ကိုဗစ်-၁၉ ကူးစက်မြန်ရောဂါ လရှည်ကြာ လာသည့်အလျောက် အသုံးပြုပြီးသည့် Mask (နှာခေါင်းစည်း)များသည် နေရာအနှံ့ စည်းကမ်းမဲ့ စွန့်ပစ်နေကြသည်။

ကိုဗစ်-၁၉ ကူးစက်မြန်ရောဂါကို ကာကွယ်သည့်အနေဖြင့် လူတိုင်း Mask ကို တပ်ဆင် အသုံးပြုကြသော်လည်း၊ အသုံးပြုပြီး Mask ကို စွန့်ပစ်သည့်အချိန်တွင် စနစ်တကျ မစွန့်ပစ်ဘဲ လမ်းမဘေး နှင့် မြစ်ချောင်းထဲသို့ စည်းကမ်းမဲ့ စွန့်ပစ်ထားသည်ကို သျှမ်းပြည်တဝှမ်းတွင် တွေ့မြင်နေရသည်။

“ ကိုဗစ် လရှည်လာတဲ့အလျောက် Maskတွေကလည်း နေရာအနှံ့ စည်းကမ်းမဲ့လွှင့်ပစ်နေကြတယ်။ အခု လမ်းတွေ တလျောက်မှာ သုံးပြီးတဲ့ Maskတွေ စည်းကမ်းမဲ့ လွှင့်ပစ်တာ တွေ့နေရတယ်။ ဒါတွေကို စနစ်တကျလွှင့်ပစ်ဖို့လိုတယ်” ဟု တောင်ကြီး ဒေသခံ နန်းဥမ္မာ က ပြောသည်။

Mask ကို စနစ်တကျ အသုံးပြုတက်အောင် လူမှုအဖွဲ့အစည်းများ၊ ဆရာဝန်များ ပညာပေးမှု ပြုလုပ်ခဲ့ပြီး၊ လက်ရှိမှာ အသုံးပြီး စွန့်ပစ်မည့် Maskကို စနစ်တကျ ပြန်စွန့်ပစ်တက်အောင် ပညာပေးထက်လုပ်ရန် လိုအပ်ကြောင်းလည်း နန်းဥမ္မာ က ပြောသည်။

“Mask စွန့်ပစ်တာ တဦးတယောက်ပေါ်မူတည်တယ်။ ကိုဗစ် ကလည်း ဘယ်လောက်ထိကြာမလဲတော့ မသိသေးဘူး။ ဒါကို ကျနော်တို့ကတော့ ပညာပေးအပိုင်းကို ဆက်ပြီးလုပ်သွားဖို့ရှိတယ်” ဟု တောင်ကြီးမြို့နယ် ပြည်သူ့ကျန်းမာရေး ဦးစီးဌာနမှူး ဒေါက်တာမိုးထွန်းကဆိုသည်။

Mask ကမ်ပိန်းများပြုလုပ်သည့်အချိန်တွင် Mask များကို စနစ်တကျ စွန့်ပစ်ပေးရန် မေတ္တာရပ်ခံထားကြောင်း၊ လက်ရှိမှာ Mask များကို သိမ်းဆည်းနိုင်ရန် စည်ပင် နှင့် ပူးပေါင်းပြီး ဆောင်ရွက်နေကြောင်း ဒေါက်တာမိုးထွန်း က ပြောသည်။

အသုံးပြုပြီးသည့် Mask များကို စနစ်တကျ မစွန့်ပစ်ပါက ထိုမှ တဆင့် ကိုဗစ်-၁၉ ကူးစက်နိုင်ကြောင်းလည်း ဆရာဝန်များ က ပြောဆိုသည်။

ထိုသို့ Mask ကို စနစ်တကျ စွန့်ပစ်ထားခြင်းမရှိပါက “ ဘယ်အမှိုက်မှ မကောင်းပါဘူး။ အဓိကတော့ Maskပေါ့။ တပ်ထားတဲ့ Mask ကနေပြီးတော့ တံတွေး၊ပိုးတွေကရှိနေပြီးလေ။ သူက တခြားအမှိုက်တွေနဲမတူဘူးလေ” ဟု ခိုလမ်း မြို့မှ ဆရာဝန် ဒေါက်တာ နန်းအေမြသီတာက ပြောသည်။

ထို့ကြောင့် အသုံးပြုပြီးဖြစ်သည့် Mask များကို စနစ်တကျ အမှိုက်ပုံးထဲ စနစ်တကျ စွန့်ပစ်ပေးရန် လိုအပ်ကြောင်း လည်း ဆရာဝန်များက ပြောဆိုလိုက်သည်။