သျှမ်းပြည် မြောက်ပိုင်း လားရှိုးမြို့တွင် တရားမဝင်လက်နက်ခဲယမ်း ကိုင်ဆောင်သည့် အမျိုးသားတဦးကို ဖမ်းဆီးမိကြောင်း သတင်းရရှိသည်။

လားရှိုးမြို့တွင် ယောက္ခမဖြစ်သူအား သေနတ်ဖြင့် ခြိမ်းခြောက်မှုဖြင့် အမျိုးသားတစ်ဦးအား စစ်ဆေးရာမှ မုံးဟပြည်သူ့စစ်အဖွဲ့ယူနီဖောင်းများနှင့် လက်နက်ခဲယမ်းများကို တရားမဝင်သုံးစွဲနေသည်ကို စစ်ဆေးတွေ့ရှိရကြောင်း လားရှိုးမြို့နယ်ရဲတပ်ဖွဲ့ ၏ သတင်းထုတ်ပြန်ချက်အရသိရသည်။

ဇန်နဝါရီ (၆)ရက်တွင် လားရှိုးမြို့ ရပ်ကွက်(၇)တွင်နေထိုင်သည့် ဦးပီရှန်းသည် သေနတ်ဖြင့် ခြိမ်းခြောက်ခံရကြောင်း မြို့မရဲစခန်းကို ဆက်သွယ်တိုင်ကြားသဖြင့် အဆိုပါ နေအိမ်ကို သွားရောက် စစ်ဆေးခဲ့သည်။

ယင်းနောက် ဦးပီရှန်းနေအိမ်သို့လာပြီး ဇနီးဖြစ်သူအား ထုတ်ပေးရန် သေနတ်ဖြင့်ခြိမ်းခြောက်ခဲ့သည့် လီဖူရှိုး (ခ) စန်းတီ နေထိုင်ရာ ရပ်ကွက် (၇)၊ နယ်မြေ (၆)၊ အေးသာယာလမ်း၊ အိမ်အမှတ်(ဆ/၆/၃၃၂) နေအိမ်သို့ သွားရောက် စစ်ဆေးခဲ့ရာ လီဖူရှိုး (ခ) စန်းတီအား နေအိမ်တွင် မောင်းပြန် ရိုင်ဖယ်သေနတ် (၁) လက် ကိုင်ဆောင်ထားပြီး ငါးလုံးပြူးသေနတ် (၁) လက်ကို ခါးတွင် ချိတ်လျှက်တွေ့ရှိရခြင်းဖြစ်ကြောင်း သိရသည်။

ဆက်လက်ပြီး လီဖူရှိုး စီးနင်းသည့် မော်တော်ယာဉ်ပေါ်တွင်လည်း Type-81 မောင်းပြန်ရိုင်ဖယ် သေနတ် (၁) လက်နှင့် ၎င်းကျည် (၁၁၈) တောင့်၊ ၎င်းကျည်အိမ် (၄) ခု၊ Luger (38 mm Special) ငါးလုံးပြူး သေနတ် (၁) လက်နှင့် ၎င်းကျည် (၃၂) တောင့်၊ လက်ထိပ် (၂) စုံ၊ TDK အမှတ်တံဆိပ် စကားပြောစက် (၃) လုံး၊ RUIZHONGLONG အမှတ် တံဆိပ်ပါ စကားပြောစက် (၁) လုံး၊ EPOLO စာတမ်းပါ စကားပြောစက် (၁) လုံး၊ မုံးဟ ပြည်သူစစ် ဘက်တံဆိပ်ပါ ယူနီဖောင်း (၃) စုံ၊ ဘက်တံဆိပ်မပါ ယူနီဖောင်း (၅) စုံ၊ မုံးဟပြည်သူစစ် ဘက်တံဆိပ် (၂) စုံ၊ စစ်စိမ်းရောင် ကျောပိုး အိတ် (၁) လုံး၊ စစ်စိမ်းရောင် ဖိုက်ဘာ ဦးထုပ် (၁)လုံး၊ ပစ္စတိုသေနတ်ထည့်သည့် သေနတ်အိတ် (၂) ခု၊ ကျည်ခါးပတ် (၂) ခု၊ စစ်စိမ်းရောင် Equipment (၁) စုံ၊ ပြောက်ကျား ဘေးလွယ်အိတ် (၁)လုံး၊ စစ်စိမ်းရောင်ခါးပတ် (၁) ချောင်း၊ ပလပ်စတစ် လက်ပစ်ဗုံး (fuse ပါ) (၁) လုံး၊ ဝါယာလက် မီးလုံး (၁) လုံး၊ ငွေကျပ် (၄)သိန်းတို့အား စစ်ဆေးတွေ့ရှိခဲ့ရခြင်းဖြစ်ကြောင်း သိရသည်။

လီဖူရှိုး (ခ) စန်းတီ ကိုင်ဆောင်သုံးစွဲသည့် လက်နက်ခဲယမ်းများနှင့် စပ်ဆက်ပစ္စည်းများနှင့်ပတ်သက်၍ မုံးဟ ပြည်သူ့စစ်သို့ အတည်ပြုရာ လီဖူရှိုး(ခ)စန်းတီမှာ ၎င်းတို့၏တပ်ဖွဲ့ဝင် မဟုတ်ကြောင်းနှင့် တွေ့ရှိရသည့် လက်နက်ခဲယမ်းများနှင့် စပ်ဆက်ပစ္စည်း များမှာလည်း တပ်ဖွဲ့ပိုင်ပစ္စည်းများမဟုတ်ကြောင်း မုံးဟပြည်သူ့စစ်မှ လားရှိုးရုံးတာဝန်ခံ ဦးစိုင်းစံအေးက အတည်ပြုထားကြောင်း သိရသည်။

လက်နက်ခဲယမ်းများနှင့် ဆက်စပ်သည့်ပစ္စည်းများ၊ စစ်အသုံးအဆောင်ပစ္စည်းများအား တရားဝင် ခွင့်ပြုချက်မရှိဘဲ ကိုင်ဆောင်အသုံးပြု လက်ဝယ်ထားရှိသူ လီဖူရှိုး (ခ) စန်းတီအား ဥပဒေအရ အရေးယူ ဆောင်ရွက်နိုင်ရေး ဆောင်ရွက်နေကြောင်း လားရှိုးမြို့နယ်ရဲတပ်ဖွဲ့က ဇန်နဝါရီလ (၇)ရက်တွင် သတင်းထုတ်ပြန်ထားသည်။