သျှမ်းပြည်နယ်မြောက်ပိုင်း မူဆယ်မြို့လယ်တွင် အမျိုးသမီး တစ်ဦး ပြန်ပေးဆွဲခံရကြောင်း စုံစမ်းသိရှိရသည်။
ဒီဇင်ဘာလ ၆ ရက်နေ့လည်ပိုင်းက မူဆယ်မြို့လယ် လူမြင်ကွင်းရှေ့တွင် ထိုသို့ ပြန်ပေးဆွဲ ခံရသည့်အပေါ် ငွေကြေးကိစ္စအပြင် တစ်ခြားသော အကြောင်းအရာများရှိနိုင်ကြောင်း ဒေသခံတစ်ဦးက ပြောသည်။
“ ပြန်ပေးဆွဲခံရတာတော့ ဟုတ်တယ်။ သူ့အမျိုးသားက ပြည်သူစစ်ထဲမှာပါတယ်။ သူကတော့ ငွေလဲတဲ့အလုပ် လုပ်တယ်။ သူတို့အချင်းချင်း ငွေလိုနေကြတာလားမသိဘူးလေ” ဟု မူဆယ်မြို့ ဒေသခံတစ်ဦးက သျှမ်းသံတော်ဆင့်ကို ပြောသည်။
ဖြစ်စဉ်မှာ အမျိုးသား ၃ ဦးက Crown ကားမောင်းနှင်းလာပြီး အဆိုပါအမျိုးသမီးတစ်ဦးကို မနက် ၉ နာရီကျော်အချိန်တွင် လာရောက်ဖမ်းဆီးသွားကြောင်းသိရသည်။
ထိုသို့ဖမ်းဆီးပြီးနောက်ပိုင်းတွင် တရုတ်ငွေယွမ် ၅၀၀၀၀ ဖြင့်ပြန်ရွေးယူခိုင်းပြီး ညနေပိုင်း မှသာ ပြန်လွှတ်ပေးခဲ့ ကြောင်းသိရသည်။
“ သူ့ကိုခေါ်သွားတုန်းက ခြောက်လှန့်ပြီးတော့ ခေါ်သွားတယ်။ ဖုန်းထဲကနေပြီးတော့ တရုတ်ငွေ ၅ သောင်းပေးပြီးတော့ ညနေပိုင်းလောက်မှပြန်လွှတ်လာတယ်” ဟု ဒေသခံတစ်ဦးကပြောသည်။
ပြန်ပေးဆွဲသည့်အဖွဲ့သည် မည်သည့် အဖွဲ့ဖြစ်သည်ကို မသိရသေးကြောင်း နှင့် တရုတ်စကားပြောသူများဖြစ်ကြောင်း ၊လက်ရှိအချိန်အထိ မဖမ်းမိသေးကြောင်း သိရသည်။
လက်နက်ကိုင်တပ်ဖွဲ့များပြားပြီး တရုတ်နယ်စပ်ဖြစ်သည့်မူဆယ်မြို့တွင်ထိုသို့ ပြန်ပေးဆွဲမှု ၊ ဓါးပြမှုများမကြာခဏ ဖြစ်ပွါးလေ့ရှိသဖြင့် ဒေသခံလူထုအနေဖြင့် လုံခြုံရေးအတွက် စိုးရိမ်နေကြကြောင်းသိရသည်။
Leave a Comments