သျှမ်းပြည်တောင်ပိုင်း၊ တောင်ကြီးမြို့နယ် ကျောက်နီကျေးရွာတွင် မကြုံစဖူး တောင်ကျရေကြောင့် နေအိမ်ထဲထိ ရေများဝင်ရောက်ပြီး ပျက်စီးမှုများစွာ ကြုံတွေ့နေရကြောင်း သတင်းရရှိသည်။

ပြီးခဲ့သည့် စက်တင်ဘာ ၈ ရက်တွင် တောင်ကြီးမြို့နယ် ကျောက်နီကျေးရွာတွင် မိုးသည်းထန်စွာ ရွာသွန်းမှုကြောင့် တောင်ကျရေများသည် မကြုံစဖူး နေအိမ်ထဲထိ ရုတ်တရက်ဝင်ရောက်ပြီး လမ်းများတွင် ကျောက်တုံး၊ သစ်တုံးနှင့် ရွှံ့နွံများ ဖုံလွှမ်းကာ ယနေ့အချိန်ထိ တောင်ကျရေ စီးဆင်းနေသေးကြောင်း ကျောက်နီကျေးရွာ ဒေသခံအမျိုးသမီးတစ်ဉီးက သျှမ်းသံတော်ဆင့်ကို ပြောသည်။

“တစ်ရက်ကို ၃ နာရီလောက် မိုးသည်းလိုက်တာနဲ့ တောင်ကျရေတွေက ရွာထဲ အရှိန်နဲ့ ဆင်းလာတယ်၊ အိမ်ထဲထိပါ ဝင်တယ်။ အဲ့ရေစီးအားနဲ့အတူ ရွှံ့တွေ ကျောက်တုံးတွေပါတော့ လမ်းတွေ အိမ်တွေ ပျက်စီးကုန်တာပေါ့။ ရေကျသွားရင်တော့ အိမ်ထဲ ရွှံ့နွံကျန်မယ်။ စပါးတွေ ထည့်ထားတဲ့ အိတ်တွေလည်း ဘာမှ ရစရာမရှိ ရေစိုကုန်ပြီ” ဟု ၎င်းအမျိုးသမီးက ပြောဆိုသည်။

တောင်ကျရေစီးသန်မှုကြောင့် စပါးခင်းများလည်း ရေမြှုပ်ပြီး ပျက်စီးသွားကြောင်း သိရသည်။

တောင်ကြီးမြို့နယ် ကျောက်နီကျေးရွာတွင် ယခုကဲ့သို့ တကြိမ်တခါမျှ မကြုံဖူးသည့် တောင်ကျချောင်းရေ စီးဆင်းမှုကြောင့် ဒေသခံများ စိုးရိမ်ထိတ်လန့်နေကြောင်း၊ ထိုကဲ့သို့ ဖြစ်ခြင်းသည် သစ်တောပြုန်းတီးမှုကြောင့်ဟု အသက် ၂၅ နှစ်အရွယ် အမျိုးသမီးတစ်ဉီး မှတ်ချက်ပြုသည်။

“အဓိက ဒီလိုဖြစ်ရတာက သစ်တောပြုန်းတီးလို့ ထင်တယ်။ တောင်ပေါ်မှာက သစ်ပင်တွေ မရှိတော့ ရေတွေက အားပြင်းပြင်းနဲ့ စီးဆင်းလာကြတာ။ အရင်နှစ်က အဲ့လောက်မဆိုးဘူး၊ ဒီနှစ်တော့ ပိုဆိုးတယ်။ ဒေသခံတွေက တောင်ယာ ချဲ့ထွင်လာတာနဲ့အမျှ သစ်ပင်တွေ မထိန်းသိမ်းနိုင်တော့ရင် ဒါမျိုး တောင်ကျရေတွေ ဝင်တာ ဆက်ဖြစ်နေဦးမှာ”ဟု ၎င်း အမျိုးသမီးက ဆိုသည်။

ယခုလက်ရှိ ကျောက်နီကျေးရွာတွင် လမ်းပန်းဆက်သွယ် သွားလာရေးအတွက် ကိုယ်ထူကိုယ်ထ လမ်းများ ပြုပြင်နေရပြီး အလှူရှင်များနှင့် လုပ်အားပေးကူသူများလည်း လိုအပ်နေကြောင်း သိရသည်။

ပြီးခဲ့သည့် ဇွန်လဆန်းပိုင်းတွင် တောင်ကြီးမြို့နယ် အပါအဝင် ညောင်ရွှေမြို့နယ် အင်းလေးဒေသတွင် မိုးသည်းထန်စွာ ရွာသွန်းသောကြောင့် ရေကြီးရေလျှံ ဖြစ်ပေါ်ခဲ့ပြီး စပါးခင်း ဧကများစွာ ပျက်စီးဆုံးရှုံးခဲ့ရကြောင်း သိရသည်။