ကိုဗစ်-၁၉ ကူးစက်ရောဂါကြောင့် စားနပ်ရိက္ခာ ခက်ခဲနေသည့် သျှမ်းပြည်မြောက်ပိုင်း ကျောက်မဲမြို့နယ် အုမ္မငါးဘုန်းကြီးကျောင်းမှ စစ်ရှောင် (၁၀၀) ကျော် ကို ကျောက်မဲမြို့ပေါ်သို့ မခေါ်လာတော့ကြောင်း စုံစမ်းသိရှိရသည်။
အုမ္မငါးဘုန်းကြီးကျောင်းရှိ စစ်ဘေးရှောင် (၁၁၅) ဦးသည် ယနေ့ ဇန်နဝါရီ (၇) ရက်တွင် ကျောက်မဲမြို့ပေါ်ရှိ စစ်ဘေးရှောင်စခန်း သို့ခေါ်ဆောင်လာမည့်အစီအစဉ်ကို ကိုဗစ်-၁၉ ကူးစက်ရောဂါ ကြောင့် အစီအစဉ်ဖျက်သိမ်းလိုက်ပြီး ယခင် စစ်ရှောင်စခန်းတွင်သာပြန်ထားခဲ့ရကြောင်း စုံစမ်းသိရှိရသည်။
“တောရွာတွေကတော့ ကိုဗစ် မရှိဘူး။ သူတို့ချင်းတွေ့နေတာက ပြဿနာမရှိဘူး။ ဒီမြို့ပေါ်က စခန်းလာရင် အခြားလာလှူတဲ့သူတွေနဲ့တွေ့ရင် ကိုဗစ် မတော်တဆပါလာခဲ့သည်ရှိသော် စိုးရိမ်ရတယ်။ ခု ခိုလှုံနေတဲ့ နေရာကလည်း လုံခြုံတယ်” ဟု ကျောက်မဲမြို့ ဇီဝိတ လူမှုကူညီရေးအသင်း ဦးတင်မောင်သိန်း က သျှမ်းသံတော်ဆင့် ကိုပြောသည်။
ထို စစ်ရှောင်ဒေသခံများသည် စားနပ်ရိက္ခာများအတွက် အခက်ခဲဖြစ်နေကြောင်းလည်း သိရသည်။
“လူ (၁၁၅) ယောက် သူတို့ကို ခေါ်လာတာနဲ့ ဒီကနေသွားပြီး လိုအပ်တဲ့ ရိက္ခာ ပံ့ပိုးရတာ ပိုပြီးအဆင်ပြေတယ်။ အဲ့ကြောင့် ခေါ်မလာတော့ပဲနဲ့ အဲ့ဒီမှာပဲ သွားလှူလိုက်တာ” ဟု ဦးတင်မောင်သိန်း ကပြောသည်။
ရှမ်းပြည်ပြန်လည်ထူထောင်ရေးကောင်စီ၊ရှမ်းပြည်တပ်မတော်(RCSS/SSA) နှင့် တအောင်း (ပလောင်) အမျိုးသားလွှတ်မြောက်ရေးတပ်မတော်(TNLA) တို့ တိုက်ပွဲကြောင့် တော့ဆန်ကျေးရွာအနီးတစ်ဝိုက်ရှိ ဒေသခံနေအိမ် (၆၀) ကျည်ထိမှန်ခဲ့ကြောင်း စုံစမ်းသိရှိရသည်။
RCSS/SSA နှင့် TNLA တို့သည် ၂၀၂၀ ခုနှစ် ဒီဇင်ဘာ (၂၅)ရက်မှ စတင်ကာ ယနေ့ချိန်ထိ စစ်ရေးတင်းမာနေပြီး တိုက်ပွဲကြောင့် ကျောက်မဲမြို့ပေါ်ရှိ စစ်ရှောင် (၁၀၀၀) ကျော် ထွက်ပြေးတိမ်းရှောင်ခဲ့ကြောင်းသိရသည်။
Leave a Comments