သျှမ်းပြည်တွင် ကိုဗစ် ၁၉ ကူးစက်မှုနှုန်း တက်လာသော်လည်း ဒေသခံ ပြည်သူအများစုသည် ယနေ့ချိန်ထိ ကျန်းမာရေးစည်းကမ်းလိုက်နာမှု အားနည်းနေဆဲ ဟု ကိုဗစ်-၁၉ ကာကွယ်တားဆီးရေး လုပ်ဆောင်နေသူများက ပြောဆိုလိုက်သည်။
မြန်မာနိုင်ငံတွင် မနေ့ နိုဝင်ဘာ (၂၃) ည ၈ နာရီ ကျန်းမားရေးနှင့်အားကစားဝန်းကြီးဌာနထုတ်ပြန်ချက် အရ ကိုဗစ် -၁၉ အတည်ပြုလူနာ ( ၈၀၅၀၅) ဦးရှိပြီး ဆေးရုံဆင်းလူနာ ( ၅၉၈၈၈) နှင့် သေဆုံးသူ (၁၇၆၅)ဦးရှိကြောင်း သိရသည်။
ထိုထဲတွင် သျှမ်းပြည်တဝှမ်းတွင် ကိုဗစ်-၁၉ အတည်ပြုလူနာ စုစုပေါင်း ( ၃၂၅) ဦးရှိပြီး၊ လက်ရှိဆေးရုံတက်သူ (၁၃၉ )ဦးရှိကာ၊ ပြန်လည်သက်သာလာသူ (၁၈၄)ဦးရှိပြီး သေဆုံးသူ ၂ဦးရှိကြောင်း သိရသည်။
သျှမ်းပြည်တွင် ယခုရက်ပိုင်းနေ့စဉ်ဆက်တိုက် ကိုဗစ်-၁၉ ပိုးတွေ့လူနာ များလာသော်လည်း ပြည်သူအများစုမှာ ပုံမှန်သွားလာနေဆဲဖြစ်ပြီး၊ ကျန်းမာရေးအတွက် စိုးရိမ်ပူပန်မှုများမရှိနေသည်ကို တွေ့ရကြောင်း ကိုဗစ်-၁၉ ကာကွယ်တားဆီးမှုဆောင်ရွက်နေသူများက ပြောသည်။
“ ကျနော် တို့မြို့မှာတော့ စည်းကမ်းလိုက်နာမှူအားနည်းနေတယ်။ mask(နှာခေါင်းစည်း) လည်းတချို့ဘဲတပ်ကြတယ်။ ကျန်းမားရေးလိုက်စားတဲ့သူတွေကတော့ လိုက်နာကြတယ်။ ပြည်သူတွေက ကြောက်တယ်ဆိုတာ မရှိဘူး” ဟု မူဆယ်မြို့ ကိုဗစ်-၁၉ ပညာပေးမှု ပြုလုပ်နေသည့် စိုင်းမြတ် က ပြောသည်။
သျှမ်းပြည်မြောက်ပိုင်း မူဆယ်မြို့တွင် ရွေးကောက်ပွဲမတိုင်မှီအချိန်တွင် ကျန်းမားရေးနှိုးဆော်မှုများရှိ သော်လည်း ရွေးကောက်ပွဲပြီးနောက်ပိုင်း မရှိတော့ကြောင်း၊ ရွေးကောက်ပွဲပြီးနောက် ကိုဗစ်-၁၉ ကူးစက်မှုနှုန်းကလည်း မြန်မာပြည်အနှံ့ တက်လာသည်ကိုတွေ့ရကြောင်း စိုင်းအောင် က ပြောသည်။
အလားတူ သျှမ်းတောင်ပိုင်း တောင်ကြီးမြို့တွင် ကိုဗစ် လိုက်နာမှုအားနည်းနေကြောင်း သျှမ်းပြည် ပြည်သူ့ကျန်းမာရေး ဦးစီးဌာန လက်ထောက်ညွှန်ကြားရေးမှူး ဒေါက်တာဇဝနကို က သျှမ်းသံတော်ဆင့် ကိုပြောသည်။
