သျှမ်းပြည် မြောက်ပိုင်း မူစယ် တရုတ်နယ်စပ်တွင် အဝင်အထွက်ဂိတ်များ၌ တင်းကြပ်စစ်ဆေးမှု ရှိနေကြောင်း သတင်းရရှိသည်။
မေ ၁၂ ရက်နေ့ တအာင်း (ပလောင်) အမျိုးသားလွတ်မြောက်ရေး တပ်မတော် ( TNLA ) နှင့် မြန်မာတပ်မတော်၊ ပြည်သူ့စစ် တို့ကြား တိုက်ပွဲ ဖြစ်ပွားပြီးနောက်ပိုင်း မူစယ် တရုတ်နယ်စပ် ဂိတ် ဝင်၊ ထွက် သွားလာခွင့် များအား တင်းကြပ်စစ်ဆေးသဖြင့် တရုတ်ဘက်ခြမ်းသို့သွားရောက်အလုပ်လုပ်သူများ ၊ ကုန်သည်များ ခရီးသွားများ အခက်အခဲဖြစ်နေရကြောင်း သိရသည်။
“ တိုက်ပွဲ ဖြစ်ပြီးနောက်ပိုင်းမှာ တရုတ်ဘက်က တင်းကြပ်လိုက်တာပဲ။ တရုတ် နယ်စပ် ဝင်ဂိတ်တွေ အားလုံး ပဲ လူတွေပြည့်ကြပ်နေတာ။ ဝင်၊ထွက် တွေ မှာ လက်ဗွေလည်း ယူ၊ တံဆိပ်လည်း ထုတော့ အချိန်တွေက ကြာသွားတာပါ ”- ဟု မူဆယ်မြို့ သျှမ်းစာပေ နှင့် ယဉ်ကျေးမှု တွဲဖက် အတွင်းရေးမှူး စိုင်းလောဝ်လျန်းပန် က ပြောသည်။
လက်ရှိမှာ တရုတ်ပြည် ဘက် သို့ ပစ္စည်းသွားရောက်ဝယ်သည့် သူများ၊ အလုပ်သွားလုပ်မည့် သူများအတွက် အခက်အခဲကြုံနေကြကြောင်း လည်း စိုင်းလောဝ်လျန်းပန် က ပြောသည်။
“ အလုပ်သွားမယ့်သူကတော့ မနက် ဂိတ်မဖွင့်ခင် ကတည်းက တန်းသွားစီကြတယ်။ မနက် ၆နာရီ ကတည်းက သွားတန်းစီနေကြပြီ” ဟု စိုင်းလောဝ်လျန်းပန် က ဆိုသည်။
ဆက်လက်ပြီး မူဆယ်မြို့နေ စိုင်းမြတ်က “ တရုတ်ပြည်သွားတဲ သူ တွေရဲ့ လက်ချောင်းတွေ အားလုံးကို လက်ဗွေ နှိပ်ရတယ်။ ပြသာနာ တခုခု ဖြစ်ရင် သူတို့ ရှာလို့လွယ်အောင်ပါ။ အရင်တခါကလည်း လူပ်ဖူးတယ်။ Scan ဖတ်တယ်။ မအောင်မြင်ခဲ့ဘူး” ဟု ပြောပြသည်။
မူဆယ် တရုတ်နယ်စပ် မေ ၁၂ ရက်နေ့တွင် ဖြစ်ပွားသည့် တိုက်ပွဲတွင် တရုတ်နိုင်ငံသား ၃ ဦး သေဆုံးခဲ့ကြောင်း မေ ၁၉ ရက် တရုတ်ကာကွယ်ရေး ဝန်ကြီးဌာ၏ ထုတ်ပြန်ကြေညာချက်တွင် ဖော်ပြထားသည်။
နယ်စပ် တွင် တိုက်ပွဲ ဖြစ်ပွားမှုကြောင့် တရုတ်နယ်မြေ အတွင်း လက်နက်ကြီးကျည် ၃ လုံး နှင့် ကျည်ဆံ အများအပြား ကျခဲ့ကြောင်း၊ မြန်မာ နယ်စပ် တွင် ဖြစ်နေသည့် တိုက်ပွဲများကို အနီးကပ် စောင့်ကြည့်ပြီး တရုတ် မြန်မာ နယ်စပ် ရှိ လုံခြံုရေး ကို တိုးမြှင့်ထားကြောင်းလည်း ထုတ်ပြန်ကြေညာခဲ့သည်။
ဆက်လက်ပြီး တရုတ်ပြည်သို့ ပစ္စည်းသွားဝယ်သည့် နန်းအေဟန် က “ တရုတ်တွေဘက်က ပစ္စည်းသွားဝယ်ရင် နယ်စပ် ဂိတ်ဖြတ်ဖို့ အကြာကြီးရပ်စောင့်ရတယ်။ နောက် လက်ဗွေတွေလည်း အားလုံးယူတယ်။ ဒီလို ဖြစ်နေတာ တပတ်လောက်ရှိပြီ။ အချိန်အကြာကြီး ရပ်စောင့်ရတယ်” ဟု ပြောသည်။
တရုတ်ပြည်သို့ ဝင်ရန် မူဆယ်မြို့တွင် မန့်ဝိန်းဂိတ်၊ ရွှေနန်းတော် ဂိတ် နှင့် ဆင်ဖြူ ဂိတ်ရှိပြီး မန့်ဝိန်း ဂိတ်တွင် ကုန်သည်ကားများ အတွက် အသုံးပြုကာ ကျန် ၂ဂိတ်တွင် လူဝင်၊ထွက်သွားလာခွင့်ပြုထားကြောင်း သိရသည်။
Leave a Comments