တောင်ကြီး မြို့ ၏ တောင်ဘက် (၂) မိုင်ခန့်ရှိ နှစ်ရှည်ထင်ရှူးတောတည်ရှိရာ နေရာတွင် ပန်းချယ်ရီအိမ်ယာ စီမံကိန်း အကောင်အထည်ဖော်တည်ဆောက်မည့် ကိစ္စနှင့် ပတ်သက်၍ တောင်ကြီး မြို့ခံများ မှ ကန့်ကွက်ထားကြောင်း Living Earth Green Network အဖွဲ့မှ ဒေါ်ချယ်ရီကျော် ထံမှသိရသည် ။

“ ကျမတို့က စီမံကိန်းကို ကန့်ကွက်တာမဟုတ်ဘူး ။ စီမံကိန်းအကောင်အထည်ဖော်တဲ့အခါ နှစ်ရှည် ထင်းရှူးပင်တွေ အကုန်ပျက်စီးကုန်လို့ကန့်ကွက်တာ ” ဟု ဒေါ်ချယ်ရီကျော် ကပြောသည် ။

နှစ်ရှည်ပင်များ ပျက်စီးမှုကြောင့် တောင်ကြီး မြို့၏ ရာသီဥတုမှာ ယခင်ကထက် သိသိသာသာပြောင်း လဲလာပြီး မိုးရေချိန် ရက် တစ်ရာ ထက်လျော့နည်းလာကြောင်း ၎င်းကပြောသည် ။

တောင်ကြီး မြို့သည် မြေအောက်ရေကိုသာ အားထားနေရသော မြို့တစ်မြို့ ဖြစ်သဖြင့် သစ်ပင်သစ်တောများ ပြုန်းတီးကာ သဘာ၀ပတ်ဝန်းကျင် ပျက်စီးပြီး ရေရရှိမှုထိခိုက် နိုင်သဖြင့် မြို့နေလူထုများ ရေချို ၊ ရေသန့် နှင့် ရေရှားပါးမှု ရင်ဆိုင်ရဖွယ် ရှိကြောင်း သိရသည်။

ယခုဆောင်ရွက်နေသော ပန်းချယ်ရီအိမ်ယာ စီမံကိန်းသည် ဧရိယာစုစုပေါင်း (၁၂၇.၁၅၃) ဧကကျယ်၀န်းသည်ဖြစ်ရာ တောင်ကြီး မြို့၏ ရေမြေတောတောင် စိမ်းလန်းစိုပြေမှု ၊ သဘာ ၀ ရာသီဥတု ၊ ရေဝေရေလဲများ ကို ထိန်းသိမ်းပေးနေသော နှစ်(၅၀)မှ နှစ် ၁၀၀ ကျော် သက်တမ်းရှိ ထင်ရှူးပင်ပေါင်းသောင်းချီ ဖျက်ဆီးဖြိုလှဲခြင်း ၊ ထပ်မံဖျက်ဆီး ခြင်းခံရတော့မည့် အန္တရာယ်နှင့် ကြုံတွေ့နေရကြောင်း သဘာ၀ပတ်၀န်းကျင်အတွက်လှုပ်ရှားဆောင်ရွက်နေသော တောင်ကြီးဒေသခံများကပြောသည်။

ထို့အတွက်ဆောင်ရွက်နေဆဲ ဖြစ်သော ယင်းစီမံကိန်းအား အချိန်မှီထိန်းသိမ်းပေး နိုင်ရန် တောင်ကြီး မြို့ ခံများမှ နိုင်ငံတော် အတိုင်ပင်ခံ ၊ နိုင်ငံတော်သမ္မတ နှင့် ရှမ်းပြည်နယ် အစိုးရအဖွဲ့အား ပြန်လည်စီစစ် ပေး နိုင်ရန် ဒီဇင်ဘာ ၁၀ ရက်နေ့က စာတင်တောင်းဆိုထားကြောင်းလည်း သိရသည်။

အဆိုပါ ပန်းချယ်ရီအိမ်ယာ စီမံကိန်း ကို ဦးသိန်းစိန် အစိုးရ ရှမ်းပြည်နယ် ဝန်ကြီးချုပ် စဝ်အောင်မြတ်လက်ထက်က သဘောတူလက်မှတ်ရေးထိုးခဲ့ခြင်းဖြစ်ပြီး ယခု ပန်းချယ်ရီအိမ်ယာ(၂)စီမံကိန်းအတွက် သဘောတူညီမှုစာချုပ် MOA လက်မှတ် ရေးထိုးခြင်းကို ဒီဇင်ဘာလ(၁) ရက် နေ့က ရှမ်းပြည်နယ်အစိုးရအဖွဲ့၊ ပြည်နယ် ဒေသန္တရဖွံ့ဖြိုးတိုးတက်ရေးစီမံကိန်းကော်မတီနှင့် Maw Shan Development Publice Co.,Ltd တို့မှရှမ်းပြည်နယ်အစိုးရရုံး အစည်းအဝေး ခန်းမတွင် ကျင်းပပြုလုပ်ခဲ့ ကြောင်းသိရှိရပါသည် ။