သျှမ်းပြည်မြောက်ပိုင်း မူဆယ်မြို့ တောင်ရပ်ကွက်ရှိ နေအိမ်တလုံး တွင် ယနေ့ (ဇန်နဝါရီ ၂၂)ရက် နေ့လည် ၁၂နာရီ အချိန်၌ ဓားပြတိုက်မှု ဖြစ်ပွားခဲ့ကြောင်း စုံစမ်းသိရှိရသည်။
အဆိုပါနေအိမ်ထဲတွင် အမျိုးသမီး တဦးတည်းနေချိန် အမျိုးသား ၂ဦးက ဝင်ရောက်လာပြီး ဓားပြတိုက်ရန် ကြိုးစားရာ၊ အမျိုးသမီးမှ ပြန်လည်ခုခံလိုက်သဖြင့် အမျိုးသမီး ဦးခေါင်း (၄ချက်)ခုတ်ခံရပြီး၊ လက်ကျိုးသွားကြောင်း သိရသည်။
“ ဦးခေါင်း က ၄ချက်ခုတ်ခံရတယ်။ ဘယ်လက်ကျိုး၊ သွားကျိုးသွားတယ်။ ဒဏ်ရာက နည်းနည်းပြင်းတယ်။ အခု ဆေးရုံမှာ” ဟု တောင်ရပ်ကွက် ရာအိမ်မှူး စိုင်းမြတ်အောင်က သျှမ်းသံတော်ဆင့်ကို ပြောသည်။
လက်ရှိ ဓားပြတိုက်ခံရသည့် အမျိုးသမီး ဦးခေါင်း ဒဏ်ရာ သည် အနည်းငယ်ပြင်းထန်နေကြောင်း၊ မျက်နှာလည်း ဒဏ်ရာရထားကြောင်း သိရသည်။
“လာတာတော့ အမျိုးသား၂ ယောက်လာတာ။ တစ်ယောက်ဖမ်းမိတယ်။ တစ်ယောက်လွှတ်နေတယ်။ ပစ္စည်းတော့ ဘာမှ မရသွားဘူး။ ဓားပြ တိုက်တဲ့သူက အဲ့အိမ်မှာ ကုန်တွေ လာထုပ်ပိုးပေးတဲ့ အလုပ်သမားပဲ” ဟု စိုင်းမြတ်အောင် ကပြောသည်။
လက်ရှိတွင် ဖမ်းမိထားသည့် အမျိုးသားတဦးကို မူဆယ်ရဲစခန်းတွင် ချုပ်နှောင်ထားပြီး၊ လွှတ်နေသည့်အမျိုးသားကို လိုက်လံရှာဖွေနေဆဲဟု သိရသည်။
ထိုဖြစ်စဉ်နှင့် ပတ်သက်ပြီး သျှမ်းသံတော်ဆင့်မှ မူဆယ်ရဲစခန်းကို ဆက်သွယ်မေးမြန်းသော်လည်း မရရှိခဲ့ပေ။
Leave a Comments