သျှမ်းပြည်မြောက်ပိုင်း ကျောက်မဲမြို့နယ် တော့ဆန်ကျေးရွာအနီးတဝှိက်တွင် တိုင်းရင်းသားလက်နက်ကိုင် တပ်ဖွဲ့ ၂ဖွဲ့ တိုက်ပွဲဖြစ်ပွားမှုကြောင့် အရပ်သား နေအိမ် (၆၀) လက်နက်ကျည်ထိမှန်ခဲ့ကြောင်း စုံစမ်းသိရသည်။
ကျောက်မဲမြို့နယ် အတွင်း ရှမ်းပြည်ပြန်လည်ထူထောင်ရေးကောင်စီ၊ရှမ်းပြည်တပ်မတော်(RCSS/SSA) နှင့် တအောင်း(ပလောင်) အမျိုးသားလွှတ်မြောက်ရေးတပ်မတော်(TNLA) တို့ တိုက်ပွဲကြောင့် တော့ဆန်ကျေးရွာရှိ ဒေသခံနေအိမ် (၆၀) ကျည်ထိမှန်ခဲ့ကြောင်း တော့ဆန်ဒေသခံ အမျိုးသားတဦး က သျှမ်းသံတော်ဆင့်ကိုပြောသည်။
တော့ဆန်ကျေးရွာတွင် အိမ်ခြေ (၁၇၀) လုံး ရှိရာ ထိုထဲမှ အိမ်ခြေ (၆၀) အပြင် စေတီပုထိုးလည်း ကျည်ထိမှန်ထားကြောင်း သိရသည်။
“(၆၀) အိမ်ထဲက (၅) အိမ်လောက်က အရမ်းထိသွားတယ်။ ဒေသခံ ရွာသား (၁) ဦးလည်း ထိခိုက်ဒဏ်ရာ ရခဲ့တယ်” ၎င်း တော့ဆန်ဒေသခံ အမျိုးသား က ပြောသည်။
ကျောက်မဲမြို့နယ် တော့ဆန်တိုက်ပွဲကြောင့် စစ်ရှောင် (၁၀၀) ကျော် အုမ္မငါးဘုန်းကြီးကျောင်းသို့ ထွက်ပြေးတိမ်းရှောင်ခဲ့ရပြီး ယနေ့ ဇန်နဝါရီ (၇) ရက်နေ့တွင် ကျောက်မဲမြို့ရှိ လူမှုကူညီရေးအဖွဲ့တို့က ကျောက်မဲစစ်ဘေးရှောင်စခန်းသို့ သွားရောက်ခေါ်ဆောင်ခဲ့ကြောင်း စုံစမ်းသိရှိရသည်။
“တော့ဆန်က စစ်ဘေးရှောင် စာရင်းရထားက (၁၀၉)ယောက် ရထားပါတယ်။ နောက်ထပ် ထပ်တိုးတယ်။ မတိုးတယ်ဆိုတာ မသိနိုင်သေးဘူး။ သူတို့ဆင်းလာမယ်ဆိုတာ ဒီနေ့မှ သိတော့ ဒီနေ့သွားကြိုကြတာပေါ့နော်။ သူတို့ အုမ္မငါးဆိုတဲ့ ရွာမှာနေတာလည်း လုံခြုံပါတယ်။ သို့သော်လည်းပဲ စားရေး သောက်ရေး အခက်ခဲဖြစ်တာပေါ့” ဟု ကျောက်မဲမြို့နယ် ဇီဝိတ လူမှုကူညီရေးအသင်း ဥက္ကဋ္ဌ ဦးတင်မောင်သိန်း က သျှမ်းသံတော်ဆင့် ကိုပြောသည်။
RCSS/SSA နှင့် TNLA တို့သည် ၂၀၂၀ ခုနှစ် ဒီဇင်ဘာ (၂၅) ရက်မှ စတင်ကာ ယနေ့ချိန်ထိ စစ်ရေးတင်းမာနေပြီး တိုက်ပွဲကြောင့် ကျောက်မဲမြို့ပေါ်ရှိ စစ်ရှောင် (၁၀၀၀)ကျော် ထွက်ပြေးတိမ်းရှောင်ခဲ့ကြောင်းသိရသည်။
Leave a Comments