သျှမ်းပြည်မြောက်ပိုင်း ကျောက်မဲမြို့နယ် တော့ဆန်တိုက်ပွဲကြောင့် စစ်ရှောင် (၁၀၀) ကျော် အတွက် စားနပ်ရိက္ခာနှင့် အဝတ်များ လိုအပ်နေကြောင်း စုံစမ်းသိရှိရသည်။

ထို စစ်ရှောင် (၁၀၉) ဦးသည် ဇန်နဝါရီ (၃)ရက် နေ့တွင် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA)နှင့် တအာင်း (ပလောင်) အမျိုးသားလွတ်မြောက်ရေး တပ်မတော်(TNLA) တို့ ကြားကျောက်မဲမြို့နယ် တော့ဆန်အနီးတွင် တိုက်ပွဲဖြစ်ပွားမှုကြောင့် ဒေသခံ (၁၀၉ )ဦး အုမ္မငါးဘုန်းကြီးကျောင်းတွင်း စစ်ပြေးရှောင်လာခဲ့ရပြီး လက်ရှိမှာ ထိုစစ်ဘေးရှောင်များ အတွက် စားနပ်ရိက္ခာနှင့် အဝတ်အစားများလိုအပ်နေကြောင်း ကျောက်မဲမြို့ စစ်ဘေးရှောင်များ ကူညီပေးနေသည့် ဦးတင်မောင်သိန်း က သျှမ်းသံတော်ဆင့် ကို ပြောသည်။

“ရွာက ဘုန်းကြီးပြောတာတော့ ကိုယ်လွှတ်ကြိုတင်ရှောင်လာရတဲ့အတွက် အဝတ်အစားတွေလည်း မပါဘူး။ အနွေးထည်လည်းမပါဘူး။ လိုအပ်နေတာကတော့ အဝတ်အစားတွေ အနွေးထည်တွေ လိုအပ်ပါတယ်။ ရောက်ရောက်ချင်း ရွာကတော့ ဝိုင်းပြီး ကျွေးမွေးထားတဲ့ အနေအထားဖြစ်တော့ ဒီထက် နည်းနည်းကြာမယ်ဆိုရင်တော့ ရိက္ခာလုံးဝ အခက်ခဲ ဖြစ်သွားနိုင်တယ်။ မကျွေးနိုင်တော့ဘူး” ဟု ဦးတင်မောင်သိန်း က ဆိုသည်။

ကျောက်မဲမြို့နယ် အတွင်း RCSS/SSA နှင့် TNLA တို့ တိုက်ပွဲပြင်းထန်မှုဖြစ်လာခဲ့သည်မှာ ၃ရက်ရှိလာပြီးဖြစ်ကြောင်း၊ နှစ်ဖက်စစ်အင်းအား ဖြည့်တင်းမှုကြောင့် ဒေသခံများအတွက် အခြေအနေမကောင်းကာ ထွက်ပြေးတိမ်းရှောင်လာကြခြင်းဖြစ်ကြောင်း ဦးတင်မောင်သိန်း က ပြောသည်။

“ဒီနေ့နဲ့ဆို ၃ ရက်ရှိပြီ။ တိုက်ပွဲဖြစ်တာက မနေ့က အကြီးအကျယ်ဖြစ်တာပေါ့နော်။ သို့သော်လည်း ရှေ့ကရက်တွေကလည်း အနည်းအကျဉ်းတော့ ခြောက်လှန့်ပစ်ခတ်တာမျိုးတော့ ရှိတာပေါ့။ စစ်အင်အားတွေ ဖြည့်တင်းထားတဲ့ အခြေနေလည်း ဒေသခံတွေ သိဟန်တူတယ်။ အခြေနေမကောင်းတော့ဘူးဆို ကြိုပြီးတော့ ထွက်လာကြတာ” ဟု ဦးတင်မောင်သိန်း က ပြောသည်။

ဒီဇင်ဘာ(၂၅)ရက်နေ့မှ စတင်ပြီး ယနေ့ထိ RCSS နှင့် TNLA တို့သည် တိုက်ပွဲအကြိမ်ရေ (၂၀) ထက်မနည်း ဖြစ်ပွားခဲ့ကြောင်း RCSS/SSA ၏ ပြောဆိုဆိုခွင့်ရှိသူ ဒုဗိုလ်မှူးကြီး အုမ်ခေး ကပြောသည်။

သျှမ်းပြည်မြောက်ပိုင်း ကျောက်မဲခရိုင် အတွင်း ဒီဇင်ဘာ (၂၅) ရက်မှ စတင်ကာ RCSS နှင့် TNLA တို့တိုက်ပွဲဖြစ်ပွားမှုကြောင့် စစ်ဘေးရှောင် (၁၀၀၀) ကျော် ထွက်ပြေးတိမ်းရှောင်နေရကြောင်း သိရသည်။