သျှမ်းပြည်မြောက်ပိုင်း မူဆယ်မြို့နယ် တိန်းလုံကျေးရွာတွင် ယနေ့ (နိုဝင်ဘာ၈)ရက် ရွေးကောက်ပွဲနေ့၌ လူစားထိုးပြီး မဲလာပေးမှုများရှိနေကြောင်း သတင်းရရှိသည်။
ဖြစ်စဉ်မှာ မူဆယ်မြို့နယ် တိန်းလုံကျေးရွာရှိ မဲရုံအမှတ်(၁)တွင် အမျိုးသမီးတဦးသည် သူငယ်ချင်းအစား မဲလာပေးပြီး၊ ပြည်သူ့လွှတ်တော် ပုံး တပုံးကိုထည့်ခဲ့ကြောင်း တိန်းလုံ မဲရုံကို စောင့်ကြည့်နေသည့် လူငယ်တဦးက သျှမ်းသံတော်ဆင့်ကို ပြောသည်။
“ တရုတ်အမျိုးသမီးတဦးက သူ့သူငယ်ချင်းအစားလာပေးသွားတယ်။ တိုကင်နဲ့ အမှတ်စဉ်ပဲကြည့်တော့ သေချာမသိလိုက်ဘူး။ ပြည်သူ့လွှတ်တော်ပုံးတပုံး တော့ ထည့်သွားတယ်” ဟု ၎င်း လူငယ်က ပြောပြသည်။
လက်ရှိမှာ ကိုယ်စားလာရောက်ပြီးမဲထည့်ခဲ့သည့်အမျိုးသမီးကို ထိန်းသိမ်းထားကြောင်းသိရသည်။
အဆိုပါ မဲရုံ(၁)တွင် မဲထည့်ရမည့် မဲဆန္ဒရှင် ၁၄၇၀ ဦးရှိကြောင်းသိရသည်။
သျှမ်းပြည်နေရာအနှံ့အပြားတွင် လူစားထိုးပြီး မဲလာရောက်ပေးမှုများကို တွေ့ရှိရသည်။