သျှမ်းပြည်မြောက်ပိုင်း သီပေါမြို့နယ် စံဖိတ်ကျေးရွာ အ.မ.က ကျောင်းတွင် Quarantine ဝင်နေသည့် အမျိုးသား တဦးထံတွင် ကိုဗစ် ၁၉ ပိုးတွေ့ရှိကြောင်းစုံစမ်းသိရှိရသည်။
ထိုပိုးတွေ့လူနာသည် မန္တလေးမှ ပြန်လာပြီး FC Quarantine ဝင်နေရာတွင် ယနေ့ ဇန်နဝါရီ ၈ ရက်တွေင် RDT ဖြင့်စစ်ဆေးရာတွင် ပိုးတွေ့ရှိကြောင်း သီပေါမြို့နယ် နယ်စည်းမခြားပရဟိတ ကိုမျိုးက သျှမ်းသံတော်ဆင့်ကို ပြောသည်။
“ သူက မန္တလေးကနေပြန်လာတာ။ ပြန်လာပြီးတော့ ဒီနေ့စစ်ဆေးလိုက်တော့ ပိုးတွေ့သွားတာပါ။ အခုတော့ ကူးစက်ရောဂါကုသရေးဆောင်ကို ပို့လိုက်ပြီး” ဟု ကိုမျိုး က ပြောသည်။
အဆိုပါ ပိုးတွေ့လူနာနှင့် ထိတွေ့ဆက်ဆံသူမရှိကြောင်း၊ မန္တလေးမှ ပြန်လာရာတွင်လည်း လူနာတင်ယာဉ်ဖြင့်သာ ပြန်လာကြောင်း ကိုမျိုးက ထပ်လောင်းပြောသည်။
မြန်မာနိုင်ငံတဝှမ်း ဇန်နဝါရီ ၇ရက် ည ၈နာရီ ထုတ်ပြန်ချက်အရ ကိုဗစ် -၁၉ လူနာ စုစုပေါင်း (၁၂၈,၇၇၂) ဦးရှိပြီး ဆေးရုံဆင်းခွင့်ရသူ (၁၁၂,၀၄၈)ဦး နှင့် သေဆုံးသူ စုစုပေါင်း (၂၇၉ ၉ )ဦးရှိကြောင်း ကျန်းမာရေး နှင့် အားကစားဝန်ကြီးဌာန ထုတ်ပြန်ချက် အရသိရသည်။
