ရွေးကောက်ပွဲအလွန်ကာလ တောင်ကြီးမြို့ပေါ်တွင် ကိုဗစ်ကူးစက်မှု ပိုမိုမြင့်တက်လာ

ရွေးကောက်ပွဲအလွန်ကာလတွင် တောင်ကြီးမြို့နယ်၌ ကိုဗစ်ပိုးကူးစက်ခံရမှု ပိုမိုမြှင့်တက်လာကြောင်း ကိုဗစ်ဖြစ်ပွားသူများအား ကူညီပေးနေသည့် မြို့နယ်အထူးအဖွဲ့များမှ သိရသည်။

တောင်ကြီးမြို့တွင် ဒီဇင်ဘာ ၃၀ ရက်က ရှမ်းတောင် ယဉ်ထိန်းရဲ ဒု-တပ်ဖွဲ့ခွဲမှူးရုံး အမှတ် ၁၈ ယာဉ်ထိန်းတပ်ဖွဲ့မှ ၁၆ ဦးတွင် ကိုဗစ်ပိုးတွေ့ခဲ့ပြီး ၎င်းတို့မိသားစုခြောက်ဦးတွင်လည်း ပိုးကူးစက်ခံထားရကြောင်းနှင့် ယင်းမြို့နယ်တွင် တစ်ရက်အတွင်း ပိုးကူးစက်ခံရသူ ၂၂ ဦးအထိ ရှိလာပြီး စံချိန်သစ်တင်ခဲ့ကြောင်း မြို့နယ်ကိုဗစ်အထူးအဖွဲ့မှ ဦးဝင်းနိုင်စိုးက ပြောသည်။

“ဘယ်ကနေဘယ်လိုကူးစက်ခံရတာလဲဆိုတာကိုတော့ ကောက်ချက်ချလို့မရသေးဘူး။ ဒီတစ်ခေါက်ကတော့ ပိုများသွားနိုင်တယ်၊ အခုထိလည်း ကျွန်တော်တို့ ထိတွေ့မှုရှိသူတွေကို ရပ်ကွက်တွေထဲ လိုက်လံခေါ်ဆောင်နေပါတယ်” ဦးဝင်းနိုင်စိုးကပြောသည်။

ပြီးခဲ့သည့် နိုဝင်ဘာလတွင် တောင်ကြီးမြို့ မင်္ဂလာဦးရပ်တွင် ပိုးကူးစက်ခံရမှုကြောင့် အဆိုပါရပ်ကွက်ကို lock down ချထားကာ ယခု ရက်ပိုင်းမှ ပြန်လည်ဖြေလျော့ပေးခဲ့ခြင်းဖြစ်ကြောင်း သိရသည်။

“ရွေးကောက်ပွဲ မဲဆွယ်နေတဲ့ကာလနဲ့ ရွေးကောက်ပွဲကျင်းပတဲ့ နေ့တုန်းကတောင် ကူးစက်မှုဒီလောက်မများသေးဘူး။ ဘာဖြစ်လို့လဲဆိုတော့ လူတွေက တစ်ဖွဲ့နဲ့တစ်ဖွဲ့ စောင့်ကြည့်နေကြတယ်။ ကျန်းမာရေး အကာအကွယ်တွေလဲ သေချာဝတ်ဆင်ကြတယ်။ အခုအချိန် ဘာလို့များသွားလဲဆိုတော့ ပေါ့ဆသွားကြတာလည်းပါတယ်။ စည်းကမ်းဖြေလျော့ပေးမှုခဲ့တာတွေလည်း လုပ်လိုက်တော့ ပိုကူးစက်လာကြတယ်ထင်ပါတယ်” ဟု တောင်ကြီးဒေသခံ ဒေါ်နန်းဆိုင်စံကပြောသည်။

ထိုသို့ ရှမ်းပြည်နယ် တောင်ကြီးမြို့နယ်တွင် ရွေးကောက်ပွဲအလွန်ကာလ၌ ကိုဗစ်တွေ့ရှိမှု မြင့်တက်လာသည်ဟုဆိုသော်လည်း တစ်နိုင်ငံလုံး အတိုင်းအတာဖြင့်ပို့တွေ့ရှိမှုသည် ယခုရက်ပိုင်းအတွင်း ကျဆင်းလာလျက်ရှိကြောင်းနှင့် ဒီဇင်ဘာ ၂၁ ရက်မှ ၃၀ ရက်အထိ ပိုးတွေ့မှုသည် ၄ ရာခိုင်နှုန်းရှိရာမှ ၃ ဒသမ ၅ ရာခိုင်နှုန်းအထိ ကျဆင်းခဲ့ကြောင်း ကျန်းမာရေးဝန်ကြီးဌာန၏ ထုတ်ပြန်ချက်များအရ သိရသည်။

လက်ရှိတွင် တောင်ကြီးမြို့မစျေးကြီးအား ကိုဗစ်ပိုးကူးစက်ခံရမှုကြောင့် ယခင်ယာယီပိတ်ထားခဲ့သော်လည်း ဒီဇင်ဘာ ၃၀ ရက်၌ ပြန်လည်ဖွင့်လှစ်ပေးခဲ့ကြောင်းသိရသည်။