ပညာရေးပိုင်းကိုမြှင့်တင်ချင်တဲ့ မိုင်းရယ်လူငယ်လွှတ်တော်ကိုယ်စားလှယ်

သျှမ်းပြည်လွှတ်တော်ထဲကို ပထမဆုံးအနေဖြင့် ဝင်ရောက်ပြီး လူငယ်အရေး နှင့် ပညာရေးကို မြှင့်တင်ချင်တဲ့ သျှမ်းလူငယ်တဦး ပေါ်ထွက်လာခဲ့ပါတယ်။

ထိုသူကတော့ ၂၀၂အထွေထွေ ရွေးကောက်ပွဲတွင် ရှမ်းတိုင်းရင်းသားများဒီမိုကရေစီအဖွဲ့ချုပ် (SNLD) ပါတီမှ မိုင်းရယ်မြို့နယ် ပြည်နယ် မဲဆန္ဒနယ်(၁ ) တွင်ဝင်ရောက်ယှဉ်ပြိုင်ပြီး အနိုင်ရရှိခဲ့သည့် စိုင်းဆေအွမ်မိန်း ဖြစ်ပါတယ်။

ဟာ ပထမဆုံးအကြိမ် လွှတ်တော်ထဲဝင်မယ့် လူငယ်တစ်ဦးဖြစ်ပြီး လူငယ်ဖြစ်တဲ့ အလျောက် လူငယ်အရေး ကဏ္ဍာနဲ့ ပညာရေး ကိစ္စတွေကို ဘယ်လို လုပ်ဆောင်သွားမလဲဆိုတာကို သျှမ်းသံတော်ဆင့် သတင်းထောက် စိုင်းဆိုင်လှိုင်းက ဆက်သွယ်မေးမြန်ထားပါတယ်။

မေး။ ။ လူငယ်တယောက် အနေနဲ့ လွှတ်တော် အခင်းအကျင်းထဲကို ပထမဆုံး ဝင်ပြီးဆောင်ရွက် ရတော့မယ်ဆိုတော့ စိုင်းဆေအွမ်မိန်း ရဲ့ စိတ်ခံစားချက်လေး ပြောပြပေးပါဦး။

ဖြေ။ ။ လူငယ်တစ်ယောက်အနေနဲ့ ဒီလွှတ်တော်ထဲမှာ ပထမဆုံးအကြိမ်အနေနဲ့ ဝင်ရောက်ရမယ် ဆိုကတည်းက အတိုင်းမသိတော့ဝမ်းသာပါတယ်။

ပြီးတော့ ပြည်သူလူထုကလည်း ကျနော်ကို ထောက်ခံ မဲအပြတ်သတ်ပေး၊ ထောက်ခံပြီးတော့ အောင်နိုင်ခဲ့တဲ့အတွက် ကျနော် အနေနဲ့ ရှေ့ဆက်ဖို့ အင်အားအများကြီးအထောက်ကူဖြစ်တယ်လို့ ပြောချင်ပါတယ်။

မေး။ ။ မြန်မာနိုင်ငံရဲ့ လွှတ်တော် သက်တမ်းကလည်း ၂ဆက် (၁၀)နှစ်ရှိလာပြီဆိုတော့ အရင်လွှတ်တော် အခင်းအကျင်းကို ဘယ်လို မြင်လဲ။ အားရကျေနပ်မှုရှိလား။

ဖြေ။ ။ ဒုတိယလွှတ်တော်သက်တမ်း ကိုပြန်သုံးသပ်ကြည်မယ်ဆိုရင်တော့ အားရကျေနပ်မှုမရှိဘူး။ ဘာဖြစ်လို့လဲ ဆိုတော့ ပြောင်းလဲမှု တွေ ကသိသိသာသာ သိပ်မတွေ့ရဘူး။

ပြီးတော့ အထူးသဖြင့်တော့ ငြိမ်းချမ်းရေကိစ္စရပ်တွေကော၊ ဖွဲ့စည်းပုံအခြေခံဥပဒေ ပြင်ဆင်တဲ့နေရာမှာရော အရမ်းအားနည်းနေသေးတယ်။ ပြီးတော့ ငြိမ်းချမ်းရေးကိစ္စ ဆိုရင်လည်း လွှတ်တော်တွင်းမှာက တွန်းတွန်းတိုက်တိုက်ကြီးလုပ်တဲ့ဟာ အနေထားမျိုးလဲမတွေ့ရဘူး။

