက် ဖြင့် ထုတ်ခြင်း မဟုတ်ကြောင်း၊ ပြည်ထောင်စု ရွေးကောက်ပွဲကော်မရှင် မှား၊ မှန်ကို ဖြေရှင်းပေးရန် သာ ရည်ရွယ်ခြင်းဖြစ်ကြောင်း လည်း တပ်မတော်ရဲ့ ထုတ်ပြန်ချက်မှာ ရေးသားဖော်ပြပါတယ်။
ယခုရွေးကောက်ပွဲကျင်းပပြီး တတိယအကြိမ်လွှတ်တော်ခေါ်ယူခါနီးမှ မဲစာရင်း မမှန်မကန်ဖြစ်တဲ့ အကြောင်း၊ တရားမျှတမှုမရှိကြောင်းပြောဆိုမှုတွေဟာ ပြည်ထောင်စု ရွေးကောက်ပွဲ ကော်မရှင်ကို အကျပ်အတည်းဖြစ်စေပါတယ်။
“ တပ်မတော်ဘက်က ထုတ်ပြန်ထားတဲ့ မဲစားရင်တွေလည်း ရှိတော့ ပြန်လည်စိစစ်ဖို့လိုတယ်။ ဖြေရှင်းပြီးမှ ပဲ လွှတ်တော် ခေါ်ယူရေး လုပ်ငန်းစဉ် ဆောင်ရွက်ပေးဖို့ ထုတ်ပြန်ချက် ထုတ်ရတာပါ” လို့ SNDP ရဲ့ အထွေထွေအတွင်းရေးမှူး စိုင်းဖိုးအောင်က ဆိုပါတယ်။
နိုင်ငံတော်နှင့် နိုင်ငံသားတွေရဲ့ အကျိုးစီးပွားကို ရှေးရှုပြီး နိုင်ငံရေး အကျပ်အတည်းကို ကျော်လွှားနိုင်စေဖို့ ပြည်ထောင်စု လွှတ်တော်က လည်းကောင်း ၊ နိုင်ငံတော် အစိုးရက လည်းကောင်း ပြည်ထောင်စုရွေးကောက်ပွဲ ကော်မရှင်ကတွေ နည်းလမ်းရှာဖွေဖြေရှင်းပေးရန်လည်း တပ်မတော်က သဘောထားထုတ်ပြန်လိုက်ပါတယ်။
ရွေးကောက်ပွဲ ကို ပြန်လည်ကျင်းပဖို့တော့ အလားအလာ မရှိပါဘူး။
“ ဒီမြန်မာနိုင်ငံရေးကို ပိုပြီးရှုပ်ထွေးသွားစေပြီး တိုင်းပြည် မငြိမ်မသက်ဖြစ်မှာကိုပဲ ကျနော်တို့က ပိုပြီး စိုးရိမ်ပူပန်မိပါတယ်။ အဲ့တော့ ဖြစ်သင့်တဲ့အနေအထား က ကျတော့ တပ်မတော်က ဘာတွေ အမှန်ဆန္ဒရှိလဲ။ ဘာတွေပြန်လုပ်ပေးလို့ရလဲ။ ဖြစ်နိုင်တဲ့အခြေအနေပေါ်မှာ အနိုင်ရခဲ့တဲ့ အမျိုးသားဒီမိုကရေစီ အဖွဲ့ချုပ်နဲ့ စေ့စပ်ဆွေးနွေးတာ ဆောင်ရွက်သင့်တယ်” လို့ စိုင်းသီဟကျော် က ထောက်ပြ ပြောဆိုလိုက်ပါတယ်။
တဖက်ကလည်း ရွေးကောက်ပွဲရလဒ် အများစု အနိုင်ရရှိခဲ့တဲ့ အမျိုးသား ဒီမိုကရေစီ အဖွဲ့ချုပ်အနေနဲ့ လက်ရှိ ဆောင်ရွက်နေတဲ့ အမျိုးသားပြန်လည်ရင်ကြားစေ့ရေး၊ ဒါမှ မဟုတ် အမျိုးသားညီညွတ်ရေး အစိုးရ ဖွဲ့စည်းရေးမှာ လည်း တပ်မတော် ကို ပြစ်ပယ်ထားလို့ မရကြောင်း လည်း စိုင်းသီဟကျော် က ပြောပါတယ်။
နိုင်ငံရေး ကိစ္စရပ်တွေဖြစ်နေတဲ့အတွက် ကြောင့် တဖက်နဲ့ တဖက် ပွင့်လင်းနဲ့ စေ့စပ်ညှိနှိုင်းသွား မှ သာလျှင် တိုင်းပြည်သားအတွက် ရလဒ်ကောင်းဖြစ်မယ်လို့လည်း စိုင်းသီဟကျော်က မှတ်ချက်ပြုလိုက်ပါတယ်။
တဖက်မှာလည်း ရွေးကောက်ပွဲရလဒ် မဲသမမှု၊ မဲမှားယွင်းမှုကိစ္စ နဲ့ပတ်သက်ပြီး “ တပ်မတော် ”ထောက်ခံဆန္ဒထုတ်ဖော်ပွဲတွေ ရှိသလို တဖက်မှာလည်း ကြံံ့ခိုင်ရေး ပါတီ (USDP) နဲ့တပ်မတော် ကလည်း ဒုတိယ လွှတ်တော်သက်တမ်းကာလအတွင်း အရေးပေါ် လွှတ်တော်ခေါ်ယူရန် တောင်းဆိုခဲ့ပေမယ့် ငြင်းပယ်ခံရပါတယ်။
ဒါ့ကြောင့် တပ်မတော်နဲ့ ကြံ့ခိုင်ရေးမှ ကိုယ်စားလှယ်တွေ တတိယအကြိမ် လွှတ်တော် မရောက်လာလျှင် နိုင်ငံရေး ဘယ်လိုရှေ့ဆက်သွားမလဲ၊ ဘာတွေဆက်ဖြစ်လာမလဲဆိုတာကို ပြည်သူတွေကတော့ စိုးရိမ်ပူပန်နေကြပါတယ်။
ယခုတတိယအကြိမ် လွှတ်တော်ခေါ်ယူခြင်းဟာလည်း ဖွဲ့စည်းပုံအခြေခံ ဥပဒေ ပုဒ်မ (၁၂၃) အရ ခေါ်ယူဆောင်ရွက်ရခြင်းဖြစ်တဲ့အတွက် တပ်မတော် နဲ့ ကြံ့ခိုင်ရေး ကိုယ်စားလှယ်တွေ လွှတ်တော်ကို မတက်ရောက်လာပါက ဖွဲ့စည်းပုံ အခြေခံ ဥပဒေကို ဆန့်ကျင်ရာရောက်သွားနိုင်ပါတယ်။
လက်ရှိ ဖြစ်ပျက်နေတဲ့ ကိစ္စတွေအားလုံးကို တပ်မတော်နဲ့ အနိုင်ရပါတီ (NLD) အနေနဲ့ စေ့စပ်ဆွေးနွေး ညိနှိုင်း ပြီး အဖြေရှာဖော်ထုတ်နိုင်ဖို့လည်း နိုင်ငံရေး သမားတွေ ပြည်သူတွေက မျှော်လင့်နေကြပါတယ်။
Leave a Comments