သျှမ်းပြည် အရှေ့ပိုင်း မိုင်းဆတ်မြို့နယ် အတွင်းရှိ “ဝ” တပ်ဖွဲ့များထိန်းချုပ်လှုပ်ရှားသည့်နယ်မြေ အတွင်း နိုင်ငံရေးပါတီများ မဲဆွယ်စည်းရုံးရေး သွားလာရန် ခက်ခဲနေကြောင်း စုံစမ်းသိရသည်။
မိုင်းဆတ်မြို့နယ် အတွင်းရှိ “ ဝ” တပ်ဖွဲ့ ထိန်းချုပ်နယ်မြေများမှာ ဝမ်ဟုံ၊ ဆီဟုတ်၊ မိုင်းယွန်း၊ တာကူး စသည့် နေရာများဖြစ်ပြီး၊ ထိုနေရာများအတွင်းသို့ ကိုယ်စားလှယ်လောင်းများ မဲဆွယ်စည်းရုံးရန် ခက်ခဲနေကြောင်း ရှမ်းတိုင်းရင်းသားများ ဒီမိုကရေစီ အဖွဲ့ချုပ်( SNLD) ကိုယ်စားပြု မိုင်းဆတ်မြို့နယ် ပြည်နယ် မဲဆန္ဒနယ် အမှတ်(၁) တွင် ဝင်ရောက်ယှဉ်ပြိုင်မည့် စိုင်းကျော်အောင် က သျှမ်းသံတော်ဆင့်ကို ပြောသည်။
“ မိုင်းဆတ်မြို့နယ်မှာရှိတဲ့ ဝ နယ်မြေမှာ မဲဆွယ်ဆင်းဖို့ခက်ခဲတယ်။ ဝ နယ်မြေဝင်ဖို့က မြို့နယ် အုပ်ချုပ်ရေးမှူးကို စာတင်ရမယ်။ ဝတပ်ဖွဲ့ဘက် အကြောင်းကြားမှ သွားရမယ်။ အဲ့နယ်ထဲသွားရင်လည်း ဂိတ်တွေ ဖြတ်ရတာ အချိန်အရမ်းကြာတယ်။ ခက်ခဲတယ်” ဟု စိုင်းကျော်အောင် က ပြောသည်။
လက်ရှိ ကိုဗစ်-၁၉ ကာကွယ်ထိန်းချုပ်သည့် ကာလဖြစ်သည့်အတွက် “ဝ”တပ်ဖွဲ့ ထိန်းချုပ်သည့်နယ်မြေကို ဝင်၊ထွက်သွားလာ ကာ မဲဆွယ်စည်းရုံးရန် ကြားသဖြင့် ထိုဒေသအတွင်းရှိ ပြည်သူများနှင့်ထိတွေ့ရန် ခက်ခဲကြောင်း လည်း စိုင်းကျော်အောင်က ဆိုသည်။
ထို “ ဝ” တပ်ဖွဲ့ထိန်းချုပ်သည့် နယ်မြေ အတွင်း တိုင်းရင်းသားပါတီများ လွတ်လပ်စွာ သွားလာ မဲဆွယ်ခွင့်မရသဖြင့် တိုင်းရင်းသားပါတီများအတွက် လွတ်လပ်ပြီး တရားမျှတသည့် ရွေးကောက်ပွဲ လုံးဝ မဟုတ်ကြောင်းလည်း လားဟူ အမျိုးသားဖွံ့ဖြိုးတိုးတက်ရေး ပါတီ (LNDP) ကိုယ်စားပြုပြီး မိုင်းဆတ်မြို့နယ် ပြည်သူ့လွှတ်တော် နေရာဝင်ရောက် ယှဉ်ပြိုင်မည့် ဒေါ်အေးသီတာမြင့် က သျှမ်းသံတော်ဆင့်ကို ပြောသည်။