လွှတ်တော်ပြင်ပမှာ ငြိမ်းချမ်းရေးကိစ္စတွေ ဆွေးနွေးနေတာဆိုရင်လည်း အခုချိန်ထိ တချို့ဟာတွေ သဘောတူညီချက်ရှိပေ့မယ့်လည်း အကောင်ထည်မှု ပိုင်းကတော့ အားနည်းနေတာတွေ့ရတယ်။ အဲကြောင့် ဒုတိယလွှတ်တော် သက်တမ်းလွှတ်တော်တွင်းက ငြိမ်းချမ်းရေးဖြစ်စဉ် မှာရော ၂၀၀၈ ဥပဒေပြင်ဆင်ပိုင်းမှာကော သိပ်အားရကျေနပ်မှုတော့ မရှိဘူး။

မေး။ ။ စိုင်းဆေအွမ်မိန်း က လွှတ်တော် ထဲဝင်ရတော့မယ်ဆိုတော့ လွှတ်တော်ထဲက အခင်းအကျင်း ကို ဘယ်လို ပုံစံမျိုးဖြစ်တာမြင်ချင်လဲ။ ဘယ်လို ပုံစံပြောင်းလဲချင်လဲ။
ဖြေ။ ။ ကျနော်ကတော့ ဒီလွှတ်တော်ထဲမှာ တိုင်းရင်းသားတွေပိုပြီးတော့ အားကောင်းတဲ့အနေထားကို မြင်တွေ့ချင်တယ်။ အားလုံးစုံစုံလင်လင် ကွဲကွဲပြားပြားနဲ့ အားလုံးစုပေါင်းခေါင်းဆောင်တယ်။ စုပေါင်းလုပ်ဆောင်တယ်ဆိုတဲ့ အခင်းကျင်းမျိုးတော့ ကျနော်ဖြစ်ချင်တယ်။

ဒါပေမယ့်လည်း ဒီလက်ရှိအခုရွေးကောက်ပွဲ ရလဒ်အရဆိုတော့ ပြည်ထောင်စုအဆင့် မှာဆိုရင်တော့ NLD ကတော့ အပြတ်သတ်နိုင်ထားတယ်။ ဒါကြောင့် သျှမ်းပြည်နယ်လွှတ်တော်တော့ အရင်တော့ စိတ်ဝင်စားစရာ ကောင်းပါတယ်။ ဘာဖြစ်လို့လဲဆိုရင် အနိုင်ရရှိတဲ့ ပါတီကလည်း သူပါတီတစ်ခုတည်းနဲ့ လွှမ်းမိုး ချုပ်ကိုင်နိုင်မယ့် အနေထားမရှိဘူး။ အားလုံးကို ညှိနှိုင်းတိုင်ပင်ပြီးတော့ ပူးပေါင်းလုပ်ဆောင်ရမဲ့ အနေထား တွေ့ရတော့ဘယ်လိုလာမလဲဆိုတာတော့ စိတ်ဝင်တစားဖြစ်တာပေါ့။

မေး။ ။ စိုင်းဆေအွမ်မိန်း အနေနဲ့ပထမဆုံး အနေနဲ့ဘာတွေကို ပြုပြင်ပြောင်းလဲပြီး ၊ဘယ်အရာကို ဦးစားပေး ဆောင်ရွက်ချင်ပါသလဲ။

ဖြေ။ ။ ကျနော်တို့အောင်နိုင်ခဲ့တယ်ဆိုတာလဲ ပါတီရဲ့ အလံအောက်ကနေပြီးတော့ နိုင်ခဲ့တယ်။ SNLD ပါတီ ကနေ အနိင်ရရှိခဲ့တဲ့ အတွက် ပါတီကချမှတ်ထားတဲ့ နိုင်ငံရေး၊ ရည်မှန်းချက်တွေနဲ့ နိုင်ငံရေးမူဝါဒတွေကို အကောင်ထည်ဖော်ဖို့ ကျနော်တို့ လွှတ်တော်ကိုယ်စားလှယ်ကတော့ အဓိကတာဝန်ဖြစ်တာပေါ့။ နောက်ပြီးတော့ ကျနော် လွှတ်တော်ထဲရောက်သွားရင် ပထမဆုံးလုပ်ဆောင်ချင်တဲ့ အရာကတော့ လူငယ်တစ်ယောက်ဖြစ်တဲ့ အတွက် လူငယ်ရေးရာ ကိစ္စရပ်တွေကို အလုပ်လုပ်ပေးချင်တယ်။

