သျှမ်းပြည် အရှေ့ပိုင်း ကျိုင်းတုံမြို့တွင် တာချီလိတ်မြို့မှ ပိုးတေ့ွလူနာနှင့် ထိတွေ့ခဲ့သည့် အသက် (၈)နှစ် အရွယ် ကလေး တဦးထံတွင် ကိုဗစ် -၁၉ ပိုးတွေ့ရှိကြောင်း စုံစမ်းသိရှိရသည်။
အဆိုပါ တာချီလိတ်က ကိုဗစ် -၁၉ ပိုးတွေ့အတည်ပြုလူနာသည် ကျိုင်တုံမြို့တည်းခိုခန်းတွင် တစ်ညတည်းခဲ့ပြီး၊ ယနေ့ (နိုဝင်ဘာ ၂၆ )ရက်တွင် RDT ဖြင့်စစ်ဆေးရာ အသက် (၈) နှစ်အရွယ် ကလေးငယ်တွင် ကိုဗစ် ၁၉ ပိုးတွေ့ရှိခဲ့ကြောင်း သျှမ်းပြည်နယ်အရှေ့ပိုင်း ကျန်းမားရေးဦးစီးဌာန ၏ လက်ထောက်ညွှန်ကြားရေးမှူး (တိုးချဲ့ကာကွယ်ဆေး/ကူးစက်) ဒေါက်တာလင်းထွဋ်ဦး က သျှမ်းသံတော်ဆင့်ကို ပြောသည်။
ထိုကျိုင်းတုံမြို့ အသက် (၈) နှစ် ပိုးတွေ့လူနာသည် မိသားစုဝင် (၆) ဦးရှိကြောင်းသိရသည်။
“ တာချီလိတ်ကလူနာက၂၀ ရက်နေ့မှာကျိုင်းတုံမှာတစ်ညအိပ်သွားတယ်။ သူတို့မိသားစုဝင်က ၆ ယောက်ရှိတယ်။ စစ်တာက ကလေးမှာ positive တွေ့သွားတယ်” ဒေါက်တာလင်းထွဋ်ဦး ကပြောသည်။
တာချီလိတ် ကိုဗစ် -၁၉ အတည်ပြုလူနာသည် ကျိုင်းတုံမြို့ကို သွားရောက်လည်ပတ်ခဲ့ပြီး ထိတွေ့သူ (၃၇)ဦးရှိပြီး ၎င်းနှင့် ထိတွေ့သူများကို နိုဝင်ဘာ ၂၆ ရက်တွင် ကျိုင်းတုံမြို့မှတာဝန်ရှိသူများက အသွားလာကန့်သတ်ထားလိုက်ပြီးဖြစ်ကြောင်း သိရသည်။
“ ထိတွေ့သူက ၃၇ ယောက်။ သူသွားတည်းတဲ့ မိသားစုအိမ်က ၆ ယောက်။ ဗုဒ္ဓဥယျာဉ်နားက ညအိပ်လို့ရတဲ့ စားသောက်ဆိုင်မှာက ၃၁ ယောက်။ ကျနော်တို့ အခုထိစစ်နေပါသေးတယ်။ ဗုဒ္ဓဥယျာဉ်နားကတော့ မရသေးဘူး”ဟု ဒေါက်တာ လင်းထွဋ်ဦးက ပြောသည်။
သျှမ်းပြည်အရှေ့ပိုင်း တာချီလိတ်မြို့တွင် ကိုဗစ် ၁၉ အတည်ပြုလူနာ ၁၇ ဦးရှိပြီး၊လက်ရှိ ဆေးရုံ တက်လူနာ ၃ ဦးရှိကြောင်း သိရသည်။
