သျှမ်းပြည်အရှေ့ပိုင်း မိုင်းဆတ်မြို့နယ်ရှိ UWSA ထိန်းချုပ်လှုပ်ရှားသည့် နယ်မြေအတွင်း ရွေးကောက်ပွဲ ဖြစ်နိုင်ခြေမရှိနိုင်သဖြင့် အချိန်မှီ ပိတ်သိမ်းသင့်ကြောင်း နိုင်ငံရေး ပါတီ (၄) ပါတီ မှ ပြည်ထောင်စု ရွေးကောက်ပွဲ ကော်မရှင် (UEC) ထံ လက်မှတ်ရေးထိုး တောင်းဆိုခဲ့သည်။

လက်ရှိ အချိန်ထိ “ဝ”ထိန်းချုပ်နယ်မြေအတွင်းသို့ မဲဆွယ်စည်းရုံးခွင့်မရရှိကြကြောင်း၊ အဆိုပါနယ်မြေသို့ ဝင်ပြီး မဲဆွယ်ရန် တောင်းဆိုစီစဉ်လာခဲ့သော်လည်း အကြောင်းအမျိုးမျိုးပြကာ ဝင်ရောက်ခွင့်မပေးကြောင်းလည်း ထိုနယ်မြေအတွင်း ဝင်ရောက်ယှဉ်ပြိုင်မည့် နိုင်ငံရေးပါတီများက ပြောဆိုလိုက်သည်။

လက်ရှိ ပြည်ထောင်စုရွေးကောက်ပွဲကော်မရှင်ကို လက်မှတ်ရေးထိုး စာတင်ထားသည့် ပါတီများမှာ အမျိုးသားဒီမိုကရေစီ အဖွဲ့ချုပ် (NLD)၊ ရှမ်းတိုင်ရင်းသားများ ဒီမိုကရေစီ အဖွဲ့ချုပ် (SNLD)၊ ရှမ်းတိုင်းရင်းသားများ ဒီမိုကရက်တစ်ပါတီ(SNDP)နှင့် လားဟူ အမျိုးသား ဖွံ့ဖြိုးတိုးတက်ရေးပါတီ (LNDP)တို့ ဖြစ်ကြောင်းသိရသည်။

မိုင်းဆတ်မြို့နယ် “ ဝ” ထိန်းချုပ်သည့် နယ်မြေအတွင်းရှိ ကျေးရွာ အုပ်စု (၄) ခု တွင် ကျေးရွာပေါင်း (၂၁) ရွာရှိပြီး မဲဆန္ဒရှင် စုစုပေါင်း (၂၂၇၄၃) ဦးခန့် နှင့် မဲရုံပေါင်း (၁၂) ရုံ ရှိကြောင်းသိရသည်။

ထို့ ကျေးရွာအုပ်စုများ တွင် အဝင်အထွက် ဂိတ်များထားရှိပြီး စစ်ဆေးမှုများရှိပြီး၊ ယာဉ်အမျိုးအစား လူဦးရေ၊ ဝင်ထွက်မည့် နေ့ရက် အချိန်ဇယား များရေးဆွဲပြီး စာဖြင့် အဆင့်ဆင့် တင်ပြနေရကြောင်း၊ ထိုသို့တင်ပြပြီး ကော်မရှင် ခွင့်ပြုချက်ဖြင့် စည်းရုံးဟောပြောရန်သွားသော်လည်း ဂိတ်ဖြတ်သန်းရန်အတွက် အခက်အခဲများ ရင်ဆိုင်နေရကြောင်း ထိုအတွက် အဆိုပါကျေးရွာများ၏ မဲရုံကို အချိန်မှီပိတ်သိမ်းရန် တောင်းဆိုရခြင်းဖြစ်ကြောင်း သိရသည်။

