သျှမ်းပြည်မြောက်ပိုင်း ကျောက်မဲမြို့နယ် မိုင်းငေါ့မြို့နယ်ခွဲရှိ လက်ဖက်ခြံတွင် ပေါင်းရှင်းနေသည့် အသက် (၅၅) အရွယ် အမျိုးသမီးတဦး တူးမီးသေနတ် ပစ်ခံရကြောင်း စုံစမ်းသိရှိရသည်။
ဖြစ်စဉ်မှာ ယမန်နေ့ (ဇန်နဝါရီ ၇) ရက် နံနက် ၁၀ နာရီခွဲအချိန်တွင် ကျောက်မဲမြို့နယ် မိုင်းငေါ့မြို့နယ်ခွဲ အောက်ဈေးရပ်ကွက်နေ အသက် (၅၅) နှစ်အရွယ်ရှိ ဒေါ်အေးယွမ်း သည် လက်ဖက်ခြံထဲတွင် တယောက်တည်း လက်ဖက်ခြံပေါင်းရှင်းနေချိန် အမည်မသိ သူမှ တူးမီးသေနတ်ဖြင့် ပစ်ခံရပြီး၊ ဝမ်းဗိုက်တွင် ဒဏ်ရာတချက်ရကာ လက်ရှိမှာ ကျောက်မဲဆေးရုံတွင် ဆေးကုသခံယူနေကြောင်း သတင်းရရှိသည်။
“ဝမ်းဗိုက်မှာထိတာပါ။ တမင်လုပ်ကြံတာတော့ မဖြစ်နိုင်ဘူး။ သူတို့မိသားစုမှာ ရန်ငြိုးရန်စ လည်းမရှိထားဘူး။ တောလည်ရင်း တောမှားပြီး အပစ်ခံရတာဖြစ်နိုင်တယ်လို့ ယူဆရတယ်။” ဟု ကျောက်မဲမြို့နယ် ဇီဝိတ လူမှုကူညီရေးအသင်း ဥက္ကဋ္ဌ ဦးတင်မောင်သိန်း က သျှမ်းသံတော်ဆင့် ကိုပြောသည်။
ထို အမျိုးသမီးကို ကျောက်မဲပြည်သူ့ဆေးရုံမှာ ဆေးကုသမှု ခံယူထားကြောင်းလည်း ဦးတင်မောင်သိန်းက ပြောသည်။ သ
“ပစ်သူကိုတော့ မသိပါဘူး။ မနေ့ က နေလည် နှစ်နာရီမှာပဲ ကျောက်မဲဆေးရုံကို ရောက်လာပါတယ်” ဟု ဦးတင်မောင်သိန်း ကပြောသည်။
ကျောက်မဲမြို့နယ်အတွင်း တိုင်းရင်းသားလက်နက်ကိုင်များ၊ အစိုးရတပ်မတော်များ လှုပ်ရှားသည့်နေရာတစ်ခုဖြစ်ပြီး၊ ၂၀၁၅ ခုနှစ်နောက်ပိုင်း စစ်ရေး ပဋိပက္ခ မကြာမဏဖြစ်ပွားသည့် နေရာဖြစ်သကဲ့သို့ အရပ်သားမကြာခဏ သေနတ်ပစ်သတ်ခံရပြီး သေဆုံးခဲ့သည့် နေရာဖြစ်ကာ တရားခံကို တကြိမ်တခါမျှ ဖမ်းဆီးရရှိခြင်း မရှိခဲ့ပေ။
Leave a Comments