သျှမ်းပြည်မြောက်ပိုင်း နမ္မတူမြို့နယ်အတွင်း ယနေ့မနက်ပိုင်းက RCSS/SSA နှင့်မဟာမိတ်တပ်ပေါင်းစုတို့အကြားပစ်ခတ်တိုက်ခိုက်မှုများဖြစ်ပွါးသဖြင့် ဒေသခံရွာသားများ ထွက်ပြေးတိမ်းရှောင်ရကြောင်းသိရသည်။
ယနေ့ ဒီဇင်ဘာ ၉ ရက် မနက်ပိုင်း နမ္မတူမြို့နယ် မန်စံကျေးရွာအုပ်စု နားကျဲကျေးရွာအနီး ထိုသို့ပစ်ခတ်မှုဖြစ်ပွါးခဲ့ခြင်းဖြစ်ပြီး လက်ရှိသတင်းရေးသားချိန်အထိ ရွာသားများနေရပ်မှ စွန့်ခွါထွက်ပြေးတိမ်းရှောင်နေကြသည်ဟု ဆိုပါသည်။
“နားကျဲကျေးရွာမှာ သေနတ်သံတွေ ကြားရတယ်။ တစ်ချို့ရွာသားတွေ ထွက်ပြေးလာတာတွေရှိတယ်။ မထွက်လာနိုင်သေးတာတွေလည်းရှိတယ်။ နားကျဲကျေးရွာက သူတွေ မန်စံကျေးရွာ ကို ထွက်ပြေးလာကြတယ်။” ဟု နမ္မတူ ဒေသခံ တစ်ဦးက သျှမ်းသံတော်ဆင့်ကို အတည်ပြု ပြောဆိုခဲ့သည်။
ထွက်ပြေးလာသော ရွာသားများမှာ ပိန်းလုံရွာ နားကျဲရွာနှင့်ကွန်ကျောင်းရွာများမှရွာသား များဖြစ်ကြောင်း၊ ၂ ဖက်တပ်များသည် ပြီးခဲ့သည့် ၂ ရက် ၃ ရက်ကတည်းက မန်စံဘက်သို့အင်အားဖြည့်တင်းလာနေကြပြီး တအာင်းတပ်များသည် ယမန်နေ့ညက အဆိုပါ နားကျဲ၊ ကွန်ကျောင်းရွာများနှင့်နီးကပ်စွာ ၀င်ရောက်အနားယူခဲ့ကြကြောင်း ရွာသားများကပြောသည်။
“ခုချိန်က ကောက်ရိတ်ချိန် ပြောင်းချိုးချိန်လေဗျာ။ သူတို့တိုက်ကြမယ်ဆိုရင်လူထုမျက်နှာထောက်သင့်တယ်။ ရွာနဲ့အဝေးမှာသွားတိုက်သင့်တယ်ဗျ။ ”-ဟု နမ္မတူရောက်စစ်ရှောင်ရွာသားတဦးကပြောသည်။
ယနေ့တိုက်ပွဲဖြစ်ပွါးသည့် မြောက်ပိုင်းမဟာမိတ်တပ်ဖွဲ့တွင် SSPP/SSA တပ်သားများလည်းပါ၀င်ကြောင်း ရွာသားများပြောသကဲ့သို့ ၄င်းတပ်ဖွဲ့ပိုင် SSPP info Page တွင်လည်း ယနေ့မနက်ပိုင်း နမ္မတူမြို့နယ်အတွင်းတိုက်ပွဲဖြစ်ပွါးခဲ့ကြောင်း ရေးသားထုတ်ပြန်ထားသည်။
သို့သော် တပ် ၂ ဖက်လုံး၏ ပြောရေးဆိုခွင့်ရှိသူများထံ သျှမ်းသံတော်ဆင့်မှ ဆက်သွယ်မေးမြန်းရာတွင် ဖုန်းလက်ခံဖြေဆိုခြင်းမရှိခဲ့ပေ။
ဒီဇင်ဘာ (၅) ရက်နေ့ မနက်ပိုင်းတွင်လည်း ကာလအတန်ကြာ စစ်ရေးတင်းမာကြပြီးနောက် သျှမ်းပြည်မြောက်ပိုင်း သီပေါမြို့နယ်အတွင်း RCSSနှင့် SSPP ထိတွေ့မှု တိုက်ပွဲ ဖြစ်ပွားခဲ့သည်။