“ကိုဗစ် ကာလ နဲ့ ကိုဗစ်ငြိမ်သွားပေမယ့် ခုချိန်ထိ သူတို့ ထိန်းချုပ်နယ်မြေထဲ ဝင်မယ်ဆိုရင် ကော်မရှင် လက်မှတ်တွေ ပါရင်လည်း သူတို့ ဗမာစာတွေ မသိဘူးပြောတယ်။ ဂိတ်ပေါက်ဝမှာ ၁ နာရီ ၂ နာရီလောက် စောင့်ရတာတွေလည်းရှိတယ်။ ဒီနေ့ ကော်မရှင်တွေ ပြောလာတာကတော့ တကယ်သွားမယ်ဆိုရင် အချိန် ၂ ရက် (၅ -၆) ရက်နေ့ သွားမယ်ဆိုရင် သူတို့ဘက်က အပြည့်အဝ ကူညီပေးမယ်လို့ပြေတယ်။ ကျနော်တို့ အဖွဲ့တော့ မသွားတော့ဘူး” SNLD ကိုယ်စားပြု မိုင်းဆတ်မြို့နယ် ပြည်နယ် မဲဆန္ဒနယ် အမှတ်(၂) တွင် ဝင်ရောက်ယှဉ်ပြိုင်မည့် ဦးအိုက်စိုင်း (ခ) စိုင်းဝဏ္ဏ က ပြောသည်။

“ဝ” ထိန်းချုပ်ရာနယ်မြေအတွင်း မဲဆွယ်စည်းရုံးရန်အတွက် ကော်မရှင်ခွင့်ပြုမိန့်ကို ဗမာစာ နှင့် ရေသားထားခြင်းကို လက်မခံကြောင်း ၊ သက်ဆိုင်ရာ “ ဝ” အကြီးအကဲ တရုတ်စာ ရေးထားသည့် ခွင့်ပြုမိန့်ရှိမှ သွားခွင့်ပြုကြောင်း လားဟူအမျိုးသားပါတီ ( LNDP) ကိုယ်စားပြုပြီး မိုင်းဆတ်မြို့နယ် ပြည်သူ့လွှတ်တော် နေရာ ဝင်ရောက်ယှဉ်ပြိုင်မည့် ဒေါ်အေးသီတာမြင့် က သျှမ်းသံတော်ဆင့် ကိုပြောသည်။

“နိုင်ငံရေးပါတီတွေ စည်းရုံးရေးသွားဖို့အတွက် ဝင်ခွင့်မပြုလို့ပါ။ ရွေးကောက်ပွဲ ကော်မရှင်က ခွင့်ပြုထားပေမယ့်လည်း သူတို့ဝင်ဖို့အတွက် ခွင့်မပြုတဲ့အတွက်ပါ။ ကျမတို့သွားကတည်းက ခွင့်ပြုစာဆိုရင် ဗမာစာ ဆိုရင် ခွင့်မပြုဘူး။ သူတို့ “ဝ” အကြီးအကဲတွေဆီက သက်ဆိုင်ရာက တရုတ်စာရေးထားတဲ့ ခွင့်ပြုမိန့်ရှိမှ သွားခွင့်ပြုမယ်ပေါ့။” ဟု ဒေါ်အေးသီတာမြင့် ကပြောသည်။

ရွေးကောက်ပွဲ ကော်မရှင်မှ နိုဝင်ဘာ ၅ ရက်နေ့ နှင့် ၆ ရက်နေ့မှာ မဲဆွယ်စည်းရုံးခွင့် ရအောင် စီစဉ်ပေးမည်ဟု အကြောင်းကြားလာပေမယ့် ကျန်းမာရေး စစ်ဆေးမှုတွေ အဆင့်ဆင့် စာတင်ရမည်ဖြစ်သည့်အတွက် အချိန်မရှိတော့ကြောင်း ဒေါ်အေးသီတာမြင့် ကပြောသည်။

