သျှမ်းပြည် တဝှမ်းတွင် ဆိုင်ထိုင်စားခွင့်ရသည့် စားသောက်ဆိုင် (၁၀၀၀) ကျော် ကို ယနေ့ (ဒီဇင်ဘာ ၂၃ )ရက် မှ စတင်ပြီး ပြန်လည်ဖွင့်လှစ်ခွင့်ဖြစ်ကြောင်း စုံစမ်းသိရှိရသည်။
ကိုဗစ်-၁၉ ကူးစက်မှု ဖြစ်ပွားနေသည့် အချိန်အတောအတွင်း စားသောက်ဆိုင်များကို အဆင့်(A)(B)(C)အဖြစ် သတ်မှတ် ထားပြီး၊ လက်ရှိမှာ အဆင့်(A) သတ်မှတ်ထားသည့်ဆိုင်များကိုသာ ဆိုင်ထိုင်စားအဖြစ် ဖွင့်ခွင့်ပေးထားကြောင်း သျှမ်းပြည်အစိုးရအဖွဲ့ အတွင်းရေးမှူး ဦးနေလင်း က သျှမ်းသံတော်ဆင့်ကိုပြောသည်။
“ အရင်တုန်းက လဲ A B C ဆိုင်ဆိုပြီး အဆင့်သတ်မှတ်ပြီးတော့ စစ်ဆေးထားပါဆိုတဲ့ညွှန်ကြားချက်ရှိတယ်လေ။ အခုက A အဆင့်ရှိတဲ့ဆိုင်တွေကို အရင်ဆုံးဖွင့်ခွင့်ပြုထားတယ် “ ဟု သျှမ်းပြည်နယ် အစိုးရအဖွဲ့ အတွင်းရေးမှူး ဦးနေလင်း ကပြောသည်။
အဆိုပါ ဆိုင်ထိုင်စားဖွင့်ရထားသည့် ဆိုင်ပေါင်း (၁၀၀၀)ကျော်ကို ကိုဗစ် ၁၉ နှင့်အညီ မြို့နယ်လိုက် စောင့်ကြည်ဆောင်ရွက်နေမည်ဖြစ်ပြီး အချိန်ပြည့် စစ်ဆေးသွားမည် ဟုလည်း ဦးနေလင်းက ပြောသည်။
“ ကျနော်တို့ မြို့နယ်အလိုက် တာဝန်ရှိသူတွေမှ စောင့်ကြည့်နေမှာဖြစ်တယ်။ အချိန်ပြည့် စောင့်ကြည့်စစ်ဆေးရေး ဝင်နေမယ်။ စည်းကမ်းချိုးဖောက်တာရှိရင် ချက်ချင်းသတိပေး ဆုံးမတာရှိမယ်။ နောက်ဆုံးကြရင်တော့ အပြီးပိတ်ခိုင်းတဲ့ အဆင့်ထိသွားမယ်” ဟု ဦးနေလင်း ကဆိုသည်။
အသွားအလာကန့်သတ်ထားသည့် ကျေးရွာ၊ ရပ်ကွက်အတွင်းရှိ အဆင့်(A)သတ်မှတ်ထားသည့် ဆိုင်များမှာ လက်ရှိအချိန်ထိ ဖွင့်ခွင့်မရသေကြောင်းလည်း ဦးနေလင်းက ပြောသည်။
ဆိုင်များ ပြန်လည်ဖွင့်ခွင့်ရသည့်အပေါ် တောင်ကြီးမြို့နယ် ကိုဗစ်-၁၉ ကာကွယ်တားဆီးရေးတွင် ပရဟိတလုပ်နေသည့် ဝင်နိုင်းစိုးက “ ဆိုင်ဖွင့်လိုက်တာမှပိုကောင်းအုန်းမယ်။ အရင်ကတည်းက ၈၀ ရာခိုင်းနှုန်းလောက်က တံခါးပိတ်ပြီးတော့ ခိုးရောင်းနေကြတာဘဲ။ အခုဖွင့်ခိုင်းလိုက်တော့ လေဝင်လေထွက် ပိုကောင်းမွန်အောင်ရရှိသွားတာပေါ့” ဟု ပြောသည်။
ဆိုင်ထိုင်စားခွင့်ဖွင့်လိုက်သော်လည်း ပရဟိတ အဖွဲ့များမှ ကျန်းမားရေးဆိုင်ရာ နှင့် ပတ်သတ်၍ ပိုမို အသိပေးများ ကို ပြုလုပ်သွားရမည်ဖြစ်ကြောင်း၊ ပြည်သူများအနေဖြင့် mask များတပ်ဆင်ခြင်း၊ လက်ကို မကြာခဏ ဆေးကြောစေလိုကြောင်း ဝင်နိုင်စိုးက ထက်လောင်းပြောသည်။
မြန်မာနိုင်ငံတွင် ယနေ့အချိန်ထိ ကိုဗစ်-၁၉ ကူးစက်မှုနှုန်းမြင့်တက်နေပြီး၊ ဒီဇင်ဘာ (၂၂)ရက် ယနေ့ ၈နာရီတွင် ကျန်းမာရေးနှင့် အားကစားဝန်ကြီးဌာန ထုတ်ပြန်ချက်အရ ကိုဗစ်-၁၉ ကူးစက်သူ စုစုပေါင်း (၁၁၇,၉ ၄၆) ဦးရှိပြီး၊ သေဆုံးသူ စုစုပေါင်း (၂၄၈၄)ဦးရှိကြောင်း ထုတ်ပြန်ချက် အရသိရသည်။
