RCSS/SSA နှင့် TNLA တို့သည့် ယနေ့ချိန်ထိ နှစ်ဖက်တပ် စစ်ရေး တင်းမာနေသေးသဖြင့် ကျောက်မဲမြို့ပေါ်ရှိ စစ်ရှောင်များနေရပ်မပြန်ရဲသေးကြောင်း သတင်းရရှိသည်။
ရှမ်းပြည်ပြန်လည်ထူထောင်ရေးကောင်စီ၊ရှမ်းပြည်တပ်မတော် (RCSS/SSA) နှင့် တအာင်း(ပလောင်) အမျိုးသား လွှတ်မြောက်ရေးတပ်မတော်(TNLA) တို့ ၂၀၂၀ခုနစ် ဒီဇင်ဘာ(၂၅)ရက်မှ စတင်ကာ သျှမ်းပြည်မြောက်ပိုင်း ကျောက်မဲမြို့နယ် အတွင်း တိုက်ပွဲဖြစ်ပွားခဲ့ပြီး၊ ကျောက်မဲမြို့ပေါ်တွင် စစ်ရှောင် (၁၀၀၀)ကျော် ရောက်ရှိလာပြီး စစ်ရှောင်စခန်း (၄)နေရာ ဖွင့်ခဲ့ရကြောင်း သိရသည်။
လက်ရှိအချိန်ထိ တိုင်းရင်းသား လက်နက်ကိုင် တပ်ဖွဲ့ (၂)ဖွဲ့ စစ်ရေး တင်းမာနေပြီး ၂ဘက်တပ်မှ နေရာယူထားသေးသဖြင့် ကျောက်မဲမြို့ပေါ်ရှိ စစ်ရှောင်(၁၀၀၀) ကျော်နေရပ်မပြန်ရဲသေးကြောင်း သိရသည်။
“စစ်ရှောင်တွေကတော့ မပြန်သေးဘူး။ ကျောက်မဲမြို့ပေါ်ရှိနေတုန်းပဲ။ တိုက်ပွဲတွေကတော့ ငြိမ်သွားတာ ကြာပြီ။ တိုက်ပွဲပြန်ဖြစ်လာမှာကို စိုးရိမ်ကြလို့ မပြန်ရဲကြသေးတာ။ ကျန်းမာရေး ရှုတောင့်ကနေပြီးကြည့်ရင်လည်း လက်ရှိ ကိုဗစ်-၁၉ ရောဂါကာလလည်း ဖြစ်နေတယ်ဆိုတော့ ကူးမှာလည်း စိုးရိမ်ရတယ်။” ဟု ရွေးကောက်ပွဲတွင် အနိုင်ရထားသည့် ကျောက်မဲပြည်သူ့လွှတ်တော် ကိုယ်စားလှယ် စိုင်းအောင်မြင့် က သျှမ်းသံတော်ဆင့် ကိုပြောသည်။
ဇန်နဝါရီ လဆန်းပိုင်းမှ စတင်ပြီး တိုင်းရင်းသား လက်နက်ကိုင် နှစ်ဖက်တပ် မှ တိုက်ပွဲ ငြိမ်သက်သွားသော်လည်း စစ်ရေးတင်းမာနေမှုများကြောင်းလည်း သိရသည်။
“ခုက ကျောက်မဲ နဲ့ နမ္မတူဘက်ကတော့ တိုက်ပွဲတွေ ငြိမ်သက်သွားပါပြီ။ ကြီးကြီးမားမား တင်းမာမှု မရှိတော့ပေမယ့် ဒါပေမယ့် သတိထားပြီးတော့ လှုပ်ရှားရတယ်” RCSS/SSA ၏ပြောရေးဆိုခွင့်ရှိသူ ဒုဗိုလ်မှူးကြီး အုမ်ခေး ကပြောသည်။
လက်ရှိတွင် RCSS နှင့် TNLA တို့ တိုက်ပွဲ တင်းမာမှုရှိပေမယ့် တိုက်ပွဲဖြစ်ပွားခြင်း မရှိသေးကြောင်း သိရသည်။
“လက်ရှိ တိုက်ပွဲအခြေနေကတော့ တင်းမာနေတယ်။ ဒီ ၂ ရက် ၃ ရက်ကတော့ တိုက်ပွဲမရှိဘူး။” TNLA ၏ သတင်းနှင့် ပြန်ကြားရေး တာဝန်ခံ ဗိုလ်မှူးမိုင်းအိုက်ကျော် က ပြောသည်။
RCSS/SSA နှင့် TNLA တို့ တိုက်ပွဲကြောင့် ကျောက်မဲမြို့နယ်အတွင်း ဒေသခံနေအိမ် (၆၀) ကျော် ကျည်ထိမှန်ခဲ့ပြီး ဒေသခံ ရွာသားများလည်း ထိခိုက်ဒဏ်ရာ ရရှိခဲ့သည်။
RCSS/SSA နှင့် TNLA တို့သည် သျှမ်းမြောက် ကျောက်မဲမြို့နယ် နှင့် နမ္မတူမြို့နယ်အတွင်း ထိတွေ့မှု ဖြစ်ပွားခဲ့ပြီး စစ်ရှောင် (၃၇၀၀) ကျော် ထွက်ပြေး တိမ်းရှောင်ခဲ့ရသည်။
