တိုင်းရင်းသားပါတီတစ်ခုအနေဖြင့် တောက်ချခံရမည်ကိုစိုးရိမ်ဟု အင်းအမျိုးသားအဖွဲ့ချုပ်ပါတီပြော

0

၂၀၂၀ ခုနှစ် ရွေးကောက်ပွဲအနိုင်ရပါတီတစ်ခုဖြစ်သော အမျိုးသားဒီမိုကရေစီအဖွဲ့ချုပ် NLD ပါတီနှင့် ဒေသတွင်း လက်တွဲပူးပေါင်းဆောင်ရွက်ရန် တိုင်းရင်းသားပါတီတစ်ခုအနေနှင့် စိုးရိမ်မှုများရှိနေကြောင်း အင်းအမျိုးသားအဖွဲ့ချုပ်ပါတီမှ အင်းတိုင်းရင်းသားရေးရာဝန်ကြီးနေရာတွင် ဝင်ရောက်ယှဉ်ပြိုင်ခဲ့သည့် ဒေါ်တင်တင်ရီ ကပြောသည်။

“တကယ်တမ်းပွင့်ပွင့်လင်းလင်းပြောရရင် ကျွန်မတို့က ကြောက်တော့ကြောက်တယ်။ ဘာကိုကြောက်လဲဆိုရင် အတောက်ချခံရမှာကို ကြောက်တယ်။ ဒါပေမဲ့ဘာမှ မဆုံးဖြတ်ရသေးပါဘူး။ ကျွန်မတို့ပါတီကသေချာ အစည်းဝေးထိုင်ပြီးတော့မှပဲ သေချာစဉ်းစားပြီးဆုံးဖြတ်ပြီးပဲ လုပ်မှာပါ။ သူတို့ပြောထားတဲ့စကားအရ တောက်ချမယ်လို့ ပြောထားတဲ့အတွက် ကျွန်မတို့ တိုင်းရင်းသားတစ်ယောက်အနေနဲ့ တိုင်းရင်းသားပါတီတစ်ခုအနေနဲ့ တော့ စိုးရိမ်သွားတာအမှန်ပဲ။ ကျွန်မတို့ပါတီ ရပ်တည်နေတာက အစိမ်းဖက်ကိုလည်း မပါပါဘူး။ အနီဘက်ကိုလည်း မပါပါဘူး” ဟု ဒေါ်တင်တင်ရီ ကပြောသည်။

အာဏာရပါတီနှင့် တိုင်းရင်းသားပါတီများပူးပေါင်း၍ ဒေသတွင်းဖွံ့ဖြိုးရေးလုပ်ငန်းများ လုပ်ဆောင်ရန်ဆိုသည်မှာ အဆိုပါပါတီမှ မည်သို့ ကမ်းလှမ်းချက်မျိုးနှင့် မည်သို့သော စည်းဘောင်များ သတ်မှတ်လာမည်ကို မသိသဖြင့် အင်းအမျိုးသားအဖွဲ့ချုပ်ပါတီအနေနှင့် အစည်းအဝေးပြီးမှ ဆုံးဖြတ်နိုင်မည်ဟု ၎င်းကပြောသည်။

တိုင်းရင်းသားပါတီများနှင့် ပူးပေါင်းဆောင်ရွက်ရန် NLD ၏ ဖိတ်ခေါ်ချက်နှင့်ပတ်သက်၍ အင်းအမျိုးသားအဖွဲ့ချုပ်ပါတီအနေဖြင့် လက်တွဲရန်ဝေခွဲမရဖြစ်နေပြီး စည်းဘောင်များ သတ်မှတ်လာမည်ကို စိုးရိမ်နေခြင်းဖြစ်သည်။

အင်းအမျိုးသားအဖွဲ့ချုပ်ပါတီသည် ပါတီအဖြစ်ရပ်တည်ခဲ့သည်မှာ ၁၀ လခန့်သာရှိပြီး ယခုနှစ်ရွေးကောက်ပွဲတွင် အင်းလေးဒေသအတွင်း ပြည်သူ့လွှတ်တော်၊ ပြည်နယ်လွှတ်တော်နှင့် အင်းတိုင်းရင်းသားရေးရာ လွှတ်တော်မဲဆန္ဒနယ်များတွင် ဝင်ရောက်ယှဉ်ပြိုင်ခဲ့ကာ ရှုံးနှိမ့်ခဲ့ခြင်း ဖြစ်သည်။  

ယခုနှစ်ရွေးကောက်ပွဲတွင် ကြိုတင်မဲပေးသည့် ကိစ္စနှင့်ပတ်သက်၍ အင်းလေးဒေသ၊ မြေနီကုန်းရွာတွင် အငြင်းပွားစရာကိစ္စများရှိနေကြောင်း၊ အဆိုပါ ရွေးကောက်ပွဲနှင့်ပတ်သက်၍ တရားမျှတမှုရှိခြင်း/မရှိခြင်းနင့်ပတ်သက်၍ လက်ရှိအချိန်အထိ သေချာပြောနိုင်ခြင်းမရှိသဖြင့် UEC ၏ ထုတ်ပြန်ကြေငြာချက်အပေါ် အချိန်တစ်ခုထိစောင့်ကြည့်မည်ဖြစ်ကြောင်း ဒေါ်တင်တင်ရီက ဆက်လက်ပြောသည်။

အင်းလေးဒေသတွင် လူဦးရေ ၁၈၀၀၀၀ ကျော်ရှိပြီး အင်းတိုင်းရင်းသား လူမျိုး ၁၂၀၀၀၀ ကျော်နှင့် ရှမ်း၊ ပအိုဝ်း၊ တောင်ရိုး အစရှိသည့် တိုင်းရင်းသားများ ခြောက်သောင်းကျော် နေထိုင်လျက်ရှိသည်။

၂၀၂၀ ရွေးကောက်ပွဲတွင် အင်းလေးဒေသတွင် အဓိကအားဖြင့် အင်းအမျိုးသားအဖွဲ့ချုပ်ပါတီ၊ အင်းတိုင်းရင်းသားများ ဖွံ့ဖြိုးတိုးတက်ရေးပါတီ နှင့် NLD ပါတီတို့ ဝင်ရောက်ယှဉ်ပြိုင်ခဲ့ကြပြီး NLD ပါတီက အနိုင်ရရှိခဲ့ခြင်းဖြစ်သည်။

Leave a Comments

SHARE