မြန်မာနိုင်ငံသည် ကိုဗစ် ၁၉ ရောဂါကူးစက်မှုနှုန်း ကျဆင်းလာသည့်အလျောက် ပြည်သူများလည်း ကိုဗစ်-၁၉ နှင့် ပတ်သက်ပြီး ပေါ့ဆမှုများလာကြောင်း သတင်းရရှိသည်။

ယခုနောက်ပိုင်း မြန်မာတဝှမ်းတွင် ကိုဗစ်-၁၉ ကူးစက်မှုနှုန်းကျဆင်းလာသော်လည်း ပြည်သူများ အနေဖြင့် ကိုဗစ် -၁၉ စည်းကမ်းချက်ကို မပေါ့ဆဘဲ ဆက်ပြီး လိုက်နာစေလိုကြောင်း၊ Mask (နှာခေါင်းစည်း) များကို စနစ်တကျ တပ်စေလိုကြောင်း ဆရာဝန်များ နှင့် တောင်ကြီး ပရဟိတ အဖွဲ့များက ပြောဆိုလိုက်သည်။

“Mask တွေကို တပ်စေချင်တယ်။ လူစုလူဝေးတွေ မလုပ်စေချင်သေးဘူး။ ကူးစက်မှုကျဆင်းလာတယ်ဆိုတာ မကူးစက်တော့ဘူးလို့ ပြောတာမဟုတ်ဘူး။ ကူးစက်မှုက ရှိနေအုံးမှာပဲ။ တချိန်ချိန်မှာ အစုလိုက် အပုံလိုက်မရှိဘူးလို့လည်းမပြောနိုင်ဘူးလေ။ ခေါင်းပြန်ထောင်လာရင် နောက်ကလိုက်ရတာ သိပ်ခက်ခဲတယ်” တောင်ကြီးမြို့နယ် ပြည့်သူကျန်းမားရေး ဦးစီဌာန ဒေါက်တာမိုးထွန်းက ပြောသည်။

ကိုဗစ် -၁၉ ကျဆင်းမှုများရှိလာသောကြောင့် ပြည်သူတချို့ ခရီးသွားလာမှုများရှိလာသလို တချို့ ပြည်သူများမှာ Mask တပ်ဆင်မှုမရှိဘဲ အပြင်သွားလာမှုများရှိနေသည်။

“ အခုလူတွေက ရေပေါ်ဈေးတို့ နီးစပ်ရာတွေ တောင်တက်တာတို့ လုပ်ကြတယ်။ ကျနော်တို့က ဒီချိန်မှာ မလုပ်သင့်သေးဘူးလို့ထင်တယ်။ ဘာလို့လည်းဆိုရင် ခုကိုဗစ် ကျနေချိန်မှာ မလိုလားအပ်တဲ့ ကိစ္စတွေ ပေါ်လာမှာ ဆိုးတယ်” ဟု တောင်ကြီးမြို့ စေတနာဝန်းထမ်း ပရဟိတ ကိုဝင်းနိုင်စိုးက သျှမ်းသံတော်ဆင့် ကိုပြောပါတယ်။

ယခုရက်ပိုင်းတွင် ကိုဗစ်-၁၉ ရောဂါ ကူးစက်မှုနှုန်း ကျဆင်းလာသော်လည်း ယခု အခြေနေကို ကောင်းစွာ စောင့်ရှောက်သင့်ကြောင်း ကိုဝင်းနိုင်စိုးက ပြောသည်။

“ အခုချိန်မှာ က ကျဆင်းလာတာဟုတ်တယ်။ ဒီလိုအခြေနေကို ပြည်သူတွေက ကောင်းကောင်းစောင့်ရှောက် သင့်တယ်။ အခုက ပြည်သူတွေက ပေါ့ဆလာကြတယ်။ တချို့ ဆိုခရီးတိုတွေထွက်ကြတယ်” ဟု ကိုဝင်းနိုင်စိုးက ဆိုသည်။

ဆက်လက်ပြီး ခရီးများထွက်မည်ဆိုပါက ကိုဗစ်- ၁၉ နှင့်အညီ စည်းကမ်းချက်များကို လိုက်နာစေလိုကြောင်း ကိုဝင်းနိုင်စိုးက ထပ်လောင်းပြောသည်။

ကိုဗစ်-၁၉ ကူးစက်မှုနှုန်း လျော့ကျလာသော်လည်း ပြည်သူများအနေဖြင့် မပေါ့ဆသင့်ဘဲ လျော့ကျလာမှုကို ဆက်လက်ထိန်းသည့်အနေဖြင့် လူစုလူဝေးများကို ရှောင်ရန်လိုအပ်သေးကြောင်း၊ အပြင်သွားတိုင်း Mask တပ်ခြင်းကို ပြုလုပ်သင့်ကြောင်းလည်း ဆရာဝန်များ နှင့် ပရဟိတများက ပြောဆိုလာကြပါသည်။

မြန်မာနိုင်ငံတွင် ယမန်နေ့ (ဇန်နဝါရီ ၂၁)ရက် ည ၈နာရီတွင်ကျန်းမာရေး နှင့် အားကစားဝန်ကြီးဌာန ထုတ်ပြန်ချက်အရ ကိုဗစ်-၁၉ အတည်ပြုလူနာ (၄၇၈)ဦး ထပ်မံတွေ့ရှိပြီး၊ သေဆုံးသူ (၁၁)ဦးထိ လျော့ကျလာကြောင်း သိရသည်။