သျှမ်းပြည်အရှေ့ပိုင်း ကျိုင်းတုံမြို့နယ် နောင်ငင်းကျေးရွာ ဒေသခံပိုင်ဆိုင်သည့် မြေများကို သိမ်းဆည်းပြီး စက်မှုဇုန် တည်ဆောက်မည်ဖြစ်သဖြင့် ဒေသခံများကို မကန့်ကွတ်ရန် သက်ဆိုင်ရာ အာဏာပိုင် မှ လာရောက် ခြိမ်းခြောက်ခဲ့ကြောင်း ဟု စုံစမ်းသိရသည်။
ယခုလ ၁၄ရက်တွင် ကျိုင်းတုံမြိ့နယ် နောင်ငင်းကျေးရွာမှ ဒေသခံများကို အုပ်ချုပ်ရေးမှူးမှ ဆင့်ခေါ်ကာ အစိုးရမှသိမ်းမည့် မြေဧက (၅၅)ဧကပေါ် စက်မှုဇုန်တည်ဆောက်မည်ဖြစ်သဖြင့် ဒေသခံများမကန့်ကွက်ရန်နှင့် ကန့်ကွက်ပါက မည်သူမဆို ပြစ်ဒဏ်ပေးသွားမည် ဖြစ်ကြောင်း ခြိမ်းခြောက်စကားပြောဆိုခဲ့ကြောင်း ကျိုင်းတုံမြို့ ရှမ်းအမျိုးသားဒီမိုကရေစီ အဖွဲ့ချုပ် (SNLD) အတွင်းရေးမှူး လုံးစိုင်းကျောက် က သျှမ်းသံတော်ဆင့်ကို ပြောသည်။
လက်ရှိ အစိုးရမှ သိမ်းမည့်မြေပေါ်တွင် နောင်ငင်းကျေးရွာမှ ရွာသားများသည် လယ်ယာစိုက်ပျိုးမှု ပြုလုပ်နေသေးကြောင်း၊ သို့သော် သက်ဆိုင်ရာမှလာရောက်သိမ်းကာ ဆက်လက် စိုက်ပျိုးနေကြောင်း လည်း သိရသည်။
“ ဖြစ်စဉ်က ခရိုင်အုပ်ချုပ်ရေးမှူးကနေပြီးတော့ ကျေးရွာအုပ်ချုပ်ရေးမှူးကို ပြောလာတာပါ။ သူတို့လာသိမ်းရင် မကန့်ကွက်နဲ့၊ ကန့်ကွက်ရင်လဲ သူတို့က ကျနော်တို့ကို အရေးယူနိုင်တယ်” ဟု လုံးစိုင်းကျောက် ကပြောသည်။
မြေသိမ်းပြီး စက်မှုဇုန်ပြုလုပ်မည့် နေရာသည် နှစ်ရှည်သီးနှံစိုက်ပျိုးထားသည့်မြေများဖြစ်ပြီး၊ မြေပိုင်ရှင် ၂၃ဦးပိုင်ဆိုင်သည့် မြေကွက်များဖြစ်ကာ၊ သက်ဆိုင်ရာကို မြေပြန်လည်ရရှိရန် သက်ဆိုင်ရာတို့ အသနာစာတင် တောင်းဆိုထားကြောင်း ဖြစ်ကြောင် မြေသိမ်းခံရသည့်သူများက ပြောဆိုလိုက်သည်။
“ ကျနော်တို့ အသနားစာတင်ပြီးတော့ ရွာသားတွေကို ပြန်လုပ်စားနိုင်ဖို့တောင်းဆိုထားတယ်။ လုပ်စားလာတာ ခုချိန်ထိဘဲ။ အခုချိန်ခါကြတော့ သူတို့နေဖို့လိုတယ်” ဟု လုံးစိုင်းကျောက် ကပြောသည်။
ကျိုင်းတုံ နောင်ငင်းကျေးရွာ ဒေသခံပိုင် မြေများကို ၁၉၉၅ ခုနှစ်တွင်လည်း တြိဂံတိုင်းစစ်ဌာနချုပ်မှသိမ်းဆည်းခဲ့ပြီး ဒေသခံများ ပြန်လည် တောင်းဆိုမှုကြောင့်၂၀၁၆ခုနစ်တွင် ဒေသခံများကို ပြန်လည်ပေးခဲ့သည်။
သို့သော် ထိုပြန်ပေးသည့်မြေကွက်များစာရွက်စာတမ်း ပုံစံ(၇)များကို အုပ်ချုပ်ရေးမှူးရုံးတွင် သိမ်းဆည်းထားကြောင်းသိရသည်။
