သျှမ်းပြည်တောင်ပိုင်း တောင်ကြီးမြို့တွင် Quarantine ဝင်နေသည့် ကလေးတစ်ယောက်သေဆုံး ကြောင်း စုံစမ်းသိရှိရသည်။
တောင်ကြီးမြို့ အ.ထ.က ၅ တွင် Quarantine ၀င်နေသည့် အဆိုပါကလေးမှာ ယမန်နေ့ ဒီဇင်ဘာ ၁၅ ရက်က စဝ်စံထွန်းဆေးရုံတွင် သေဆုံးသွားခြင်းဖြစ်ကြောင်းသိရသည်။
“ မိန်းခလေးလေးပါ။ သူက နဂိုကတည်းက ကင်ဆာရောဂါအခံရှိတယ်။ မန္တလေးမှာ ဆေးသွားကုပြီး ပြန်လာတာ။ ပြန်ရောက်တော့လဲ အခြေနေကတော့ သိပ်တော့မကောင်းဘူးပေါ့။ ဒီနေ့ Quarantine ဝင်တာ က ၁၄ ရက်ပြည့်တာ” ဟု မြို့နယ်ပြည်သူ့ ကျန်းမာရေးဦးစီးဌာန ဒေါက်တာ မိုးထွန်းက ပြောသည်။
အဆိုပါအသက် ၆ နှစ်အရွယ်ရှိ ကလေးမလေးသည် တောင်ကြီးဒေသခံသာဖြစ်ကြောင်း၊ နှာခေါင်း လည်ချောင်းကင်ဆာရောဂါဖြင့် မန္တလေးတွင် ဆေးသွားကုပြီး ယခုလ ၂ ရက်နေ့ တောင်ကြီးသို့ပြန်ရောက်လာပြီး ကွာရန်တင်း၀င်ခြင်းဖြစ်ကြောင်းသိရသည်။ Quarantine ၀င်ပြီး ၁၃ ရက်အကြာ ယမန်နေ့ ည ၁၀ နာရီကျော်အချိန်တွင် စ၀်စံထွန်းဆေးရုံတွင် သေဆုံးသွားခြင်းဖြစ်ကြောင်းသိရသည်။
“ စဝ်စံထွန်းဆေးရုံကို လွှဲလိုက်တဲ့အချိန်မှာ ဆုံးသွားတယ်။ ၁၀ နာရီ ကျော်လောက်ဖြစ်မယ်။ သူ့မှာအသက် ၆ နှစ်ဘဲရှိသေးတယ်” ဟု ဒေါက်တာမိုးထွန်းက ပြောသည်။
အဆိုပါကလေးမလေးတွင် ကိုဗစ်ရောဂါလက္ခဏာတော့မရှိကြောင်း၊ ၄င်းအတွက်လည်း ထပ်မံစစ်ဆေးထားကြောင်း သိရသည်။
အလားတူ စက်တင်ဘာ ၂၀ ရက်နေ့ကလည်း တောင်ကြီးမြို့အမှတ် ၂ အထက်တန်း ကျောင်းတွင် Quarantine ဝင်နေသည့် အမျိုးသားတစ်ဦးသေဆုံးခဲ့သည်။
Leave a Comments