သျှမ်းပြည်တောင်ပိုင်း တောင်ကြီးမြို့နယ်တွင် ကိုဗစ်-၁၉ အတည်ပြု လူနာ ဆေးကုသမှု ခံယူထားသူ (၉) ဦး ကျန်ရှိကြောင်း စုံစမ်းသိရှိရသည်။

ဒီဇင်ဘာ (၂၁) ရက်နေ့ထိ တောင်ကြီးမြို့နယ်ရှိ ကိုဗစ်-၁၉ အတည်ပြု လူနာ စုစုပေါင်း (၁၃၈) ဦးရှိပြီး ဆေးရုံဆင်းခွင့်ရသူ (၁၂၈) ဦး ၊ ဆေးကုသမှု ခံယူသူ (၉) ဦး နှင့် သေဆုံးသူ (၁) ဦးရှိကြောင်း တောင်ကြီးမြို့နယ် ပြည်သူ့ကျန်းမာရေးဦးစီးဌာနမှူး ဒေါက်တာမိုးထွန်း က သျှမ်းသံတော်ဆင့် ကိုပြောသည်။

တောင်ကြီးမြို့နယ်ရှိ Quarantine Center တွင်းဝင်ရောက်သူ စုစုပေါင်း (၉၇၀) ဦးရှိပြီး Hotel Quarantine ဝင်ထားသူ (၂၂) ဦးရှိကြောင်း ဒေါက်တာမိုးထွန်း ကပြောသည်။

“လေကြောင်းလိုင်းနဲ့ ပြန်လာတဲ့သူတွေကို Hotel Quarantine (၂) ခု ထပ်တိုးထားပါတယ်” ဟု ဒေါက်တာမိုးထွန်း ကပြောသည်။

တောင်ကြီးမြို့ပေါ်ရှိ မင်္ဂလာဦးရပ်ကွက်သည် ပိုးတွေ့လူနာ အများဆုံး ရှိသည့်အတွက် ထိုရပ်ကွက်ကို Stay at Home အဖြစ် ဒီဇင်ဘာ (၂၅) ရက်နေ့အထိ သက်တမ်းတိုးထားကြောင်း လည်းသိရသည်။

“ ဒီလ ၁၁ရက် မှာ ပိုးတွေ့လူနာ (၅) ဦးရှိတဲ့အတွက်ကြောင့် မင်္ဂလာဦး ရပ်ကွက်အနေနဲ့ ဖြစ်ပွားမှုများတယ်ပေါ့နော်။ အဲ့ဒီနောက်ဆုံးတွေ့ရှိတဲ့ရက်ကနေ ၂ ပတ်အထိ ရောဂါကူးစက်မှု ဖြတ်တောက်နိုင်ရန်အတွက် ကျနော်တို့ သက်တမ်းတိုးလိုက်တာဖြစ်တယ်။ အဲ့ဒီအတွက်ကြောင့်မလို့ ၂၅ ရက်နေ့ထိ သက်တမ်းတိုးထားတာပဲ ဖြစ်ပါတယ်” ဒေါက်တာမိုးထွန်း ကပြောသည်။

ဒီဇင်ဘာ (၂၀)ရက်နေ့ ည(၈) နာရီ ထုတ်ပြန်ချက်အရ မြန်မာနိုင်ငံတွင် ကိုဗစ်-၁၉ အတည်ပြု လူနာအသစ် (၉၄၇) ဦး ၊ ဆေးရုံဆင်းခွင့်ရသူ ( ၁၂၆၉ ) ဦး နှင့် သေဆုံးသူ (၁၉ ) ဦးရှိကြောင်း အားကစားနှင့် ကျန်းမာရေး ဝန်ကြီးထုတ်ပြန်ချက်အရ သိရသည်။