ကျနော်တို့လူငယ်တွေ အထူးသဖြင့် ကျနော်တို့ဒေသမှာဆိုရင် တချို့ လူငယ်တွေက လမ်းကြောင်းလွှဲပြီးတော့ မူးယစ်ဆေးဝါးစွဲတာတို့ တွေဖြစ်နေတယ်။ အဲဒါကြောင့် လူငယ်စွမ်းဆောင်ရေး၊ မြှင့်တင့်ရေး သင်တန်းတို့ လုပ်ချင်တယ်။ လူငယ်တွေနိင်ငံရေးမှာရော ပါဝင်လာအောင် ပြီးတော့ လူအသိုင်းအဝိုင်းထဲကို အကျိုးပြုအောင် အဲဒီလူငယ်တွေကို ပံ့ပိုးပေးချင်တယ်။

မေး။ ။ လွှတ်တော်ထဲမှာဆိုရင် နိုင်ငံရေး လုပ်သက်ကြီးတဲ့သူ၊ အသက်အရွယ်ကြီးတဲ့သူတော့ လူငယ်တယောက်အနေနဲ့ ဘယ်လိုညှိနှိုင်းပြီးဆောင်ရွက်သွားဖို့ရှိပါသလဲ။

ဖြေ။ ။ ဟုတ်ကဲ့ပါ။ လူငယ်အနေနဲ့ ပထမဆုံး လုပ်ဆောင်ရမယ်ဆိုတော့ လူကြီးတွေနဲ့တွဲလုပ်ရမယ်ဆိုတော့ လုပ်ဆောင်တဲ့နေရာမှာတော့ ကျနော်မျှော်လင့်တာတော့ အားလုံးတဦးနဲ့ တဦး ပူးပေါင်းပါဝင်လုပ်ဆောင် နိုင်ပြီး၊ အပြန်အလှန်လေးစားမှု၊ အပြန်လှန်ယုံကြည်မှုတွေ ပုံစံမျိုးနဲ့ ဖြစ်စေချင်တယ်။

ဒါပေမယ့် စိန်ခေါ်မှုတော့အများကြီးရှိမှာပေါ့။ ဘာဖြစ်လို့လဲဆို ကျနော်တို့ လူငယ်တို့တွေ ဘာလုပ်နိုင်တယ် ဆိုတော့ ကိုယ့်အရည်အချင်းကိုသူတို့ သိအောင်တော့ လုပ်ရမှာပါ။ တကယ်လို့ ကျနော်တို့လုပ်နိုင်၊ ပြောနိုင်တယ် ဆိုကတည်းက သူတို့တွေကလက်ခံရမှာ။ အသိအမှတ်တော့ ပြုရမှာပေါ့။

မေး။ ။ စိုင်းဆေအွမ်မိန်း အနိုင်ရတဲ့ နယ်မြေ မှာ ပြည်သူ့စစ်တွေ၊ လက်နက်ကိုင် အာဏာရတဲ့ သူတွေလွှမ်းမိုးမှုများနေတဲ့နေရာဆိုတော့ စိုင်းဆေးအွမ်မိန်း အနေနဲ့ ပြည်သူတွေ ကို ဘယ်လို ကာကွယ်ပြီး ဆောင်ရွက်သွားဖို့ ရှိပါသလဲ။

