သျှမ်းပြည်တောင်ပိုင်း တောင်ကြီးမြို့ရှိ (TBC) ကားဝင်းအတွင်း သို့ ထိုင်းမှ နေရပ်ပြန် ပြည်သူများ (၁၀၀) ကျော် ရောက်ရှိမည်ဖြစ်ကြောင်း သိရသည်။
ယနေ့ နိုဝင်ဘာ (၃၀)ရက်သည် နေရပ်ပြန် ပြည်သူများသည် တာချီလိတ်မြို့ မှ တဆင့် ပြန်လည် ရောက်ရှိလာမည်ဖြစ်ပြီး ၎င်းတို့အားလုံးသည် Quarantine ဝင်ထားသည့် သူများ ဖြစ်ကြောင်း တောင်ကြီးပရဟိတ ကိုဝင်းနိုင်စိုး က သျှမ်းသံတော်ဆင့် ကိုပြောသည်။
“ဘယ်နှယောက် ရောက်မလဲတော့ မသိဘူးဗျ။ ထွက်လာတုန်းကတော့ (၁၄၀) (၁၅၀) လောက် ထွက်လာတယ်လို့တော့ ပြောတယ်။ လမ်းမှာ မြို့တွေမှာ ဆင်းအုန်းမယ်ဆိုတော့ ကျနော်တို့လည်း ဒီရောက်မှ သိမယ်ဗျ။ ထိုင်းနိုင်ငံ ပြန်တွေပါ။”ဟု ကိုဝင်းနိုင်စိုး ကပြောသည်။
ထိုရောက်ရှိလာမည့် နေရပ်ပြန် ပြည်သူများအားလုံးကို တောင်ကြီး(TBC) ကားဝင်းမှ တဆင့် သက်ဆိုင်ရာ မြို့နယ်သို့ ပြန်လည် ထွက်ခွာသွားမည်ဖြစ်ကြောင်း သိရသည်။
“တာချီလိတ်မှာ Q ဝင်ပြီးသားတွေပါ။ အရင်လုပ်တဲ့ ပုံစံပဲ ရောက်တာနဲ့ သက်ဆိုင်ရာ မြို့နယ်ကို ပြန်ပို့ပေးမှာပါ။ တောင်ကြီးမှာတော့ မထားပါဘူးဗျ။” ဟု ကိုဝင်းနိုင်စိုး ကပြောသည်။
ရွေးကောက်ပွဲကာလ ကျင်းပပြီးသည့်ချိန်တွင် သျှမ်းပြည်တွင်းရှိ မြို့နယ်အများစုသည်လည်း ကိုဗစ်-၁၉ ကူးစက်မှုနှုန်း တစ်နေ့ထက် တစ်နေ့ များပြားလာသည်ကို တွေ့ရှိရသည်။
နိုဝင်ဘာ ၂၉ ရက် တရက်တည်း တာချီလိတ်မြို့မှာ ကိုဗစ်-၁၉ ကူးစက်သူ လူနာသစ် (၁၀) ဦး တိုးလာကြောင်း သိရသည်။
