သျှမ်းပြည်တောင်ပိုင်း လွိုင်လင်ခရိုင် မိုင်းရှူးမြို့နယ် အတွင်း  မဲရုံအချို့၌ ရွေးကောက်ပွဲ ကော်မရှင် အသိ အမှတ်ပြု တံဆိပ်တုံးတွင် UEC နှင့် အမှန်ခြစ် အမှတ်အသား ရာဘာတုံး မပါရှိကြောင်း ကြားသိရသည်။

နို၀င်ဘာ ၈ ရက် ယနေ့ ကျင်းပသော ရွေးကောက်ပွဲတွင် မိုင်းရှူးမြို့ မိုင်းအောတ်ကျေးရွာအုပ်စုအတွင်းရှိမဲရုံ၌  ဖြစ်ပွားခဲ့ခြင်းဖြစ်ကြောင်း၊ မဲဆန္ဒရှင်အချို့ မဲသွားထည့်ရာတွင် မဲပြားပေါ်ထုသည့်  တံဆိပ်တုံး၌ ရွေးကောက် ပွဲ ကော်မရှင်အသိအမှတ်ပြုထားသည့် UEC နှင့် အမှန်ခြစ် အမှတ်အသား ရာဘာပြား မပါရှိကြောင်း လက်ရှိ သျှမ်းပြည်နယ်လွှတ်တော်ကိုယ်စားလှယ်လည်းဖြစ် ယခုရွေးကောက်ပွဲတွင် မိုင်းရှူး ပြည်နယ်လွှတ်တော် မဲဆန္ဒနယ် အမှတ် ၂ တွင်ဝင်ရောက်ယှဉ်ပြိုင်သည့် ကျားခေါင်းကိုယ်စားလှယ်လောင်းလည်းဖြစ်သည့် နန်းကောင်ခမ်းကပြောသည်။

“ကျမတို့နယ်မြေကတော့ တုံကင်ပြား မရလို့ မဲလာမထည့်တာတွေ၊ ထိုင်းဘက် အလုပ်သွားလုပ်လို့ မဲမထည့် နိုင်တာတွေကြောင့် ပျက်ကွက်တဲ့ မဲဆန္ဒရှင် တအားများတယ်။ မိုင်းစံမြို့နယ်ခွဲဘက်မှာပေါ့။ ထူးခြားချက် နောက်တခုက မိုင်းအောတ်ကျေးရွာအုပ်စုဘက်မှာ ထုတဲ့ တံဆိပ်တုံးက UEC အမှန်ခြစ် ရာဘာပြားမပါဘူး၊ စာမတတ်တော့ ဒီတိုင်းထုလာကြတယ်တဲ့။ ပယ်မဲတွေ၊ ပျက်မဲတွေဖြစ်ကုန်တာပေါ့။  သိတဲ့သူတွေတွေ့မှ UEC တံဆိပ်တုံးအသစ် ပြန်တောင်းရတယ်” – ဟု ပြောသည်။

အဆိုပါဖြစ်စဉ်နှင့်ပတ်သက်ပြီး မိုင်းအောတ်ကျေးရွာအုပ်စုအတွင်း မဲရုံတခုတွင် ထုသည့်တံဆိပ်တုံး ရာဘာပြား ပြုတ်ထွက်သွားပြီး ပြောင်းပြန် ပြန်တပ်ထားကြောင်း၊  အခြားတံဆိပ်တုံး တခုမှာမူ ရွေးကောက်ပွဲ ကော်မရှင် အသိအမှတ်ပြု တံဆိပ်တုံးတွင် UEC နှင့် အမှန်ခြစ် အမှတ်အသား လုံးဝမပါရှိကြောင်း၊ အသစ်အစား ပြန်ထိုး ပေးလိုက်ကြောင်း မိုင်းရှူးမြို့နယ် ရွေးကောက်ပွဲ ကော်မရှင်ဉက္ကဌ ဉီးသိန်းဝင်းက ပြောသည်။

“ကျနော်ကိုယ်တိုင်မဲရုံလိုက်စစ်ကြည့်ပါတယ်။ တခုကွာတဲ့ တံဆိပ်တုံးကို ပြောင်းပြန်ပြန်တပ်ထားတို့၊ အမှန်ခြစ် ရာဘာပြားကို ခွါယူသွားတာတို့ပေါ့နော်။ နောက်တခုက  ရိုးရိုးပြုတ်ထွက်သွားတာပါ။ ချက်ခြင်း အစားထိုး ပေးလိုက်ပါတယ်။ ၄၀ ရာခိုင်နှုန်းလောက်တော့ မဲထည့်သွားပြီးပြီအဲဒီ့အချိန်။ ကျနော့အမြင် တော့ကြီးကြီး မားမားပြသနာမဟုတ်ဘူး သဘောရိုးနဲ့မှားယွင်းတာလို့ ကျနော့အနေနဲ့မှတ်ချက်ပြုပါတယ်” – ဟု မိုင်းရှူးမြို့နယ် ရွေးကောက်ပွဲ ကော်မရှင်ဉက္ကဌ ဉီးသိန်းဝင်းက သျှမ်းသံတော်ဆင့်အားပြောသည်။

မိုင်းရှူးမြို့နယ်သည် ရှမ်းတိုင်းရင်းသားများ ဒီမိုကရေစီအဖွဲ့ချုပ် SNLD အင်အားကောင်း သည့်မြို့  ဖြစ်ပြီး လွန်ခဲ့သည့်ရွေးကောက်ပွဲကလည်း SNLD ပါတီမှလွှတ်တော်နေရာ ၄ နေရာစလုံး အနိုင်ရရှိထားသည်။ လက်ရှိရွေးကောက်ပွဲတွင်လည်း အမျိုးသား ဒီမိုကရေစီအဖွဲ့ချုပ် NLD ၊ ပြည်ထောင်စုကြံ့ခိုင်ရေးပါတီ USDP ၊ ရှမ်းတိုင်းရင်းသားများ ဒီမိုကရက်တစ်ပါတီ SNDP စသည့်ပါတီကြီးများက ဝင်ရောက်ယှဉ်ပြိုင်နေကြကြောင်း ကြားသိရသည်။