ဖြေ။ ။ ကျနော်တို့နယ်မှာတော့ ပြည်သူ့စစ်တွေဆို ၂ ဖွဲ့ရှိပါတယ်။ တဖွဲ့ကတော့ မိုင်းဟ ပြည်သူစစ်အဖွဲ့၊ နောက်တစ်ခုကတော့ မန်ပန် ပြည်သူ့စစ်အဖွဲ့ဆိုတာရှိပါတယ်။ ပြည်သူ့စစ ်အတွင်းမှာရှိတဲ့ ပြည်သူလူထုတွေက ကျနော်တို့ကို မကြာခဏ ဆက်သွယ်မှုတွေရှိပါတယ်။ ကျနော်တို့ အရင်ကသူတို့ကို ကူညီဆောင်ရွက်ပေးတဲ့ ဟာလဲရှိပါတယ်။ ဘာဘဲဖြစ်ဖြစ် ကျနော်မဲဆန္ဒနယ်မှာရှိတဲ့ ပြည်သူလူထုတွေ ကျတော်တို့ မြို့နယ်မှာ ဘယ်သူမဆိုမတရားမှုတွေရှိလာရင်တော့ ကျနော်တို့က အတတ်နိုင်ဆုံးတော့ ကာကွယ်သွားဖို့တော့ရှိ ပါတယ်။

မေး။ ။ ဒီလို လုပ်ပိုင်ခွင့်ရှိတဲ့သူတွေ လျော့ကျအောင်ရော လွှတ်တော်မှာ ဘယ်လိုတွေ ဆောင်ရွက်သွားဖို့ရှိလဲ။

ဖြေ။ ။ မတရားမှုတွေ၊ လူအခွင့်ရေးချိုးဖောက်မှုတွေ ရှိခဲ့မယ်ဆိုရင်တော့ ကျနော်အနေနဲ့ ဒီလွှတ်တော်ထဲက သက်ဆိုင်တဲ့အဖွဲ့ကို တိုင်ပင်ပြီးတော့ လုပ်ဆောင်သွားဖို့တော့ ရှိပါတယ်။ အထူးသဖြင့် မန့်ပန် ပြည်သူ့စစ်က အနိုင်ရတဲ့ကိုယ်စားလှယ်တဦး ကလည်း လွှတ်တော်ထဲဝင်လာတော့မယ်။

ကျနော်မဲ ဆန္ဒနယ်နဲ့ သူ မဲဆန္ဒနယ် က ထိစပ်နေတော့ ကျနော်မဲဆန္ဒနယ်မှာ ရှိတဲ့ လူအခွင့်ရေးချိုးဖောက်မှုတွေ ရှိခဲ့မယ်ဆိုရင် သက်ဆိုင်ရာပုဂ္ဂိုလ်တို့ကို ညှိနှိုင်းပြီးတော့ ပြောပြဖို့တော့ရှိပါတယ်။

မေး။ ။ မိုင်းရယ်က ပြည်သူတွေ လူငယ်တွေ အတွက်ရော ဘာတွေဆောင်ရွက်သွားဖို့ရှိလဲ။

ဖြေ။ ။ ပညာရေးပိုင်းကော၊ ပညာရေးကလည်း အရမ်းအရေးကြီးပါတယ်လို့မြင်ပါတယ်။ ပညာဆိုတာ လူတိုင်းအတွက် အရေးကြီးတယ်။ နိုင်ငံတစ်နိုင်ငံအတွက်လည်းအရေးကြီးတယ်။ နောက်အနာဂါတ်မှာ ကျနော်တို့ရဲ့ ဖွံ့ဖြိုးတိုးတက်မှုက အခုလက်ရှိပညာရေး ပေါ်မူတည်နေတဲ့ အတွက်ကြောင့် ပညာရေးပိုင်းမှာလည်း လုပ်ဆောင်သွားချင်ပါတယ်။ ပြီးတော့ လူငယ်ရေးရာ ကိစ္စရပ်တွေလဲ လုပ်ဆောင်သွားချင်ပါတယ်။

မေး။ ။ နောက်ဆုံးအနေနဲ့ ကျနော်မမေးလိုက်ရတဲ့ ဘာများထက်ဖြည့်စွက်ပြောချင်ပါသလဲ။

ဖြေ။ ။ ကျနော် ပထမဆုံးအနိုင်ရရှိပြီးတော့ လူငယ်လွှတ်တော်ကိုယ်စားလှယ် တစ်ယောက်ဖြစ်တဲ့အပေါ် ကျနော်ကို ယုံယုံကြည်ကြည်တာဝန်ပေးအပ်တဲ့ မဲဆန္ဒရှင် တွေကို ကော မဲမပေးခဲ့တဲ့ ပြည်သူတွေကိုကော ကျေးဇူးတင်ပါတယ်လို့ပဲပြောချင်ပါတယ်။