“ ကိုဗစ် ပထမလှိုင်းမှာတော့ စည်းကမ်းလိုက်နာကြတယ်။ ဒုတိယလှိုင်းမှာခါကြတော့ ပေါ့ဆလာကြတယ်ပေါ့နော်။ ဒီလိုမျိုးဆက်ပြီးပေါ့ဆနေရင်တော့ ကျနော်တို့မြို့ကလည်း ကိုဗစ် ပျောက်နိုင်မှာမဟုတ်တော့ဘူး” ဒေါက်တာ ဇဝနကို ကပြောသည်။
သျှမ်းပြည်တဝှမ်း ခရီးသွားလာမှု၊ လည်ပတ်မှုကို ကန့်သတ်ထားသော်လည်း တချို့ မှာ စည်းကမ်းလိုက်နာမှုမရှိဘဲ လည်ပတ်မှုကို ပြုလုပ်နေကြောင်းလည်း သျှမ်းပြည်သူများက ပြောသည်။
လက်ရှိ ကိုဗစ်-၁၉ ကာလအတွင်း ခရီးသွားလာမှု ပြုလုပ်ပါက ကိုဗစ်-၁၉ ရောဂါ ကင်းစင်ကြောင်း၊ကျန်းမာရေး ကောင်းမွန်ကြောင်းထောက်ခံစာ ကို သက်ဆိုင်ရာ ကျန်းမာရေး ဌာန၊ ရပ်ကွက် အုပ်ချုပ်ရေးမှူး လက်မှတ်ပါမှသာလျှင် သွားလာခွင့်ပြုကြောင်း သိရသည်။
သို့သော် တချို့ ပြည်သူများသည် ကိုဗစ်-၁၉ စစ်ဆေးရေး ဂိတ်တွင် စစ်ဆေးမခံဘဲ ၊ ဂိတ်ပတ်လမ်း၊ ရှောင်လမ်းကို အသုံးပြုပြီး သွားလာမှု ရှိသကဲ့သို့ တချို့မှာ ဆေးမှတ်တမ်း အတု ပြုလုပ်ကာ သွားလာမှုများလည်း ရှိကြောင်း တွေ့ရသည်။
နိုဝင်ဘာ ၁၇ ရက်နေ့က ကိုဗစ်-၁၉ တွေ့ရှိခဲ့သည့် မူဆယ်မြို့ မှ အမျိုးသမီးတဦးသည် ကျန်းမာရေး ထောက်ခံစာ တစောင်ကို ကျပ်ငွေ ၂ သောင်းပေး တောင်းယူခဲ့ပြီး ရန်ကုန်မှ မူဆယ်မြို့သို့တိုက်ရိုက်တက် လာခဲ့ကြောင်း လူမှုကူညီရေးအသိုင်းအဝိုင်းကပြောသည်။
“ ကိုဗစ်-၁၉ ကတော့နေ့တိုင်းတိုးနေတာ။ ကြောက်စိတ်တွေလည်းမရှိကြဘူး။ ခုထိ ခရီးတွေသွားကြ၊ သွားလည်ပတ် နေကြတုန်းပဲ။ သက်ဆိုင်ရာက ကောင်းကောင်းမကိုင်တွယ်ရင်တော့ ဒေသကူးစက်မှုနှုန်းထက်မြင့်နိုင်တယ်” ဟု လားရှိုးမြို့တွင်နေထိုင်သည့် ဒေသခံ နန်းလောဝ် က ပြောသည်။
နိုဝင်ဘာ ၁၇ ရက် က သျှမ်းပြည်တောင်ပိုင်း တောင်ကြီးမြို့ တွင် ကိုဗစ်-၁၉ တွေ့ရှိသည့် အမျိုးသားတဦးမှတဆင့် ဒေသတွင်းကူးစက်သူ ၁၃ ဦးထိရှိလာကြောင်း သိရသည်။
ကိုဗစ်-၁၉ ဖြစ်ပွားမှုနှုန်းသည် လရှည်ကြာလာသည့်နှင့်အမျှ စီးပွားရေး ၊ လူမှုရေး အဖက်ဖက်ထိခိုက်လာပြီး၊ ဝင်ငွေမရှိသည့် အတွက် အဆင်မပြေမှုများဖြစ်လာကာ ကိုဗစ်-၁၉ ကို မကြောက်တော့ဘဲ စီးပွားရေး အတွက် ရှာဖွေစားသောက်နေရကြောင်းလည်း သျှမ်းပြည်သူများက ပြောဆိုလိုက်သည်။
