သျှမ်းပြည်နယ်တွင် ကိုဗစ် ၁၉ ပိုးတွေ့လူနာ များပြားနေသောကြောင့် ယနေ့ကျရောက်သော သျှမ်းနှစ်သစ်အတွက် နှစ်သစ်ကူးပွဲတော်အား မြို့နယ်တိုင်းတွင် ကြီးကျယ်ခန်းနားစည်ကားစွာမကျင်းပခဲ့ကြောင်းသိရသည်။
ဒီဇင်ဘာလ ၁၄ ရက်ယမန်နေ့က သျှမ်းသက္ကရာဇ် ၂၁၁၄ ခု ကုန်ဆုံးသည့်ရက်ဖြစ်ပြီး ဒီဇင်ဘာလ ၁၅ ရက် ယနေ့မှာမူ သျှမ်းသက္ကရာဇ်အသစ် ၂၁၁၅ ခု ကိုရောက်ရှိပြီဖြစ်သည်။
ယခင်နှစ်များက သျှမ်းနှစ်ကုန်ရက်များတွင် မြို့နယ်တိုင်း သျှမ်းစာပေနှင့်ယဉ်ကျေးမှုကော်မတီက ဉီးစီးကာ သျှမ်းနှစ်သစ်ကူးပွဲတော်၊ ကောက်သစ်လှူပွဲ ၊ ကောက်သစ်စားပွဲတော်ကို ကြီးကျယ်ခမ်းနားစည်ကားစွာကျင်းပခဲ့ကြသည်။
ယခုနှစ် မြန်မာနိုင်ငံတွင် ကိုဗစ် ၁၉ ကူးစက်မှုနှုန်းမြင့်တက်လာနေသဖြင့် ကျန်းမားရေးနှင့် အားကစားဝန်းကြီးဌာနကလည်း လူ ၃၀ နှင့်အထက်လူစုလူဝေးမလုပ်ရဟုထုတ်ပြန်ကြေညာ ထားသောကြောင့် သျှမ်းနှစ်သစ်ကူးပွဲကို မြို့နယ်တော်တော်များများမကျင်းပတော့ဘဲ မိမိရပ်ရွာအတွင်း ကိုယ့်နည်းကိုယ့်ဟန်ဖြင့်သာ နှစ်သစ်ကြိုဆိုကြကြောင်း သျှမ်းစာပေယဉ်ကျေးမှုအတွင်းလှုပ်ရှားသူများကပြောဆိုကြသည်။
အလားတူ သျှမ်းလူငယ်များအကြိုက်များသော သျှမ်းအဆိုတော်များလည်း Stay Home နေသူများအတွက် အွန်လိုင်းတွင် တေးသီချင်းများသီဆိုဖျော်ဖြေကြကာ အွန်လိုင်းမှသာ နှစ်သစ်အားအတူတကွကြိုဆိုကြသည်။
“ ကျန်းမာရေးနဲ့ အားကစားဝန်းကြီးဌာန ကလည်း လူစုလူဝေး မလုပ်ရဘူးလို့ ထုတ်ပြန်ထားတယ်။ အဲတာကြောင့် တောင်ကြီးမြို့မှာဒီနှစ် သျှမ်းနှစ်သစ်ကူးပွဲမကျင်းပဖြစ်ပါဘူး။ ” ဟု သျှမ်းစာပေနှင့် ယဉ်ကျေးမှု ကော်မတီမှ လုံးစိုင်းနွတ် ကသျှမ်းသံတော်ဆင့် ကိုပြောသည်။
သျှမ်းနှစ်သစ်ကူးအခါသမယ တနှစ်တကြိမ်သာရှိသောကြောင့် ကြီးကျယ်ခမ်းနားမကျင်းပနိုင်ခဲ့သော်လည်း ကိုယ့်နည်းကိုယ့်ဟန်ဖြင့် ရိုးရာမပျက်ကြိုဆိုကြသည်မှာကောင်းသောလက္ခဏာဖြစ်ကြောင်း ပင်လုံမြို့ သျှမ်းစာပေနှင့် ယဉ်ကျေးမှု ဥက္ကဌ လုင်းစိုင်ဆွေညွှန့်ကပြောသည်။
“ ပွဲမကျင်းပနိုင်လည်း ကောက်သစ်လေးနဲ့ ရဟန်းသံဃာ တွေကို ဆွမ်းကပ်လှုဒါန်း တာလည်း နှစ်သစ်မင်္ဂလာ ယူနိုင်တာဘဲ” ဟု လုံးစိုင်းဆွေညွှန့်က ပြောသည်။
ယခုနှစ် သျှမ်းနှစ်သစ်ကူးကာလတွင် နှစ်သစ်ကူးပွဲတော်မကျင်းပတော့ဘဲ မိမိနေအိမ်အတွင်းတွင်ပျော်ပွဲစားသောက်ပြီး နှစ်သစ်ကြိုဆိုကြခြင်း၊ အွန်လိုင်းတွင်သာ သီဆိုဖျော်ဖြေ ၊ နှစ်သစ်ကြိုဆိုခြင်းများသာ ပြုလုပ်ခဲ့ကြသည်ကိုသာတွေ့ရသည်။
