“ဝ”အထူးဒေသ သွားရောက်အလုပ်လုပ်သည့် မြန်မာရွှေ့ပြောင်းအလုပ်သမား ၁၅၀ ကျော် တောထဲတွင် အကာအရံမရှိ ၃ညတိုင် ပိတ်မိနေကြောင်း စုံစမ်းသိရသည်။

အဆိုပါ ရွှေ့ပြောင်းအလုပ်သမား ၁၅၀ကျော်သည် “ဝ” ဒေသ မိုင်းဖျဲန်မြို့ရှိ စီးကရက်စက်ရုံတခုတွင် အလုပ်လုပ်ရာ ကိုဗစ်-၁၉ ကူးစက်မြန်ရောဂါကြောင့် လစာပုံမှန်မရရှိသဖြင့် မိမိနေရပ်ကို ပြန်လာရာ မိုင်းလားနှင့် “ဝ” နယ်မြေအကြား တောထဲတွင် ပိတ်မိနေကြောင်း ထိုနေရာတွင် ပိတ်မိနေသည့် ရွှေ့ပြောင်းအလုပ်သမားများက ပြောသည်။

ထိုတောထဲတွင် ပိတ်မိနေသည့် သူများထဲတွင် အမျိုးသမီး(၆၀)ကျော် နှင့် ကိုယ်ဝန်သည် အမျိုးသမီး ၅ဦး ပါဝင်နေကြောင်း သိရသည်။

“ ကျနော်တို့ကို ကုမ္ပဏီက ဒီမှာလာချထားတာ။ ၂ညရှိပြီ။ ဒီဒေသရဲ့ ဆောင်းရာသီက အရမ်းအေးတယ်လေ။ ကျနော်တို့ဘေးပတ်လည် အကာအရံမရှိဘူး။ ရှိတဲ့မြက်ခြောက်တွေခင်းတယ်။ကာတယ်။ မီးလှုံနေရတယ်။ လေတွေကလည်း တိုက်တယ်လေ” ဟု ထိုနေရာတွင်ရောက်နေသည့် ရွှေ့ပြောင်းအလုပ်သမား ကိုမင်းလေး က သျှမ်းသံတော်ဆင့်ကို ပြောသည်။

ထိုရွှေ့ပြောင်းအလုပ်သမားများ ရောက်ရှိနေသည့်နေရာသည် “ဝ” အထူးဒေသ နှင့် မိုင်းလား အထူးဒေသ ကြားဖြစ်သည့် မိုင်းယန်း- မိုင်းခတ် ကားလမ်းဘေး၊ ထန်မွန်ကျေးရွာအနီး ဖြစ်သည်။

ထိုနေရာသည် မိုင်းလား အထူးဒေသ နယ်မြေ ဖြစ်သဖြင့် မိုင်းလားအဖွဲ့ လက်မခံဘဲ ထန်မွန်ကျေးရွာ အပြင်ဘက်သို့သွားရောက်နေစေခဲ့ကြောင်း သိရသည်။

“ စားဖို့ကတော့ ဒီအနီးက ပြည်သူတွေလာပို့တယ်။ စားဖို့က အဆင်ပြေတယ်။ နေတာ အိပ်တဲ့နေရာ အဆင်မပြေဘူး။ ကျန်းမာရေး အတွက် စိုးရိမ်ရတယ်” ဟု ကိုမင်းလေး က ဆိုသည်။

ဇန်နဝါရီ ၁၄ရက်နေ့ ညနေပိုင်းတွင် ထိုနေရာကို စတင်ရောက်ရှိလာကြောင်း၊ အလွန်အေးသည့်အတွက် ညတွင် အိပ်စက် မရကြောင်း၊ ထိုနေရာသည် ကွင်းပြင်နေရာဖြစ်နေသဖြင့် ကျန်းမာရေး (အပေ့ါအလေး) သွားရန် မလွယ်ကူကြောင်းလည်း ကိုမင်းလေး က ပြောသည်။

“ ကျမ အခင်းလေးမရှိ၊ မြေကြီးပေါ်အိပ်တယ်။ ညဆိုရင်လည်း အရမ်းအေးတော့ ဘယ်အိပ်ပျော်မလဲ။ တညလုံးမီးဖိုဘေးမှာပဲထိုင်နေတယ်။ ဗိုက်ထဲက ကလေးအတွက်လည်းစိုးရိမ်တယ်။ တညမျှမအိပ်ရသေးဘူး” ဟု ကိုယ်ဝန်သည် မစုစုဝေးက ပြောသည်။

ထိုတောထဲတွင် ရောက်ရှိနေသည့် ရွှေ့ပြောင်းအလုပ်သမားအများစုသည် နတ်မောက်မြို့၊ မန္တလေး၊ မိုးကုတ်နှင့် ကျောက်မဲ ဘက်မှာ ပြည်သူများဖြစ်ကြောင်း၊ ထိုထဲတွင် နတ်မောက် ဒေသခံများရှိကြောင်းလည်း သိရသည်။

“ ကျနော်တို့ မနက်ဖန် ပြန်ရမယ်လို့ပြောတယ်။ ကျနော် တို့အမြန်ပြန်ရဖို့ပဲ” ဟု ကိုမင်းလေး က ထပ်လောင်းပြောသည်။

ကိုဗစ်-၁၉ ကူးစက် ရောဂါ ပထမလှိုင်းတွင် မိုင်းလား ဒေသတွင် သွားရောက် အလုပ်လုပ်သည့် ရွှေ့ပြောင်းအလုပ်သမား (၃၀၀၀)ကျော် သည် ကျန်းမာရေး နှင့် အားကစားဝန်ကြီးဌာန၏ လမ်းညွှန်ချက်အညီ သက်ဆိုင်ရာ နယ်မြေအတွင်း အကြောင်းကြားကာ ဆောင်ရွက်ခဲ့သဖြင့် ပြဿနာ တစုံတရာမဖြစ်ခဲ့ကြောင်းသိရသည်။