“ကော်မရှင်က လုပ်ပေးမယ်ဆိုပေမယ့် ခုအနေအထားမျိုးက ၂ ရက်ပဲ ကျန်တော့တယ်။ ဟိုဘက်ကတော့ ကျန်းမာရေး စစ်ဆေးမှုတွေ လုပ်နေမှာပဲပေါ့ ကျမထင်တာ အဆင်မပြေနိုင်ဘူး။” ဒေါ်အေးသီတာမြင့် ကပြောသည်။

လက်ရှိအခြေအနေအရ ထိုနယ်မြေအတွင်းနေထိုင်သူများသည် ကြိုတင်မဲများထည့်ပြီးသွားပြီဖြစ်ကြောင်း၊ ထို့ကြောင့် နိုင်ငံရေးပါတီအနေဖြင့် တကြိမ်တခါမှ စည်းရုံးရေးဆင်းခွင့်မရှိဘဲ ရွေးကောက်ပွဲ ပြုလုပ်ရသည့်အပေါ် တရားမျှတမှုမရှိကြောင်းလည်း ထိုပါတီများက ပြောဆိုလိုက်သည်။

“လွတ်လွတ်လပ်လပ်နဲ့ သွားပြီး စည်းရုံးခွင့် မရှိဘူးဆိုတော့ လွတ်လပ်ပြီး တရားမျှတတဲ့ ရွေးကောက်ပွဲ ဖြစ်လာနိုင်စရာ အကြောင်းမရှိတော့ဘူး။ ကြားရတဲ့ သတင်းတွေကလည်း မကောင်းဘူး။ ဒါက တကယ် ဖျက်သိမ်းဖို့ လိုအပ်တဲ့ နေရာဖြစ်တဲ့အတွက် စုပေါင်းပြီး ကျမတို့ တင်ထားခြင်းဖြစ်တဲ့အတွက် ဒါက လုံးဝဖျက်သိမ်းသင့်တဲ့နေရာဖြစ်ပါတယ်ဆိုတဲ့ဟာကို ကျမအနေနဲ့ ပြောချင်ပါတယ်။” ဟု ဒေါ်အေးသီတာမြင့် ကပြောသည်။

မိုင်းဆတ်ခရိုင်ရွေးကောက်ပွဲ ကော်မရှင်အဖွဲ့ခွဲ ဥက္ကဋ္ဌ ဦးစိုင်းတူး ကို ၎င်း ကိစ္စနှင့်ပတ်သက်ပြီး ဆက်သွယ်မေးမြန်းရာမှာ “ အခု ကျနော်တို့ အစည်းအဝေးတော့ လုပ်နေတယ်လေ။ လောလောဆယ်တော့ မဖြေကြားနိုင်သေးပါဘူး။” ဟု သျှမ်းသံတော်ဆင့် ကို ပြောသည်။

မိုင်းဆတ်မြို့နယ်တွင် အစိုးရတပ်မတော်၊ ဝ လက်နက်ကိုင်တပ်ဖွဲ့၊ လားဟူနယ်ခြားစောင့်တပ် နှင့် RCSS/SSA တပ်ဖွဲ့တို့ လှုပ်ရှားသည့် နေရာဖြစ်သည်။

မိုင်းဆတ်မြို့နယ်အတွင်း ဝင်ရောက်ယှဉ်ပြိင်မည့် ပါတီများမှာ ဝ အမျိုးသားပါတီ၊ ပြည်ထောင်စု ကောင်းကျိုးပါတီ၊ လားဟူအမျိုးသား ဖွံ့ဖြိုးတိုးတက်ရေးပါတီ၊ ရှမ်းတိုင်းရင်းသားများ ဒီမိုကရေစီအဖွဲ့ချုပ်၊ ရှမ်းတိုင်းရင်းသာများ ဒီမိုကရက်တစ်ပါတီ နှင့် ပြည်ထောင်စု ကြံ့ခိုင်ရေး နှင့် ဖွံ့ဖြိုးရေး ပါတီတို့ဖြစ်ကြောင်း သိရသည်။