သျှမ်းပြည်မြောက်ပိုင်းမူဆယ်မြို့ရှိ ပြည်သူ့စစ်နေအိမ်များနှင့် ခြံဝန်းများကို ယနေ့ (ဇန်နဝါရီ ၆)ရက် မနက် ၅နာရီဝန်းကျင် တွင် လက်နက်ကြီး၊ လက်နက်ငယ်များဖြင့် အမည်မသိ လက်နက်ကိုင်တပ်ဖွဲ့က လာရောက်ပစ်သွားကြောင်း စုံစမ်းသိရသည်။
ဖြစ်စဉ်မှာ သျှမ်းပြည်မြောက်ပိုင်း ယနေ့ မနက် ၅နာရီခန့် တွင် ကောင်းမူတုံရပ်ကွက်ရှိ မြို့မ ပြည်သူ့စစ် အဖွဲ့ဝင်နေအိမ် ကို ၄၀ မမ ဗုံးသီး (၃)လုံး နှင့်လက်နက်ငယ် (၁၀ချက်)ခန့့်လာရောက်ပစ်ခတ်သွားကာ နေအိမ်မှန်တံခါး ပျက်စီးကာ လူထိခိုက်မှုမရှိခဲ့ကြောင်း မူဆယ်မြို့မ ရဲစခန်း မှ စုံးစမ်းသိရသည်။
အလားတူ ယနေ့ မနက် ၅နာရီခွဲတွင်လည်း မူဆယ်-နမ့်ခမ်း ပြည်ထောင်စုလမ်းမဘေးရှိ သံလွင်စက်သုံးဆီ နှင့် မုံးပေါ် စက်သုံးဆီ အရောင်းဆိုင် လမ်းကြားရှိ တာမိုးညဲပြည်သူ့စစ်နှင့် ပြိန်းဆာ ပြည်သူ့စစ်အဖွဲ့နေထိုင်သည့် ခြံဝန်းတွင် ပြောက်ကျားဝတ်ထားသည့် (၃)ဦးသည် Surf ခဲရောင်ယာဉ်ဖြင့် ၄၀ မမ ဗုံးသီး (၅)လုံးနှင့် လက်နက်ငယ်(၂၀) ချက်ခန့် လာရောက်ပစ်သွားကာ နေအိမ်ခြံတံခါးပျက်စီးပြီး လူထိခိုက်မှုမရှိကြောင်းသိရသည်။
“ မနက် ၅နာရီ ကျော်လောက်က ပြည်သူ့စစ်အဖွဲ့တွေနေတဲ့အိမ်တွေကို လက်နက်တွေလာပစ်သွားတာ။ တနေရာတောင်မဟုတ်ဘူး ၂နေရာတောင်မှ ဖြစ်တာ။ ခြံဝန်းတံခါး ပျက်စီးတယ်။ နေအိမ်မှန်တံခါး ပျက်စီးတယ်။ လူတော့ထိခိုက်မှုမရှိဘူး။ ” ဟု စွမ်စော်ရပ်ကွက်တွင် နေထိုင်သည့် အမျိုးသားတဦးက သျှမ်းသံတော်ဆင့်ကို ပြောသည်။
အဆိုပါ ပြည်သူ့စစ်နေထိုင်သည့်နေအိမ်ခြံဝန်းကို ဗုံး၊ လက်နက်ဖြင့်လာရောက်ပစ်ခတ်မှုသည် စဉ်းစားစရာဖြစ်ကြောင်း၊ အချင်းချင်းကြား ဝေစုမတည့်ကာ ဖြစ်သည့်ကိစ္စလည်းဖြစ်နိုင်ကြောင်း ၎င်းအမျိုးသား က မှတ်ချက်ပြုသည်။
ပြည်သူ့စစ်များနေထိုင်သည့်နေအိမ်ကို လက်နက်ကြီး၊လက်နက်ငယ်များဖြင့်လာရောက်ပစ်ခတ်မှုနှင့် ပတ်သတ်ပြီး သက်ဆိုင်ရာ မှ စုံစမ်းစစ်ဆေးနေဆဲ ဖြစ်ကြောင်း၊ အခင်းဖြစ်ပွားသည့်နေရာများကို သက်ဆိုင်ရာ ရဲတပ်ဖွဲ့၊ တပ်ဖွဲ့ က သွားရောက် ရှင်းလင်းပေးနေကြောင်းလည်း မူဆယ်မြို့မရဲစခန်းမှ စုံစမ်းသိရသည်။
Leave a Comments