“မိုင်းဆတ်နယ်ထဲ က “ ဝ” နယ်ထဲမှာ သွားလို့မရဘူး။ တိုင်းရင်းသားပါတီတွေလည်း သွားလို့မရဘူး။ ကျမတို့လည်း သွားလို့မရဘူး။ ၂ရက်ကြိုတင်ပြီးမှ သွားရမယ်ပြောတယ်။ နောက် “ ဝ” အကြီးအကဲတွေက ပိတ်ထားတယ်ပြောတယ်” ဟု ဒေါ်အေးသီတာမြင့် က ဆိုသည်။
လွန်ခဲ့သည့် စက်တင်ဘာ လဆန်းပိုင်းတွင် တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် UWSA (ဝ)တပ်ဖွဲ့ နှင့် တြိဂံဒေသ တိုင်းစစ်ဌာနချုပ်တွင် တွေ့ဆုံခဲ့ပြီး ကိုဗစ်-၁၉ ကာကွယ်ထိန်းချုပ်ရေး ဆိုင်ရာ အထောက်အကူပြု ပစ္စည်းများ ထောက်ပံ့ပေးအပ်ခဲ့ကြောင်းသိရသည်။
ထိုမြေပြင် သတင်းအရ “ဝ”နယ်မြေ အတွင်းရှိ မဲဆန္ဒရှင်များကို တိုင်းရင်းသားပါတီများအား မဲပေးရန် ဟန့်တားခြင်း၊ ခြိမ်းခြောက်ခြင်းတို့ ပြုလုပ်ကြောင်းသိရသည်။
သျှမ်းပြည် အရှေ့ပိုင်းတွင် နေထိုင်သည့် ဌာနေ တိုင်းရင်းသားအများစုသည် တိုင်းရင်းသားပါတီများကို ယခင်ကထက် ပိုပြီး အားပေးလာကြသော်လည်း တိုင်းရင်းသားပါတီများမှာ ယနေ့ချိန်ထိ ခြိမ်းခြောက်မှုများရှိနေသေးကြောင်းလည်း ထိုဒေသ တို့ ဝင်ရောက်ယှဉ်ပြိုင်သည့် ပါတီ ကိုယ်စားလှယ်လောင်းများက ပြောဆိုလိုက်သည်။
“ ဒီနယ်မြေက အရင် ၂၀၁၀၊ ၂၀၁၅ ထက် ပိုဆိုးနေတယ်လို့ ပြောရမယ်။ ၂၀၂၀ မှာလည်း ကိုဗစ်-၁၉ ရောဂါက တမျိုး၊ လက်နက်ကိုင်ခြိမ်းခြောက်မှုကတမျိုး ရှိနေတယ်” ဟု ဒေါ်အေးသီတာမြင့် ကပြောသည်။
မိုင်းဆတ်မြို့နယ်တွင် အစိုးရတပ်မတော်၊ ၀ လက်နက်ကိုင်တပ်ဖွဲ့၊ လားဟူနယ်ခြားစောင့်တပ်နှင့် RCSS/SSA အနည်းငယ်လှုပ်ရှားပါသည်။
မိုင်းဆတ်မြို့နယ် အတွင်း ဝင်ရောက်ယှဉ်ပြိုင်မည့်ပါတီများမှာ “ ဝ” အမျိုးသားပါတီ၊ ပြည်ထောင်စု ကောင်းကျိုးဆောင် ပါတီ၊ လားဟူ အမျိုးသားဖွံွံ့ဖြိုးတိုးတက်ရေးပါတီ၊ ရှမ်းတိုင်းရင်းသားများ ဒီမိုကရေစီအဖွဲ့ချုပ်၊ အမျိုးသားဒီမိုကရေစီအဖွဲ့ချုပ်၊ ရှမ်းတိုင်းရင်းသားများ ဒီမိုကရက်တစ်ပါတီနှင့် ပြည်ထောင်စု ကြံ့ခိုင်ရေး နှင့် ဖွံ့ဖြိုးရေးပါတီ တို့ဖြစ်ကြောင်းသိရသည်။
