သျှမ်းပြည်မြောက်ပိုင်း မူဆယ်မြို့တွင် ကိုဗစ်-၁၉ လူနာ ၃၀ဦးရှိပြီး ရန်ကုန်ပြန်လာသည့် အမျိုးသမီးတစ်ဦးသည် စိုးရိမ်နေရကြောင်း စုံစမ်းသိရသည်။
ထိုရန်ကုန်မှာ ပြန်လာသည့် ပိုးတွေ့ အမျိုးသမီးသည် မူဆယ်မြို့ တည်းခိုခန်း ၂ခု တွင် တည်းခိုခဲ့ပြီး၊ ခရီးပြန်ထွက်မည်ဟုဆိုသဖြင့် ဆေးစစ်လိုက်သည့်အခါ ကိုဗစ်-၁၉ တွေ့ရှိခဲ့ကြောင်း၊ လက်ရှိမှာ မူဆယ်မြို့ ပြည်သူ့ဆေးရုံတွင် ဆေးကုသခံယူနေကြောင်း ဂရုဏာ လူမှုကူညီရေးအသင်းမှ ဦးသောင်းထွန်း ကပြောသည်။
“ သူကရန်ကုန်ကနေပြီးတော့လာတယ်။ မူဆယ်မှာ တည်ခိုခန်း ၂ခုတည်တယ်လို့ကြားတယ်။ တည်ခိုခန်း တစ်ခုမှာ ၅ ရက်နဲ့ ကျန်တဲ့တစ်ခုမှာ ၁ရက်တည်ခဲ့ရသေးတယ်။ သူခရီးပြန်ထွက်မယ်ဆိုပြီး ဆေးစစ်လိုက်တာ ပိုးတွေ့တာပါ” ဦးသောင်းထွန်းကပြောသည်။
လက်ရှိမှာတော့ အဆိုပါ ကိုဗစ်-၁၉ လူနာတည်းခိုခဲ့သည့် တည်းခိုခန်း(၂)ခုကို ပိတ်ထားလိုက်ပြီ၊ ထိုလူနာနှင့် ထိတွေ့ခဲ့သည့် လူ (၄)ဦးကိုလည်း တည်းခိုခန်း Quarantine တွင် ထားထားကြောင်း မူဆယ်မြို့နယ် ဆေးရုံမှ ဒေါက်တာ ဟန်နိုင်စိုး က ပြောသည်။
“ သူနဲ့ ထိတွေ့သူ (၄)ဦးကိုတော့ တည်းခိုခန်းမှာပဲထားတယ်။ ဆေးကတော့ မစစ်ရသေးဘူး” ဟု ဒေါက်တာ ဟန်နိုင်စိုးက ဆိုသည်။
ရန်ကုန်မှ လာသည့် အမျိုးသမီး တွင် မူဆယ်မြို့ တည်းခိုခန်း (၂)ခုတွင် (၆)ည တည်းခိုခဲ့သဖြင့် မူဆယ်မြို့ပေါ်တွင် ထိတွေ့မှု များစွာရှိနိုင်ကြောင်း၊ ထို့ကြောင့် မူဆယ်ဒေသခံများအနေဖြင့် စိုးရိမ်မှု ရှိနေကြောင်းလည်း ဒေသခံ စိုင်းလှိုင်းက သျှမ်းသံတော်ဆင့်ကိုပြောသည်။
“ မနေ့က ရန်ကုန်က လာတဲ့ အမျိုးသမီးက မူဆယ်မြို့ပေါ် တည်းခိုခန်း(၂)ခုမှာတည်းထားတော့ ဒေသခံအနေနဲ့ စိုးရိမ်နေရတယ်။ သူဘယ်တွေသွားဘယ်သူနဲ့ထိတွေ့လဲဆိုတာတော့ လိုက်နေဆဲပါ” ဟု စိုင်းလှိုင်းက ဆိုသည်။
ထိုရန်ကုန်မှ လာစဉ် ကျန်းမာရေး ဆေးစစ်သည့် ထောက်ခံစာ ပါလာကြောင်း၊ ထိုထောက်ခံစာသည် ငွေဖြင့် ပေးဝယ်ခဲ့သည့် ထောက်ခံစာ ဟုလည်း မူဆယ်မြို့ ဒေသခံ အသိုင်းအဝန်း ပြောပြချက် အရသိရသည်။
“ ကျနော်တို့ ကြားရတာတော့ သူ့ ဆေးထောက်ခံစာကို ငွေကျပ် ၂သောင်းနဲ့ပေးပြီး ရလာတယ်လို့ ပြောတယ်။ တကယ်လို့ အဲ့ဒါမှန်ရင်တော့ သေချာ စုံစမ်းပြီး အရေးယူသင့်တယ်” ဟု မူဆယ်ဒေသခံ စိုင်းလှိုင်းက ပြောပြသည်။
မူဆယ်မြို့တွင် ကိုဗစ်-၁၉ လူနာ စုစုပေါင်း ၃၀ဦးရှိရာ လက်ရှိ ဆေးရုံတွင်ဆေးကုသနေသူ ၂ဦးသာကျန်ရှိကြောင်း သိရသည်။