သျှမ်းပြည်တောင်ပိုင်း တောင်ကြီးမြို့ရှိ ယနေ့ ကိုဗစ်-၁၉ အတည်ပြု လူနာ (၂) ဦး ထပ်တိုးကြောင်း စုံစမ်းသိရှိရသည်။
ယနေ့ နေ့လည် (၃) နာရီခွဲအချိန်ထိ အတည်ပြု လူနာ ၂ ဦးသည် တောင်ကြီးမြို့ရှိ မင်္ဂလာဦး ရပ်ကွက် နှင့် ပြည်တော်သာရပ်ကွက် က ဖြစ်ကြောင်း သိရသည်။
“၂ ဦးရယ်လို့တော့ မဟုတ်သေးဘူးဗျ။ ကျနော်တို့ သိတဲ့ချိန်မှာ ကျနော်တို့ အလုပ်လုပ်ဖို့ ထွက်လာတော့ နောက်ပိုင်း ဆေးစစ်ထားတာတွေ တောက်လျောက်စစ်တော့ ထပ်ထွက်လား မထွက်လားဆိုတာ ကျနော်တို့ မသိရသေးဘူးဗျ။ လောလောဆယ်တော့ ၂ ဦးပါဗျ။ ကြက်ခြေနီအဖွဲ့က ထိတွေ့ဆက်စပ်သူတွေကို လိုက်သယ်ပေးနေပါတယ်။ ကျနော်တို့က အခု ပိုးသတ်ဆေးတွေကို တောက်လျောက်လိုက်ဖျန်းပေးနေပါတယ်” တောင်ကြီး ပရဟိတ ကိုဝင်းနိုင်စိုး က သျှမ်းသံတော်ဆင့် ကိုပြောသည်။
အဆိုပါ မင်္ဂလာဦး ရပ်ကွက်က ပိုးတွေ့လူနာ တစ်ဦးသည် နိုဝင်ဘာ (၁၇) ရက်တွင် ကိုဗစ်-၁၉ ပိုးတွေ့လူနာနှင့် ဆက်စပ်သူဖြစ်ကြောင်း သိရသည်။
တောင်ကြီးမြို့ မင်္ဂလာဦးရပ်ကွက်ရှိ နယ်မြေ နှင့် လမ်းအချို့ကို နိုဝင်ဘာ (၂၉) ရက်မှ ဒီဇင်ဘာ (၁၃) ရက်ထိ မိမိနေအိမ်တွင် နေထိုင်ရန် ( Stay at home) အမိန့်ကို တောင်ကြီးမြို့နယ် ပြည်သူ့ကျနးမာရေး ဦးစီးဌာနက ထုတ်ပြန်ထားခြင်း ဖြစ်သည်။
တောင်ကြီးမြို့နယ်အတွင်း ကိုဗစ်-၁၉ ဓါတ်ခွဲအတည်ပြု လူနာများ ထပ်မံတွေ့ရှိမှု၊ ခရီးသွားရာဇဝင်မရှိသည့်အပြင် ဓါတ်ခွဲအတည်ပြု လူနာများလည်း ထိတွေ့ခြင်း မရှိခဲ့သည့် လူနာများ အချိန်တိုအတွင်း များစွာ တွေ့ရှိလာသည်။
ထို့ပြင် တောင်ကြီးမြို့မဈေးတွင် ဈေးရောင်းသည့် သူတဦးထံတွင် ကိုဗစ်-၁၉ တွေ့ရှိခဲ့သည့် ယနေ့( နိုဝင်ဘာ ၃၀)ရက် နေ့လည်ပိုင်းမှ စတင်ကာ မြို့မဈေးကို ယာယီပိတ်လိုက်ကြောင်းသိရသည်။
ယနေ့ အချိန်ထိ သျှမ်းတောင်တွင် ဆေးကုသနေသည့် ကိုဗစ်-၁၉ အတည်ပြုလူနာ (၉၀)ခန့်ရှိကြောင်း သိရသည်။
နိုဝင်ဘာ (၂၉ ) ရက် ည (၈) နာရီချိန်ထိ မြန်မာနိုင်ငံတွင် ကိုဗစ်-၁၉ အတည်ပြု လူနာ (၈၉ ၄၈၆) ဦး၊ ဆေးရုံဆင်းသူ (၆၈၉ ၁၀) ဦး၊ သေဆုံးသူ (၁၉ ၁၈) ဦး ရှိကြောင်း ကျန်းမာရေး နှင့် အားကစားဝန်ကြီးဌာနက ထုတ်ပြန်ထားသည်။
