သျှမ်းပြည် အရှေ့ပိုင်း အထူးဒေသ(၄) မိုင်းလားမြို့ အတွင်း ရှိ နေတိုင်းသည့်သူများအားလုံး ကိုဗစ်-၁၉ ဓာတ်ခွဲနမူနာ မစစ်ဆေးရသေးသူများရှိပါက တိုင်ကြားနိုင်ကြောင်း မိုင်းလား ကိုဗစ်-၁၉ ရောဂါ ကာကွယ်ထိန်းချုပ်ရေး လုပ်ငန်း ဦးစီးအဖွဲ့ က ထုတ်ပြန်ကြေညာခဲ့သည်။
မိုင်းလားမြို့တွင်းရှိ အာခေါင်တို့ဖက် ဓာတ်ခွဲနမူနာ စစ်ဆေးမှုကို တဦးတယောက်မျှ မကျန်အောင် စစ်ဆေးပေးနိုင်ရန် အတွက် ဓာတ်ခွဲနမူနာ မစစ်ဆေးရသေးများသူ အမြန်လာရောက် စစ်ဆေးကြရန် နှင့် အာခေါင်တို့ဖက် နမူနာ မစစ်ဆေးသူများအား တိုင်ကြားပါက ဆုငွေချီးမြှင့်သည့် စနစ်ကိုလည်း ကျင့်သုံး ဆောင်ရွက်သွားမည်ဖြစ်ကြောင်း ဒီဇင်ဘာ ၃၁ရက်နေ့တွင် ထုတ်ပြန်ကြေညာခဲ့သည်။
မိုင်းလားမြို့ တွင်နေထိုင်သည့် မိဘပြည်သူများ၊ လုပ်ငန်းရှင်များနှင့် လူ့အဖွဲ့အစည်း အသီးသီးမှ ပုဂ္ဂိုလ်များ ဓာတ်ခွဲနမူနာ မစစ်ဆေးရသေးများအား တွေ့ရှိပါက တိုင်ကြားနိုင်ကြောင်း၊ မစစ်ဆေးရသေးကြောင်း အတည်ပြုပြီးပါက တဦးလျှင် ဆုငွေ ယွမ် (၃၀၀) ချီးမြှင့်ပေးသွားမည် ဖြစ်ကြောင်းလည်း ထုတ်ပြန်ချက်တွင်ရေးသားထားသည်။
အဆိုပါ ကြေညာချက်သည် မိုင်းလား အထူးဒေသ (၄) နှင့် နီးစပ်သည့် “ဝ” အထူးဒေသ(၂) UWSA နယ်မြေ အတွင်း ဒီဇင်ဘာ (၂၄)ရက်မှစတင်ကာ ကိုဗစ်-၁၉ အတည်ပြုလူနာများလာသည့်အတွက် ထုတ်ပြန်လိုက်ကြောင်း သိရသည်။
“ဝ” အထူးဒေသ (၂)တွင် ဒီဇင်ဘာ ၂၄ရက်မှ စတင်ကာ ၂၀၂၁ခုနစ် ဇန်နဝါရီ ၁ရက် အထိ ကိုဗစ်-၁၉ ကူးစက်ခံရသူ စုစုပေါင်း (၆၁)ဦးရှိကာ ထိုထဲတွင် ပန်းခမ်းမြို့ တွင် အတည်ပြုလူနာ (၃၂)ဦးနှင့် မိုင်းပေါက်ခရိုင်တွင် အတည်ပြုလူနာ(၂၉ )ဦးတို့ ရှိကြောင်း “ ဝ” အထူးဒေသ(၂) သတင်းထုတ်ပြန်ချက် အရ သိရသည်။
လက်ရှိမှာ မိုင်းလား အထူး ဒေသ (၄) တွင် ကိုဗစ်-၁၉ အတည်ပြုလူနာ မရှိသေးသဖြင့် “ဝ” အထူးဒေသ(၂) သို့ အသွားအလာ ကို ကန့်သတ်ထားကြောင်းသိရသည်။
