သျှမ်းပြည်တောင်ပိုင်း၊ တောင်ကြီးမြို့နယ် အေးသာယာမြို့ ရပ်ကွက်အုပ်ချုပ်ရေးမှူးမှ စစ်မှုထမ်းမဲပေါက်သူထံ ပိုက်ဆံယူပြီး မဲမပေါက်သည့် လူငယ်ကို လူစားထိုးခေါ်ထည့် နေကြောင်း သတင်းရရှိသည်။

ပြီးခဲ့သည့် ဇွန်လ နောက်ဆုံးပတ်မှ စပြီး စစ်မှုထမ်း အမှတ်စဉ် (၁၅)အတွက် အေးသာယာတွင် မဲနှိုက် နယ်မြေ (၈) (က) ရပ်ကွက်တွင် သုံးဦးမဲပေါက်ပြီး မဲပေါက်သူ တစ်ဦးမှ စစ်မှုမထမ်းလိုသည့်အတွက် အုပ်ချုပ်ရေးမှူးကို ငွေကျပ်သိန်း(၆၀)ပေးခဲ့သည်။

သို့သော် အုပ်ချုပ်ရေးမှူးက ၎င်းငွေကိုယူပြီ မဲမပေါက်သည့် လူငယ်ကို အစားထိုး ခေါ်ထည့် ခဲ့ကြောင်း ဖြစ်စဉ် သိရှိသူ တစ်ဦးထံမှ သိရသည်။

“ရပ်ကွက်မှာ မဲနှိုက်တော့ သုံးယောက်မဲပေါက်တယ်။ အဲဒါကို မဲမပေါက်တဲ့ လူငယ်တစ်ယောက်ကို အုပ်ချုပ်ရေးမှူးက စာရင်းပါတယ် ဘာညာ ပြောပြီး လာခေါ်သွားတယ်။ ကောင်လေးရဲ့အဒေါ်တွေက တောင်ကြီးထွေအုပ်အထိ တက်ပေမဲ့ မရလိုက်ဘူး။ အေးသာယာ အုပ်ကြီးက စာရင်းကို မပေးဘဲ နေ့ရွှေ့ညရွှေ့လုပ်နေတာ ။နောက်မှ မဲပေါက်တဲ့ မိသားစုက အုပ်ကြီးကို သိန်း (၆၀) ပေးတာ သိရတာ။”ဟု အဆိုပါ အမျိုးသားက ပြောသည်။

လူစားထိုးထည့်ခံရသည့် လူငယ်မှာ အသက် (၂၁)နှစ်အရွယ်ဖြစ်ပြီး မိဘမရှိဘဲ အဒေါ်တွေနှင့် နေထိုင်သူဖြစ်ကာ ပြီးခဲ့သည့် ဇူလိုင်လ (၆)ရက်က ရပ်ကွက်အုပ်ချုပ်ရေးမှူးနှင့် စစ်ကောင်စီတပ်သားများက လာရောက်ခေါ်ဆောင်သွားကြောင်း ၎င်းက ဆက်ပြောသည်။

ထိုသို့ စစ်မှုထမ်းများကို လူစားထိုးထည့်နေသည်မှာ လူသားအရင်းမြစ်တွေကို ပြုန်းတီးစေပြီး ငွေရှိသည့် သူများသာ ကင်းလွတ်ခွင့်ရ၍ ငွေမရှိသည့် သူများသာလျှင် အသုံးချခံဖြစ်နေရကြောင်း အသက် (၃၀)အရွယ် အမျိုးသားတစ်ဉီး က သျှမ်းသံတော်ဆင့်ကို ပြောသည်။

“တခြားရပ်ကွက်တွေတော့ ဘယ်နှယောက်မဲပေါက်တာလဲ တော့မသိပါဘူး။ အခု ပိုက်ဆံရှိတဲ့ သားသမီးတွေက မဲပေါက်ရင် သူတို့က ငွေရှိတော့ လွှတ်တယ်။ လူသားအရင်းမြစ်တွေလည်း ဖြုန်းတယ်။ ငွေရှိတဲ့သူပဲ ကျန်ပြီး ငွေမရှိတဲ့သူကတော့ စစ်မှုထမ်းထဲ အစားထိုးခံကြရတာ။ ပိုက်ဆံမရှိတဲ့သူတွေကတော့ ဘယ်နေ့ အဆွဲခံရမလဲ စိုးရိမ်နေကြတာ။” ဟု ၎င်းက ဆက်ပြောသည်။

ပြီးခဲ့သည့် ဇွန်လနောက်ဆုံးပတ်မှ စတင်ပြီး တောင်ကြီးမြို့တွင် အမှတ်(၁၅) ပြည်သူ့စစ်မှုထမ်းအတွက် မဲနှိုက်ခေါ်ယူနေပြီး၊ ပြည်သူ့စစ်မှုထမ်းရန် အလှည့်ကျသူများ စစ်မှုမထမ်းချင်ပါက တသက်သာ ရှောင်ရှားခွင့်ဟုဆိုပြီး ငွေကျပ်(၈၀)ပေးရမည်ဟု စစ်ကောင်စီနှင့် ၎င်းလက်အောက်ခံ ရပ်ကွက်အုပ်ချုပ်ရေးမှူးများက ကောက်ခံနေကြောင်း ဒေသခံများက ပြောသည်။

ထို့အပြင် ပြီးခဲ့သည့် ဇွန်လ (၂၀)ရက်တွင်လည်း စဝ်စံထွန်းရပ်ကွက် ကရင်မရေထွက် နယ်မြေ ၁၆ တွင် စစ်ကောင်စီ လက်အောက်ခံ ရဲနှင့် အုပ်ချုပ်ရေးမှူး တို့က ဧည့်စာရင်းစစ်မည်ဟုဆို၍ လူငယ် (၁၀) ဦးကို ဖမ်းဆီးခေါ်ဆောင် သွားခဲ့ကြောင်း သိရသည်။